AKP បន្ទាយមានជ័យ ថ្ងៃទី២៤ ខែកក្កដា ឆ្នាំ២០២៦-- ការកើនឡើងយ៉ាងរហ័សនៃបច្ចេកវិទ្យាឌីជីថលមិនត្រឹមតែនាំមកនូវកាលានុវត្តភាពសម្រាប់ការសិក្សាស្រាវជ្រាវប៉ុណ្ណោះទេ ប៉ុន្តែវាក៏កំពុងបង្កើតជា «អន្ទាក់ស្ងាត់» ដែលបង្កប់នូវហានិភ័យខ្ពស់ដល់កុមារ ប្រសិនបើគ្មានការជ្រោមជ្រែង និងតម្រង់ទិសត្រឹមត្រូវពីអាណាព្យាបាល និងសហគមន៍នោះទេ។

ការគូសបញ្ជាក់បែបនេះបានធ្វើឡើងនៅក្នុងវេទិកាផ្សព្វផ្សាយស្តីពីសុវត្ថិភាពកុមារលើប្រព័ន្ធអនឡាញ និងសុខភាពផ្លូវចិត្តស្ត្រី និងកុមារ នាព្រឹកថ្ងៃសុក្រ ទី២៤ ខែកក្កដា ឆ្នាំ២០២៦ នៅសាលាអនុវិទ្យាល័យឃីឡិ ស្ថិតក្នុងឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ក្រោមអធិបតីភាពលោកជំទាវ ឈុត ដាលីន សមាជិកក្រុមប្រឹក្សាខេត្ត និងជាប្រធានលេខាធិការដ្ឋានពិគ្រោះយោបល់កិច្ចការស្រ្តីនិងកុមារខេត្ត (គ.ក.ស.ក) ដោយមានការអញ្ជើញចូលរួមពីថ្នាក់ដឹកនាំមន្ត្រីរាជការ តំណាងអង្គការទស្សនៈពិភពលោក (World Vision) ព្រមទាំងតំណាងមន្ទីរ-អង្គភាពពាក់ព័ន្ធជុំវិញខេត្ត លោកគ្រូ អ្នកគ្រូ និងក្មួយៗសិក្សានុសិស្សយ៉ាងច្រើនកុះករ។

នៅក្នុងឱកាសនោះ លោកជំទាវ ឈុត ដាលីន បានវាយតម្លៃខ្ពស់ចំពោះកិច្ចសហការយ៉ាងរឹងមាំរវាងអាជ្ញាធរដែនដី និងអង្គការទស្សនៈពិភពលោក ដែលបានផ្តួចផ្តើមរៀបចំវេទិកាអប់រំដ៏មានសារៈសំខាន់នេះឡើង។ លោកជំទាវបានរំលេចថា ក្នុងយុគសម័យបច្ចេកវិទ្យាបញ្ញាសិប្បនិម្មិត និងបណ្តាញសង្គម កុមារគឺជាក្រុមដែលងាយរងគ្រោះបំផុត។ «បច្ចេកវិទ្យាបានផ្តល់អត្ថប្រយោជន៍ជាច្រើនសម្រាប់ការសិក្សាស្រាវជ្រាវ ប៉ុន្តែវាក៏បង្កប់នូវហានិភ័យខ្ពស់ផងដែរ ប្រសិនបើក្មេងៗប្រើប្រាស់ដោយខ្វះការយល់ដឹង»។

ជាមួយគ្នានោះ លោកជំទាវ ឈុត ដាលីន បានផ្ញើសារដាស់តឿនក្មួយៗសិស្សានុសិស្សត្រូវតែប្រុងប្រយ័ត្នខ្ពស់ចំពោះការចែករំលែកព័ត៌មានផ្ទាល់ខ្លួន ការចាញ់បោកការអូសទាញ ឬការបៀតបៀនផ្សេងៗតាមប្រព័ន្ធអ៊ីនធឺណិត ដែលអាចប៉ះពាល់ដល់អនាគត និងសុវត្ថិភាពផ្ទាល់ខ្លួន។ ក្រៅពីសុវត្ថិភាពលើប្រព័ន្ធអ៊ីនធឺណិត លោកជំទាវប្រធាន គ.ក.ស.ក ខេត្ត ក៏បានលើកឡើងយ៉ាងស៊ីជម្រៅអំពីការថែទាំ «សុខភាពផ្លូវចិត្ត» ដែលជាកត្តាសម្រេចលើគុណភាពជីវិតរបស់ស្ត្រី និងកុមារ។ លោកជំទាវបានគូសបញ្ជាក់ថា នៅក្នុងសង្គមបច្ចុប្បន្ន ស្ត្រី និងកុមារជារឿយៗតែងតែជួបប្រទះនូវសម្ពាធផ្លូវចិត្ត ឬវិបត្តិផ្សេងៗដែលទាមទារឱ្យមានការយល់ចិត្ត និងការគាំទ្រជាប្រព័ន្ធ។

លោកជំទាវបានបន្ថែមថា ការយកចិត្តទុកដាក់លើសុខភាពផ្លូវចិត្តស្ត្រី និងកុមារ គឺជាគ្រឹះយ៉ាងសំខាន់នៃសុខុមាលភាពរស់នៅ។ យើងត្រូវរួមគ្នាលុបបំបាត់រាល់រូបភាពហិង្សា និងបង្កើតបរិយាកាសប្រកបដោយភាពកក់ក្តៅ ផ្ដល់ការលើកទឹកចិត្ត និងការជួយជ្រោមជ្រែងពីក្រុមគ្រួសារ និងសហគមន៍ ដើម្បីឱ្យពួកគេអាចលូតលាស់បានពេញលេញទាំងកាយសម្បទា និងស្មារតី។ ដើម្បីធានាបាននូវប្រសិទ្ធភាពយូរអង្វែង លោកជំទាវបានអំពាវនាវយ៉ាងទទូចដល់អាណាព្យាបាល លោកគ្រូ អ្នកគ្រូ និងអាជ្ញាធរមូលដ្ឋាន ត្រូវបន្តធ្វើជា «តម្រួតសហគមន៍» តាមដាន យកចិត្តទុកដាក់ និងណែនាំកុមារឱ្យបានជាប់លាប់ ទាំងការប្រើប្រាស់បណ្តាញសង្គម និងការកត់សម្គាល់ពីការប្រែប្រួលផ្លូវចិត្ត ឬអាកប្បកិរិយាមិនប្រក្រតីផ្សេងៗ ដើម្បីអាចលូកដៃជួយអន្តរាគមន៍ និងដោះស្រាយបានទាន់ពេលវេលា។

វេទិកាទាំងមូលបានប្រព្រឹត្តទៅដោយបរិយាកាសស្និទ្ធស្នាល និងទទួលបានការចាប់អារម្មណ៍យ៉ាងខ្លាំងពីសំណាក់អ្នកចូលរួម ពិសេសគឺក្មួយៗសិស្សានុសិស្សនៃសាលាអនុវិទ្យាល័យឃីឡិ។

ប្អូនប្រុស មាស សុខជា សិស្សថ្នាក់ទី៩ បានសម្តែងនូវក្តីរំភើបដោយលើកឡើងថាកន្លងមក ខ្ញុំធ្លាប់តែលេងហ្វេសប៊ុក និងតេឡេក្រាម ដោយមិនដែលគិតពីសុវត្ថិភាពព័ត៌មានផ្ទាល់ខ្លួននោះទេ។ បន្ទាប់ពីបានស្តាប់ប្រសាសន៍ណែនាំរបស់លោកជំទាវ និងលោកគ្រូអ្នកគ្រូនៅក្នុងវេទិកានេះ ខ្ញុំទើបយល់ច្បាស់ពីគ្រោះថ្នាក់នៃការបោកប្រាស់តាមអនឡាញ និងរបៀបការពារខ្លួន។ ខ្ញុំនឹងយកចំណេះដឹងនេះទៅចែករំលែកបន្តដល់មិត្តភក្តិ និងបងប្អូននៅផ្ទះបន្ថែមទៀត»។

ចំណែកឯប្អូនស្រី គង់ ស្រីណែត សិស្សថ្នាក់ទី៨វិញ បានថ្លែងទាំងស្នាមញញឹមថាកម្មវិធីនេះមានអត្ថន័យខ្លាំងណាស់សម្រាប់ពួកខ្ញុំ ជាពិសេសផ្នែកសុខភាពផ្លូវចិត្ត។ កន្លងមកពេលមានសម្ពាធរឿងរៀនសូត្រ ឬរឿងគ្រួសារ ខ្ញុំតែងតែសម្ងំស្ងាត់ៗម្នាក់ឯង។ ប៉ុន្តែថ្ងៃនេះ ខ្ញុំបានរៀនសូត្រពីរបៀបគ្រប់គ្រងអារម្មណ៍ និងការក្លាហានក្នុងការស្វែងរកជំនួយពីឪពុកម្តាយ ឬគ្រូបង្រៀន។ ខ្ញុំសូមថ្លែងអំណរគុណយ៉ាងជ្រាលជ្រៅដល់លោកជំទាវ និងអង្គការដៃគូដែលបានយកចិត្តទុកដាក់ចំពោះសុខទុក្ខរបស់សិស្សានុសិស្សនៅជនបទ។

ការរៀបចំវេទិកាផ្សព្វផ្សាយនាពេលនេះ បានស្តែងឱ្យឃើញយ៉ាងច្បាស់ពីការយកចិត្តទុកដាក់ខ្ពស់របស់អាជ្ញាធរខេត្តបន្ទាយមានជ័យ ក្នុងការលើកកម្ពស់សិទ្ធិ និងកិច្ចការពារកុមារ ព្រមទាំងការកសាងសហគមន៍មួយដែលមានសុវត្ថិភាព និងភាពធន់ទាំងផ្នែករាងកាយ និងស្មារតី៕

ដោយ ឈុន សារ៉ាត