AKPកំពង់ស្ពឺថ្ងៃទី២៧ ខែកក្កដា ឆ្នាំ ២០២៦– ប្រឹក្សាអភិវឌ្ឍន៍កម្ពុជា (ក.អ.ក.) ចុះទស្សនកិច្ចផ្ទាល់នៅក្នុងរោងចក្រនៃក្រុមហ៊ុន Yura Harness (Cambodia) Co., Ltd. និងជួបពិភាក្សាការងារជាមួយគណៈគ្រប់គ្រងជាន់ខ្ពស់របស់ក្រុមហ៊ុន ក្នុងក្រុងច្បារមន ខេត្តកំពង់ស្ពឺ។

នាព្រឹកថ្ងៃចន្ទ ទី២៧ ខែកក្កដា ឆ្នាំ២០២៦ តបតាមការគោរពអញ្ជើញរបស់ លោក Lee Doo Yeun អគ្គនាយកប្រតិបត្តិក្រុមហ៊ុន Yura Harness (Cambodia) Co., Ltd., ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) បានអញ្ជើញដឹកនាំគណៈប្រតិភូ ក.អ.ក. ចុះបំពេញទស្សនកិច្ចផ្ទាល់នៅក្នុងរោងចក្ររបស់ក្រុមហ៊ុន ដែលមានទីតាំងស្ថិតនៅក្នុងភូមិទួលធ្នង់ សង្កាត់រការធំ ក្រុងច្បារមន ខេត្តកំពង់ស្ពឺ និងមានបុគ្គលិក កម្មករ និយោជិត សរុបប្រមាណ ១១០០នាក់ កំពុងបម្រើការ។ YURA Harness (Cambodia) គឺជាក្រុមហ៊ុនបុត្រសម្ព័ន្ធរបស់ក្រុមហ៊ុន YURA Corporation ដែលបានចាប់ផ្តើមខ្សែច្រវាក់ផលិតកម្មរបស់ខ្លួននៅក្នុងប្រទេសកម្ពុជា កាលពីឆ្នាំ២០២២។

សមាសភាពចូលរួមអម ឯកឧត្តមឧបនាយករដ្ឋមន្ត្រី ក្នុងដំណើរទស្សនកិច្ចផ្ទាល់នៅក្នុងរោងចក្ររបស់ក្រុមហ៊ុន Yura Harness (Cambodia) Co., Ltd. នាព្រឹកនេះរួមមានវត្តមាន ឯកឧត្តមអគ្គលេខាធិការរង អគ្គលេខាធិការដ្ឋាននៃ ក.អ.ក. និងគណៈកម្មាធិការវិនិយោគកម្ពុជានៃ ក.អ.ក. ព្រមទាំងថ្នាក់ដឹកនាំ និងមន្ត្រីពាក់ព័ន្ធនៃ ក.អ.ក. មួយចំនួន។

ទស្សនកិច្ចនាឱកាសនេះ ត្រូវបានរៀបចំឡើងក្នុងគោលបំណងដើម្បីបង្ហាញជូនដោយផ្ទាល់ទៅកាន់ ឯកឧត្តមឧបនាយករដ្ឋមន្ត្រី ក៏ដូចជាគណៈ.ប្រតិភូអមដំណើរនូវទិដ្ឋភាពរួមនៃ បច្ចុប្បន្នភាពដំណើរប្រតិបត្តិការវិនិយោគ ការអភិវឌ្ឍកម្លាំងពលកម្ម សមត្ថភាពផលិតកម្ម និងទិសដៅក្នុងការពង្រីកទំហំវិនិយោគនាពេលអនាគត របស់ក្រុមហ៊ុន។ សកម្មភាពនៃការចុះទស្សនកិច្ចផ្ទាល់នេះ ជាសក្ខីកម្មឆ្លុះបង្ហាញថា ទោះបីជាកម្ពុជាព្យាយាមទាក់ទាញវិនិយោគិនថ្មីៗបន្ថែមយ៉ាងណាក៏ដោយ រាជរដ្ឋាភិបាលក៏នៅតែយកចិត្តទុកដាក់ខ្ពស់ ក្នុងការថែទាំគាំទ្រចំពោះគម្រោងវិនិយោគ ដែលកំពុងមានសកម្មភាពវិនិយោគ សំដៅធ្វើឱ្យប្រតិបត្តិការអាជីវកម្មរបស់ពួកគេអាចបន្តរីកចម្រើនដោយចីរភាព និងជំរុញដល់ការពង្រីកទុនវិនិយោគបន្ថែមទៀតនៅក្នុងប្រទេសកម្ពុជា។

គូររម្លឹកដែរថា កាលពីថ្ងៃទី១៨ ខែមិថុនា ឆ្នាំ២០២៦ ក្នុងឱកាសបំពេញបេសកកម្មគោះទ្វារទាក់ទាញនិងជំរុញវិនិយោគ នៅក្នុងសាធារណរដ្ឋកូរ៉េ, ឯកឧត្តមឧបនាយករដ្ឋមន្ត្រី ក៏បានដឹកនាំគណៈប្រតិភូជាន់ខ្ពស់នៃកម្ពុជា ជួបពិភាក្សាការងារជាមួយ លោក Dae Yeol Ohm អនុប្រធានក្រុមប្រឹក្សាភិបាលក្រុមហ៊ុន YURA Corporation ដែលជាក្រុមហ៊ុនមេនៃ ក្រុមហ៊ុន Yura Harness (Cambodia) Co., Ltd. ផងដែរ៕

ដោយ៖ ចរិយា ប្រភព៖ CDC