AKP បន្ទាយមានជ័យ ថ្ងៃទី២៨ ខែកក្កដា ឆ្នាំ២០២៦--វិទ្យាល័យម៉ាឡៃ ស្ថិតក្នុងស្រុកម៉ាឡៃ ខេត្តបន្ទាយមានជ័យ កំពុងបន្តពង្រឹងការបណ្តុះបណ្តាលជំនាញបច្ចេកទេសផ្នែកអគ្គិសនីដល់សិស្សានុសិស្សយ៉ាងសកម្ម ដោយផ្តោតទាំងលើទ្រឹស្តី និងការអនុវត្តជាក់ស្តែង ក្នុងគោលបំណងបំពាក់សមត្ថភាពជំនាញវិជ្ជាជីវៈឱ្យយុវជន អាចប្រើប្រាស់ក្នុងជីវភាពប្រចាំថ្ងៃ បន្តការសិក្សា និងឆ្ពោះទៅរកឱកាសការងារប្រកបដោយប្រសិទ្ធភាពនាពេលអនាគត។

លោក នាក់ យឿន នាយកវិទ្យាល័យម៉ាឡៃ បានប្រាប់ឱ្យដឹងកាលពីរសៀលថ្ងៃទី២៧ ខែកក្កដា ឆ្នាំ២០២៦ថា អគារបច្ចេកទេសរបស់វិទ្យាល័យនៅតែបន្តដំណើរការបង្រៀនជំនាញបច្ចេកទេសជាប្រចាំ ជាពិសេសជំនាញការតបណ្ដាញអគ្គិសនី ដែលជាកម្មវិធីបណ្ដុះបណ្ដាលរៀបចំដោយមន្ទីរអប់រំ យុវជន និងកីឡា ខេត្តបន្ទាយមានជ័យ ក្រោមគំនិតផ្តួចផ្តើម និងការជួយឧបត្ថម្ភរបស់ ឯកឧត្តម កែ គឹមយ៉ាន ឧត្តមទីប្រឹក្សាព្រះមហាក្សត្រ និងជាអ្នកតំណាងរាស្ត្រមណ្ឌលខេត្តបន្ទាយមានជ័យ។

លោកនាយកបានបញ្ជាក់ថា ការបណ្តុះបណ្តាលនេះផ្តោតលើការបញ្ចូលចំណេះដឹងទ្រឹស្តីជាមួយការអនុវត្តផ្ទាល់ ដើម្បីឱ្យសិស្សអាចយល់ដឹងពីបច្ចេកទេស កសាងបទពិសោធន៍ និងមានទំនុកចិត្តក្នុងការប្រើប្រាស់ជំនាញនៅពេលបញ្ចប់ការសិក្សា។ ការអប់រំបែបនេះមិនត្រឹមតែជួយលើកកម្ពស់គុណភាពការសិក្សាប៉ុណ្ណោះទេ ប៉ុន្តែថែមទាំងបង្កើតសមត្ថភាពប្រកួតប្រជែងរបស់យុវជនក្នុងទីផ្សារការងារដែលកំពុងត្រូវការកម្លាំងពលកម្មមានជំនាញកាន់តែច្រើន។

លោក នាក់ យឿន បានបន្ថែមថា អគារបច្ចេកទេសដែលកំពុងប្រើប្រាស់សម្រាប់ការបណ្តុះបណ្តាលនេះ ត្រូវបានសាងសង់ឡើងក្រោមការឧបត្ថម្ភដ៏ថ្លៃថ្លារបស់ ឯកឧត្តម កែ គឹមយ៉ាន ដែលបានរួមចំណែកយ៉ាងសំខាន់ក្នុងការពង្រីកឱកាសសិក្សាជំនាញដល់សិស្សនៅតំបន់ជនបទ និងជំរុញការអភិវឌ្ឍវិស័យអប់រំនៅខេត្តបន្ទាយមានជ័យឱ្យកាន់តែមានគុណភាព។

កម្មវិធីបណ្តុះបណ្តាលនេះ ត្រូវបានចាត់ទុកថា ជាផ្នែកមួយនៃការអភិវឌ្ឍន៍ការអប់រំបែបបច្ចេកទេស និងវិជ្ជាជីវៈ ដែលផ្តោតលើការបង្កើតធនធានមនុស្សមានសមត្ថភាព ឆ្លើយតបទៅនឹងតម្រូវការជាក់ស្តែងរបស់ទីផ្សារការងារ។ ជំនាញដែលសិស្សទទួលបាន អាចយកទៅអនុវត្តក្នុងការងារប្រចាំថ្ងៃ បង្កើតមុខរបរដោយខ្លួនឯង ឬបន្តការសិក្សាជំនាញកម្រិតខ្ពស់ ដើម្បីបង្កើនឱកាសការងារ និងប្រាក់ចំណូលនាពេលអនាគត។

ការបន្តពង្រឹងការបណ្តុះបណ្តាលជំនាញអគ្គិសនីនៅវិទ្យាល័យម៉ាឡៃ បានឆ្លុះបញ្ចាំងពីការយកចិត្តទុកដាក់លើការកសាងមូលធនមនុស្ស ដែលជាកត្តាសំខាន់សម្រាប់ការអភិវឌ្ឍសេដ្ឋកិច្ច និងសង្គមប្រកបដោយចីរភាព ស្របតាមគោលនយោបាយរបស់រាជរដ្ឋាភិបាលក្នុងការលើកកម្ពស់ការអប់រំបែបបច្ចេកទេស និងវិជ្ជាជីវៈ ដើម្បីឱ្យយុវជនកម្ពុជាមានជំនាញ មានការងារ និងអាចប្រកួតប្រជែងក្នុងសម័យសេដ្ឋកិច្ចទំនើប៕

ដោយ ឈុន សារ៉ាត