AKP កណ្ដាល ថ្ងៃទី២៩ ខែកក្កដា ឆ្នាំ២០២៦–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាព្រឹកថ្ងៃទី២៩ ខែកក្កដា ឆ្នាំ២០២៦នេះ នឹងអញ្ជើញជាអធិបតីក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋ ចំនួន ២៣ ០៦៧ បណ្ណ សម្រាប់ឃុំជ័យធំ ឃុំរកាជន្លឹង និង ឃុំពុកឬស្សី នៅវិទ្យាល័យចំណេះទូទៅ និងបច្ចេកទេស សម្តេចអគ្គមហាសេនាបតីតេជោ ហ៊ុន សែន ROTA ខ្សាច់កណ្តាល ភូមិសន្លុង ឃុំសន្លុង ស្រុកខ្សាច់កណ្តាល ខេត្តកណ្តាល។

វត្តមានដ៏ខ្ពង់ខ្ពស់បំផុតរបស់ សម្តេច មហាបវរធិបតី នាពេលនេះ មិនត្រឹមតែជាការផ្តល់នូវកិត្តិយសដ៏ឧត្តុង្គឧត្តមប៉ុណ្ណោះទេ ប៉ុន្តែថែមទាំងជាការលើកទឹកចិត្តយ៉ាងធំធេង ដល់ថ្នាក់ដឹកនាំ មន្ត្រីរាជការ និងអាជ្ញាធរ ដែនដីគ្រប់លំដាប់ថ្នាក់ និងជាសក្ខីភាពបញ្ជាក់យ៉ាងច្បាស់ពីមនោសញ្ចេតនារបស់ សម្តេច ដែលតែងតែនៅរួមសុខ រួមទុក្ខ រួមគិតគូរ និងដឹកនាំជំរុញដោះស្រាយរាល់កង្វល់បញ្ហា ដើម្បីការពារផលប្រយោជន៍ជូនបងប្អូនប្រជាពលរដ្ឋដោយផ្ទាល់ជានិច្ច។

ខេត្តកណ្តាលមានទីតាំងយុទ្ធសាស្ត្រព័ទ្ធជុំវិញរាជធានីភ្នំពេញ និងមានព្រំប្រទល់ ជាប់ប្រទេសវៀតណាម គ្របដណ្តប់លើផ្ទៃក្រឡាសរុប ៣ ២៧៨ គីឡូម៉ែត្រការ៉េ ដែល មានប្រជាជនសរុប ១ ៤៣៤ ៣៣៦ នាក់ ។ គិតត្រឹមឆ្នាំ២០២៥ ផលិតផលក្នុងស្រុក សរុបរបស់ខេត្តមានចំនួន ៤ ២៥៩ លានដុល្លារ ដែលចំណូលសម្រាប់មនុស្សម្នាក់ៗ បានកើនដល់ ៣ ០០៦ ដុល្លារ ។ សន្ទុះនៃការអភិវឌ្ឍដ៏ឆាប់រហ័សនេះ បានធ្វើឱ្យតម្រូវការ ដីធ្លីសម្រាប់ការវិនិយោគ និងលំនៅឋានកើនឡើងជាលំដាប់ និងទាមទារចាំបាច់បំផុត នូវការធានាសុវត្ថិភាពសិទ្ធិកាន់កាប់ដីធ្លី។

ក្នុងស្មារតីនេះ ដោយអនុវត្តតាមយុទ្ធសាស្ត្របញ្ចកោណ ដំណាក់កាលទី១ របស់ រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ក្រោមបាវចនា “កំណើន ការងារ សមធម៌ ប្រសិទ្ធភាព និងចីរភាព” និងអាទិភាពគន្លឹះ៥ “មនុស្ស ផ្លូវ ទឹក ភ្លើង និងបច្ចេកវិទ្យា” ជាពិសេសមុំទី៤ នៃបញ្ចកោណទី៤ ស្តីពីការពង្រឹងការគ្រប់គ្រង និងការធ្វើទំនើបកម្ម នគរូបនីយកម្ម រដ្ឋបាលខេត្ត ក្រុង-ស្រុក មន្ទីររៀបចំដែនដី នគរូបនីយកម្ម សំណង់ និង សុរិយោដីខេត្ត ព្រមទាំងមន្ទីរជំនាញពាក់ព័ន្ធ បាននិងកំពុងអនុវត្តយ៉ាងខ្ជាប់ខ្ជួននូវ គោលនយោបាយអាទិភាពទាំង ១៥ ចំណុច របស់ក្រសួងរៀបចំដែនដី នគរូបនីយកម្ម និងសំណង់ ជាពិសេស អាទិភាពគន្លឹះទី៥ តាមរយៈការពន្លឿនការចុះបញ្ជី និងផ្តល់ វិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋ ដោយឈរលើអភិក្រម «ចុះបញ្ជី ដីបង្ហើយ សេវាគាប់ចិត្ត និងបរិយាកាសគ្មានវិវាទ» ដែលសមិទ្ធផលនេះនឹងរួមចំណែក យ៉ាងសំខាន់ក្នុងការលុបបំបាត់វិវាទ ធានាសុវត្ថិភាពសិទ្ធិកាន់កាប់ និងប្រែក្លាយដីធ្លីទៅជាប្រភពទុនដ៏រឹងមាំសម្រាប់ការវិនិយោគ សំដៅលើកកម្ពស់ជីវភាពប្រជាពលរដ្ឋ និង អភិវឌ្ឍមូលដ្ឋានខេត្តកណ្តាល និងសង្គមជាតិទាំងមូល៕

ដោយ៖ គង់ សិរីរ័ត្ន