AKP ភ្នំពេញ ថ្ងៃទី២៧ ខែកក្កដា ឆ្នាំ២០២៦ -- កងកម្លាំងប្រដាប់អាវុធអ៊ីរ៉ង់បានសម្លាប់ទាហានអាម៉េរិកជាង ២០០នាក់ដែលត្រូវបានដាក់ពង្រាយនៅតាមមូលដ្ឋានទ័ពអាម៉េរិកនៅមជ្ឈិមបូព៌ាចាប់តាំងពីទីក្រុងវ៉ាស៊ីនតោនបានរំលោភលើបទឈប់បាញ់មក។ នេះបើយោងតាមអ្នកនាំពាក្យផ្លូវការរបស់កងឆ្មាំបដិវត្តន៍អ៊ីស្លាម (IRGC) លោក ហូសសេន ម៉ូហេបប៊ី។

លោកបានប្រាប់ទីភ្នាក់ងារសារព័ត៌មាន Tasnim ក្នុងបទសម្ភាសន៍មួយថា «ចំនួនជនជាតិអាម៉េរិកដែលត្រូវបានសម្លាប់ជាលទ្ធផលនៃប្រតិបត្តិការVictory-2 មានលើសពី ២០០នាក់ ហើយចំនួនអ្នករងរបួស គឺខ្ពស់ជាងតួលេខនេះ»។

លោក ម៉ូហេបប៊ី បានច្រានចោលរបាយការណ៍ទាំងអស់របស់សហរដ្ឋអាមេរិកអំពីអ្នកស្លាប់ និងរបួសរបស់ខ្លួនថាជាការមិនពិត ហើយបានស្នើឱ្យទីក្រុងវ៉ាស៊ីនតោនអញ្ជើញអ្នកសារព័ត៌មានទៅកាន់មូលដ្ឋានទ័ពអាម៉េរិកដែលត្រូវបានវាយប្រហារពីមុនដោយអ៊ីរ៉ង់។

ការកើនឡើងចុងក្រោយនៃភាពតានតឹងរវាងសហរដ្ឋអាមេរិក និងអ៊ីរ៉ង់បានចាប់ផ្តើមនៅថ្ងៃទី០៨ ខែកក្កដា នៅពេលដែលសហរដ្ឋអាមេរិកបានធ្វើការវាយប្រហារលើអ៊ីរ៉ង់ជាលើកដំបូងចាប់តាំងពីទីក្រុងវ៉ាស៊ីនតោន និងទីក្រុងតេអេរ៉ង់បានចុះហត្ថលេខាលើអនុស្សរណៈនៃការយោគយល់គ្នា។សហរដ្ឋអាមេរិកបានអះអាងថា ការវាយប្រហារនេះ គឺជាការសងសឹកចំពោះការវាយប្រហារលើនាវាពាណិជ្ជកម្មមួយនៅក្នុងច្រកសមុទ្រហ័រមុស។ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសនៅថ្ងៃដដែលនោះថា បទឈប់បាញ់ជាមួយអ៊ីរ៉ង់បានចប់ហើយ។ ទីក្រុងតេអេរ៉ង់បានឆ្លើយតបដោយកំណត់គោលដៅលើទីតាំងរបស់សហរដ្ឋអាមេរិកនៅទូទាំងតំបន់មជ្ឈិមបូព៌ា រួមទាំងនៅបារ៉ែន គុយវ៉ែត អេមីរ៉ាតអារ៉ាប់រួម កាតានិងហ្ស៊កដានី។ សហរដ្ឋអាមេរិកបានស្ដារឡើងវិញនូវការបិទផ្លូវកងទ័ពជើងទឹករបស់ខ្លួនលើអ៊ីរ៉ង់នៅថ្ងៃទី១៤ ខែកក្កដា៕

ដោយ៖ យា ចិន្ដាខន្ដី (ប្រភព៖ តាសស៍)