AKP កំពង់ឆ្នាំង ថ្ងៃទី២៥ ខែកក្កដា ឆ្នាំ២០២៦-- 

លោក ឈឹម វុទ្ធា អភិបាលរងខេត្តកំពង់ឆ្នាំងបានដឹកនាំកិច្ចប្រជុំត្រួតពិនិត្យ ឆ្លងរបាយការណ៍គណ:កម្មាធិការប្រតិបត្តិមន្ទីរ អង្គភាពក្រុង ស្រុក ឃុំ សង្កាត់នានាជុំវិញខេត្ត ពិធីនេះធ្វើនៅសាលប្រជុំសាលាខេត្តកំពង់ឆ្នាំងកាលពីថ្ងៃទី២៤ ខែកក្កដា ឆ្នាំ២០២៦ ដោយមានការអញ្ជើញចូលរួមពី លោក លោកស្រី អភិបាលរងខេត្ត  ថ្នាក់ដឹកនាំមន្ទីរស្ថាប័នពាក់ព័ន្ធ នាយករដ្ឋបាលសាលាខេត្ដ  មេបញ្ជាការកងកម្លាំងទាំងបីនិងលោកអភិបាលក្រុងស្រុកផងដែរ។

ក្នុងឱកាសនោះ លោក ឈឹម វុទ្ធា បានលើកឡើងថា គោលបំណងនៃកិច្ចប្រជុំនេះ ដើម្បីពិនិត្យ ពិភាក្សា និង អនុម័តលើរបាយការណ៍វឌ្ឍនភាព សង្ខេបរបស់សមាគមគណៈកម្មាធិការប្រតិបត្តិ ក្រុង ស្រុក ឃុំ សង្កាត់ និងបទបង្ហាញលើការបង្កើតឱ្យមានអង្គការមួយ ដែលតំណាង និងការពារផលប្រយោជន៍រួម របស់ប្រជាពលរដ្ឋ ស្រុក ឃុំ សង្កាត់ នៅក្នុងខេត្ត  ដើម្បីលើកកម្ពស់គុណភាពជីវភាពរស់នៅ និងសុខុមាលភាពរបស់ប្រជាពលរដ្ឋ តាមរយៈអភិបាលកិច្ចតាមបែបវិមជ្ឈការ និងវិសហមជ្ឈការ ព្រមទាំងអភិវឌ្ឍសមត្ថភាពបង្កើនប្រសិទ្ធភាព នៃការផ្ដល់សេវាជូនប្រជាពលរដ្ឋនៅមូលដ្ឋាន ។

ទន្ទឹមនឹងនេះលោកបានបន្តថា  ក្រោមការដឹកនាំរបស់រាជរដ្ឋាភិបាលដែលមានសម្ដេចបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជានាចក្រកម្ពុជា បានផ្តល់អនុសាសន៍ឲ្យមានការចុះជួបប្រាស្រ័យទាក់ទងជាមួយប្រជាពលរដ្ឋនៅតាមមូលដ្ឋានជាប្រចាំដើម្បីស្វែងយល់ពីសុខទុក្ខ និងស្តាប់មតិយោបល់ សំណូមពរ បញ្ហាប្រឈមទាំងឡាយ ក៏ដូចជាចូលរួមជួយពង្រឹងការអនុវត្តន៍តួនាទីរបស់ក្រុមប្រឹក្សាឃុំ-សង្កាត់ ការផ្តល់សេវាសាធារណៈ ការងារអភិវឌ្ឍន៍មូលដ្ឋានប្រកបដោយប្រសិទ្ធភាពខ្ពស់ សម្រាប់ជាប្រយោជន៍ដល់ប្រជាពលរដ្ឋទាំងអស់ ដោយមិនប្រកាន់និន្នាការនយោបាយឡើយ។

ថ្លែងក្នុងឱកាសនោះ លោកអភិបាលរងបានជម្រុញដល់មន្ត្រីពាក់ព័ន្ធ នូវទិសដៅសំខាន់ៗដូចជា មន្ទីរកសិកម្មនិងអាជ្ញាធរត្រូវពិនិត្យតាមដានការបង្កបង្កើនផលស្រូវរបស់ប្រជាពលរដ្ឋ​ ជាពិសេសត្រូវអន្តរាគមន៍អោយបានទាន់ពេលវេលានៅកន្លែងណាដែលខ្វះទឹកស្រោចស្រព។ ខិតខំប្រឹងប្រែងក្នុងការអនុវត្តន៍ភារកិច្ចឱ្យបានត្រឹមត្រូវ និងសម្រេចបានលទ្ធផលយ៉ាងល្អប្រសើរជាបន្តបន្ទាប់ ចំពោះសមាគមប្រត្តិបត្តិ ស្រុក ឃុំ សង្កាត់ គឺជាមធ្យោបាយដ៏សំខាន់មួយសម្រាប់រដ្ឋបាលថ្នាក់ក្រោមជាតិ។ យោងតាមកត្តាបម្រែបម្រួលអាកាសធាតុក្រសួង មន្ទីរ ស្ថាប័នពាក់ព័ន្ធរអភិវឌ្ឍមូលដ្ឋាន ការអនុវត្តន៍គោលនយោបាយ និងប្រព័ន្ធនានា ដែលធ្វើឱ្យមូលដ្ឋានរបស់ខ្លួនមានការរីកចម្រើនបានយ៉ាងល្អប្រសើ៕

ដោយ បៃ ស៊ីថុន