AKP ព្រះសីហនុ ថ្ងៃទី២៨ ខែកក្កដា ឆ្នាំ២០២៦--លោក អ៊ី ធារិន អភិបាល នៃគណៈអភិបាលស្រុកព្រៃនប់បានអញ្ជើញដឹកនាំកិច្ចប្រជុំពិភាក្សាការងាររវាងរដ្ឋបាលស្រុកព្រៃនប់ ជាមួយប្រធានមន្ទីរធនធាន ទឹក និងឧតុនិយម, មន្ទីរអភិវឌ្ឍន៍ជនបទ, មន្ទីរឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍ខេត្តព្រះសីហនុ ព្រមទាំងអាជ្ញាធរឃុំទាំង១០ ក្នុងស្រុកព្រៃនប់ នៅព្រឹកថ្ងៃអង្គារទី២៨ ខែកក្កដា ឆ្នាំ២០២៦។

លោក អ៊ី ធារិន អភិបាលស្រុកព្រៃនប់បានបញ្ជាក់ថា រដ្ឋបាលស្រុកបាននឹងកំពុងជំរុញការអនុវត្តវិធានការជាយុទ្ធសាស្ត្រទាំងចំពោះមុខ និងការងារយុទ្ធសាស្ត្ររយៈពេលវែងរួមមាន៖
១. វិធានការចំពោះមុខ (ដោះស្រាយជំនន់ទឹកភ្លៀងរដូវវស្សា) ដោយចាត់កម្លាំងជំនាញ និងប្រើប្រាស់គ្រឿងចក្រចុះកាយ ស្តារប្រឡាយរំដោះទឹក ជម្រះស្មៅ ភក់ និងកាកសំណល់ដែលបង្កឪ្យស្ទះចរន្តទឹកភ្លាមៗ ដើម្បីបើក ផ្លូវទឹកឪ្យមានលំហូរឱ្យបានលឿនទាន់ពេលវេលា។

២.ផែនការត្រៀមលក្ខណៈ សម្បត្តិសម្រាប់រដូវប្រាំង (ដើម្បីធានាសន្តិសុខទឹក ស្អាតសម្រាប់ការប្រើប្រាស់រដូវប្រាំង) រៀបចំផែនការស្តារ និងស្តុកទឹក នៅតាមអាងទឹក និងស្រះ ទឹកក្នុងសហគមន៍នាពេលខាងមុខ ដើម្បីធានាឱ្យមាន ប្រភពទឹកបម្រុងគ្រប់គ្រាន់ សម្រាប់ផ្គត់ផ្គង់ការប្រើប្រាស់ប្រចាំថ្ងៃរបស់ប្រជាពលរដ្ឋ និងការងារបង្ក បង្កើនផលកសិកម្មនៅរដូវ ប្រាំងខាងមុខ ។

ទន្ទឹមនឹងនោះដែរ លោកអភិបាលស្រុក ក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ចូលរួមសហការជាមួយអាជ្ញាធរ សូមមេត្តាកុំបោះចោលសំរាម ឬកាកសំណល់ផ្សេងៗចូលក្នុងប្រឡាយ និងចូលរួមថែរក្សាប្រភពទឹកក្នុងសហគមន៍ឱ្យបានល្អទាំងអស់គ្នា ដើម្បីបំរើប្រយោជន៍សាធារណរបស់យើងក្នុងមូលដ្ឋាន។ ម្យ៉ាងទៀតជួយថែរក្សាអនាម័យ បរិស្ថានឱ្យកាន់តែល្អបន្ថែមទៀត លើកកម្ពស់ការយល់ដឹងចូលរួមឱ្យបានផុលផុស ៕

ដោយ ងូ សុមុនី