AKP ភ្នំពេញ ថ្ងៃទី២៧ ខែកក្កដា ឆ្នាំ២០២៦ -- ប្រធានាធិបតីកូរ៉េខាងត្បូង លោក លី ជេម្យុង បាននិយាយកាលពីពេលថ្មីៗនេះថា កូរ៉េខាងត្បូង និងសហរដ្ឋអាមេរិកគួរតែជំរុញទំនាក់ទំនងរបស់ពួកគេលើសពីសម្ព័ន្ធភាពដែលមានអាយុកាលយូរលង់ណាស់មកហើយ ដោយពង្រីកកិច្ចសហប្រតិបត្តិការទៅក្នុងវិស័យបច្ចេកវិទ្យា នវានុវត្តន៍ និងការចាប់ផ្តើមអាជីវកម្មថ្មី។

លោក លី បានធ្វើការកត់សម្គាល់នេះនៅក្នុងកិច្ចប្រជុំមួយនៅទីក្រុងសាន់ហ្រ្វាន់ស៊ីស្កូ ជាមួយវិនិយោគិន។ ប្រធានាធិបតីកូរ៉េខាងត្បូងបានទៅដល់ទីនោះកាលពីថ្ងៃសុក្រសប្តាហ៍មុន មុនដំណើរទៅកាន់ទៅកាន់ប្រទេសប្រេស៊ីល ដែលជាគោលដៅដំបូងនៃដំណើរទស្សនកិច្ចបីប្រទេសរបស់លោកទៅកាន់តំបន់អាម៉េរិកខាងត្បូង។

កិច្ចប្រជុំនេះមានការចូលរួមពីនាយកប្រតិបត្តិមកពីក្រុមហ៊ុនបណ្តាក់ទុនចំនួន៦ ដែលមានមូលដ្ឋាននៅ Silicon Valley ដែលរួមមានទាំងលោក ម៉ាទីន កាសាដូ មកពីក្រុមហ៊ុន Andreessen Horowitz លោក អាល់ហ្រ្វេដ លីន មកពីក្រុមហ៊ុន Sequoia Capital និងលោក ហឺមេនត៍ តាណេចា មកពីក្រុមហ៊ុន General Catalyst ផងដែរ។

លោកបានទទូចថា ការរួមបញ្ចូលគ្នានូវសមត្ថភាពមូលធនបណ្តាក់ទុនលំដាប់ពិភពលោករបស់សហរដ្ឋអាមេរិក និងបណ្តាញសកលលោកជាមួយនឹងបច្ចេកវិទ្យាទំនើប និងការប្រកួតប្រជែងផ្នែកផលិតកម្មរបស់កូរ៉េខាងត្បូង នឹងបង្កើតអ្នកនវានុវត្តន៍ថ្មីទូទាំងពិភពលោក ដូចជាក្រុមហ៊ុនផលិតបន្ទះឈីបសកលលោកអេឡិចត្រូនិចសាំស៊ុង និងក្រុមហ៊ុនអេសខេ ហ៊ីនីច ដែលនឹងដឹកនាំពិភពលោក។

លោក លី បាននិយាយថា «ប្រសិនបើក្រុមហ៊ុនចាប់ផ្តើមអាជីវកម្មរបស់កូរ៉េខាងត្បូងជួបនឹងមូលធន និងទីផ្សាររបស់សហរដ្ឋអាមេរិក ខណៈដែលវិនិយោគិន និងក្រុមហ៊ុននវានុវត្តន៍របស់សហរដ្ឋអាមេរិកភ្ជាប់ទំនាក់ទំនងជាមួយប្រព័ន្ធអេកូឡូស៊ីបច្ចេកវិទ្យា និងផលិតកម្មរបស់កូរ៉េខាងត្បូង ប្រទេសទាំងពីរនឹងក្លាយជាដៃគូក្នុងវិស័យនវានុវត្តន៍ដែលនឹងកំណត់អនាគតក្នុងរយៈពេល ៣០ឆ្នាំខាងមុខ»៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)