AKP កណ្ដាល ថ្ងៃទី២៧ ខែកក្កដា ឆ្នាំ២០២៦--ឯកឧត្ដម គួច ចំរើន អភិបាលខេត្តកណ្ដាល នៅថ្ងៃទី២៦ ខែកក្កដា ឆ្នាំ២០២៦ បានដឹកនាំមន្ទីរជំនាញ និងអាជ្ញាធរស្រុកអង្គស្នួល អញ្ជើញចុះពិនិត្យមើលអំពីដំណើរការដ្ឋានសាងសង់ផ្លូវបេតុងអាមេ១ខ្សែ ដែលមានប្រវែង ១ ១៤៦ ម៉ែត្រ ទទឹង៨ម៉ែត្រ និងកម្រាស់១,៥០ ម៉ែត្រ ដែលផ្លូវបេតុងមួយខ្សែនេះ ស្ថិតនៅផ្លូវចូល និងជុំវិញបរិវេណ សាកលវិទ្យាល័យសម្តេចព្រះមហាសង្ឃរាជ បួរ គ្រី ក្នុងភូមិសាស្ត្រស្រុកអង្គស្នួល ខេត្តកណ្ដាល។

បន្ទាប់ពីផ្លូវនេះសាងសង់រួចរាល់ បានជួយសម្រួលដល់ការធ្វើដំណើរកាន់តែងាយស្រួល សុវត្ថិភាព និងលឿនរហ័ស ជូនដល់លោកគ្រូ អ្នកគ្រូ សមណសិស្ស និស្សិត និងប្រជាពលរដ្ឋរស់នៅក្នុងតំបន់ជុំវិញ។ ជាមួយគ្នានេះការកសាងផ្លូវនេះ គឺជាផ្នែកមួយនៃការអភិវឌ្ឍហេដ្ឋារចនាសម្ព័ន្ធរូបវន្ត ក្នុងស្រុកអង្គស្នួលឱ្យកាន់តែមានភាពស៊ីវិល័យ និងមានរបៀបរៀបរយ ជួយលើកកម្ពស់សោភ័ណភាពជុំវិញបរិវេណសាកលវិទ្យាល័យឱ្យកាន់តែស្អាត និងមានបរិស្ថានល្អផងដែរ។

ក្នុងឱកាសចុះពិនិត្យនោះ ឯកឧត្ដម គួច ចំរើន អភិបាលខេត្តកណ្ដាល បានណែនាំដល់ក្រុមការងារបច្ចេកទេស និងក្រុមហ៊ុនសាងសង់ ត្រូវយកចិត្តទុកដាក់ប្រកបដោយការទទួលខុសត្រូវខ្ពស់ ក្នុងការសាងសង់ឱ្យស្របតាមបទដ្ឋានបច្ចេកទេស ដើម្បីធានាបាននូវ គុណភាពរឹងមាំ និងប្រើប្រាស់បានយូរអង្វែង៕

ដោយ ណយ នឿន (ប្រភព៖ រដ្ឋបាលខេត្តកណ្តាល)