AKP ភ្នំពេញ ថ្ងៃទី២៧ ខែកក្កដា ឆ្នាំ២០២៦-- ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នាថ្ងៃចន្ទទី២៧ ខែកក្កដា ឆ្នាំ២០២៦ បានអញ្ជើញដឹកនាំគណៈប្រតិភូជាន់ខ្ពស់ក្រសួង ចាប់ផ្តើមបំពេញទស្សនកិច្ចជាផ្លូវការនៅសាធារណរដ្ឋហ្វាំងឡង់។
សូមជម្រាបថា ដំណើរទស្សនកិច្ចនេះជាផ្នែកមួយនៃគម្រោងកែលម្អវិស័យធារាសាស្ត្រកសិកម្ម (IAIP) ដែលគាំទ្រថវិកាដោយធនាគារអភិវឌ្ឍន៍អាស៊ី (ADB) ក្នុងការសាងសង់ស្ថានីយរ៉ាដាតេជោសែនទី២ ដែលមានសារៈសំខាន់ក្នុងការផ្តល់នូវទិន្នន័យទាន់ពេលវេលា (Real-time) ដើម្បីបង្កើនប្រសិទ្ធភាព និងសុក្រឹតភាព នៃការព្យាករធាតុអាកាស របបទឹកភ្លៀង និងការតាមដានបម្រែបម្រួលអាកាសធាតុ ឆ្លើយតបទៅនឹងតម្រូវការប្រើប្រាស់ចាំបាច់សម្រាប់ពហុវិស័យ។

ក្នុងឱកាសបំពេញទស្សនកិច្ចនេះ ឯកឧត្តមរដ្ឋមន្ត្រី និងគណៈប្រតិភូជាន់ខ្ពស់ក្រសួងនឹងអញ្ជើញជួបពិភាក្សាការងារជាមួយថ្នាក់ដឹកនាំ និងអ្នកបច្ចេកទេសក្រុមហ៊ុន Vaisala នៅទីស្នាក់ការកណ្តាលក្រុមហ៊ុន ក្នុងទីក្រុងហែលស៊ិនគី ប្រទេសហ្វាំងឡង់ និងធ្វើទស្សនកិច្ចដោយផ្ទាល់ទៅកាន់រោងចក្រផលិត Doppler Rada របស់ក្រុមហ៊ុន។

ជាមួយគ្នានេះ ឯកឧត្តមរដ្ឋមន្ត្រី និងគណៈប្រតិភូ ក៏នឹងអញ្ជើញទៅទស្សនកិច្ចនៅវិទ្យាស្ថានឧតុនិយមហ្វាំងឡង់ (FMI) ព្រមទាំងជួបពិភាក្សាការងារជាមួយក្រុមការងាររបស់វិទ្យាស្ថានផងដែរ៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)