AKP កំពង់ស្ពឺ ថ្ងៃទី២៧ ខែកក្កដា ឆ្នាំ២០២៦--ឯកឧត្តម ឈៀ ស៊ីដារ៉ា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអគ្គលេខាធិការរងសមាគមអតីតយុទ្ធជន និងនិវត្តជនកម្ពុជា  និងលោកបណ្ឌិត តូច ប៉ូលីវ៉ា អភិបាលរងនៃគណៈអភិបាលខេត្តកំពង់ស្ពឺ អញ្ជើញជាអធិបតីភាពក្នុងវគ្គបណ្តុះបណ្តាល ស្តីពី «ការងាររដ្ឋបាល និងការងារបេឡាមរណសង្គ្រោះ សមាគមអតីតយុទ្ធជន និងនិវត្តជនកម្ពុជា» នាថ្ងៃទី២៧ ខែកក្កដា ឆ្នាំ២០២៦ នៅខេត្តកំពង់ស្ពឺ ។ វគ្គបណ្តុះបណ្តាលនេះ មានការអញ្ជើញចូលរួមពីសំណាក់ លោក លោកស្រី ប្រធាន-អនុប្រធានមន្ទីរ-អង្គភាពជុំវិញខេត្ត តំណាងកងកម្លាំងទាំងបី ព្រមទាំងសិក្ខាកាមដែលជាមន្ត្រី ទទួលបន្ទុកការងាររដ្ឋបាល និងបេឡាមរណសង្គ្រោះមកពីបណ្តាក្រុង-ស្រុក ទូទាំងខេត្តកំពង់ស្ពឺ ។

ក្នុងឱកាសនោះ លោកបណ្ឌិត តូច ប៉ូលីវ៉ា បានពាំនាំនូវការសាកសួរ សុខទុក្ខពីសំណាក់ ថ្នាក់ដឹកនាំខេត្ត ជូនដល់សិក្ខាកាមទាំងអស់។ លោកបណ្ឌិតបានគូសបញ្ជាក់ថា វគ្គបណ្តុះបណ្តាល នាថ្ងៃនេះ គឺពិតជាមានសារៈសំខាន់ខ្លាំងណាស់ ក្នុងការចូលរួមចំណែក លើកកម្ពស់សមត្ថភាព និងការយល់ដឹងបន្ថែមដល់មន្ត្រីអនុវត្តន៍ផ្ទាល់នៅតាមបណ្តាក្រុង-ស្រុក លើកិច្ចការងាររដ្ឋបាល និងការគ្រប់គ្រងថវិកាបេឡាមរណសង្គ្រោះ ដើម្បីធានាបាននូវតម្លាភាព ភាពរហ័សរហួន និងមិន ត្រូវឱ្យមានការយឺតយ៉ាវ ឬការិយាធិបតេយ្យច្រើន ក្នុងការជួយ ឧបត្ថម្ភដល់គ្រួសារអតីតយុទ្ធជន និងនិវត្តជន ដែលកំពុងជួបទុក្ខលំបាកនោះឡើយ។

ឆ្លៀតក្នុងឱកាសនោះដែរ ឯកឧត្តម ឈៀ ស៊ីដារ៉ា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានរំលឹកពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្នុងការលើកកម្ពស់ជីវភាព និងការគាំពារសុខុមាលភាពរបស់បងប្អូនអតីតយុទ្ធជន និងនិវត្តជន ដែលជាអ្នកមានគុណបំណាច់ចំពោះជាតិមាតុភូមិ។

ឯកឧត្តមរដ្ឋលេខាធិការបានបន្តទៀតថា ការងារបេឡាមរណសង្គ្រោះ មិនមែនគ្រាន់ តែជាការងាររដ្ឋបាលធម្មតានោះទេ ប៉ុន្តែវាគឺជាកិច្ចការមនុស្សធម៌ និងជាកាតព្វកិច្ចដ៏ឧត្តុង្គឧត្តម ក្នុងការតបស្នងសងគុណចំពោះបងប្អូនអតីតយុទ្ធជន និងនិវត្តជន ដែលបានលះបង់សាច់ស្រស់ ឈាមស្រស់ និងកម្លាំងកាយចិត្តក្នុងការបម្រើជាតិមាតុភូមិ នាពេលកន្លងមក។

ឯកឧត្តមបានបន្ថែមថា ឆ្លងកាត់វគ្គបណ្តុះបណ្តាលនេះ ទៅថ្ងៃខាងមុខ ឯកឧត្តម ចង់ឃើញនូវរបត់ថ្មីមួយនៃការផ្តល់សេវាជូនបងប្អូនសមាជិកសមាគម ពោលគឺភាពស្មោះត្រង់ ភាពច្បាស់លាស់នៃទិន្នន័យ និងការទូទាត់ថវិកាតាមនីតិវិធីបេឡាមរណសង្គ្រោះ ត្រូវតែធ្វើឡើង ឱ្យបានលឿនបំផុត ទាន់ពេលវេលាស្របតាមការលំបាកជាក់ស្តែង របស់ក្រុមគ្រួសារសព ដោយមិនត្រូវទុកឱ្យមានការត្អូញត្អែរ ឬយឺតយ៉ាវណាមួយកើតឡើងឡើយ៕

ដោយ៖ ម៉ែន ប៊ុនធីម