AKP ភ្នំពេញ ថ្ងៃទី២៤ ខែកក្កដា ឆ្នាំ២០២៦ -- ប្រទេសហ្វីលីពីនបានធ្វើជាម្ចាស់ផ្ទះនៃកិច្ចប្រជុំរដ្ឋមន្ត្រីការបរទេសអាស៊ីបូព៌ា (EAS) លើកទី១៦ នៅទីក្រុងម៉ានីល ដែលបានធ្វើឡើងរួមគ្នាជាមួយនឹងកិច្ចប្រជុំរដ្ឋមន្ត្រីការបរទេសអាស៊ានលើកទី៥៩។ រដ្ឋមន្ត្រីការបរទេសហ្វីលីពីន លោកស្រី ថេរ៉េសា ឡាហ្សារ៉ូ បានបើកវេទិកានេះដោយជំរុញឱ្យរដ្ឋជាសមាជិកពង្រឹងការឯកភាពនិងកិច្ចសហប្រតិបត្តិការក្នុងតំបន់ ចំពេលដែលមានអស្ថិរភាពសកលលោកកាន់តែខ្លាំងឡើង ជម្លោះពាណិជ្ជកម្ម និងភាពតានតឹងភូមិសាស្ត្រនយោបាយ។

ដោយបញ្ជាក់ពីគោលការណ៍គ្រឹះនៃកិច្ចប្រជុំកំពូល ស្តីពីសមភាពភាពជាដៃគូ និងការឯកភាពគ្នា លោកស្រី ឡាហ្សារ៉ូ បានលើកឡើងពីបញ្ហារំខានទូទាំងពិភពលោកនាពេលថ្មីៗនេះ។ លោកស្រីបានចង្អុលបង្ហាញពីបញ្ហាប្រឈមនានា ដូចជាការងើបឡើងវិញក្រោយជំងឺរាតត្បាត ជម្លោះក្នុងតំបន់— រួមទាំងវិបត្តិមជ្ឈិមបូព៌ា — សង្គ្រាមពន្ធគយ គ្រោះមហន្តរាយធ្ងន់ធ្ងរទាក់ទងនឹងអាកាសធាតុ និងការកើនឡើងយ៉ាងឆាប់រហ័សនៃបច្ចេកវិទ្យា ជាបញ្ហាសំខាន់ៗដែលត្រូវការការឆ្លើយតបរួម។

លោកស្រី ឡាហ្សារ៉ូ បានសង្កត់ធ្ងន់ថា កិច្ចប្រជុំកំពូល EAS ដើរតួនាទីយ៉ាងសំខាន់ជាវេទិកាបើកចំហ បរិយាបន្ន និងមានតម្លាភាពសម្រាប់កិច្ចសន្ទនាជាយុទ្ធសាស្ត្រ។ ការនាំប្រទេសអាស៊ានទាំង១០ រួមជាមួយដៃគូសន្ទនាសំខាន់ៗចំនួនប្រាំបី ដែលរួមមានទាំងសហរដ្ឋអាមេរិក ចិន រុស្ស៊ីជប៉ុន និងឥណ្ឌាផងនោះ កិច្ចប្រជុំកំពូលនេះមានគោលបំណងលើកកម្ពស់កិច្ចសហប្រតិបត្តិការជាក់ស្តែងដើម្បីរក្សាស្ថិរភាព និងសន្តិសុខសម្រាប់តំបន់មួយដែលតំណាងឱ្យប្រជាជនជិតពាក់កណ្តាលនៃចំនួនប្រជាជនពិភពលោក៕

ដោយ៖ យា ចិន្ដាខន្ដី (ប្រភព៖ AA-AKP)