AKP ភ្នំពេញ ថ្ងៃទី២៤ ខែកក្កដា ឆ្នាំ២០២៦ -- ប្រទេសតួកគីត្រូវបានគេរំពឹងថានឹងពង្រីកកិច្ចសហប្រតិបត្តិការជាមួយអាស៊ាននៅក្នុងវិស័យពាណិជ្ជកម្មទំនាក់ទំនងសេដ្ឋកិច្ច ឧស្សាហកម្មការពារជាតិ និងថាមពល បន្ទាប់ពីបានក្លាយជាដៃគូសន្ទនារបស់ប្លុកនេះ។

យោងតាមទីភ្នាក់ងារសារព័ត៌មានអាណាដូលូ បានឱ្យដឹងថាប្រទេសតួកគីត្រូវបានផ្តល់ឋានៈជាដៃគូសន្ទនានៅក្នុងកិច្ចប្រជុំរដ្ឋមន្ត្រីការបរទេសអាស៊ានលើកទី៥៩ នៅទីក្រុងម៉ានីល រដ្ឋធានីនៃប្រទេសហ្វីលីពីន។

ចលនាដែលត្រូវបានចាត់ទុកថាមានសារៈសំខាន់ខាងនយោបាយ និងការទូតនេះ ត្រូវបានគេរំពឹងថានឹងសម្គាល់នូវជំពូកថ្មីមួយនៅក្នុងទំនាក់ទំនងរបស់ប្រទេសតួកគីជាមួយអាស៊ាន ដែលមានប្រជាជនប្រមាណជិត៧០០លាននាក់ និងសេដ្ឋកិច្ចដែឡមានតម្លៃជាង ៤ពាន់ពាន់លានដុល្លារអាម៉េរិក។

អាស៊ានមានរដ្ឋសមាជិកចំនួន១១ គឺឥណ្ឌូណេស៊ី ហ្វីលីពីន ម៉ាឡេស៊ីសិង្ហបុរី ថៃ វៀតណាម ប្រ៊ុយណេ ឡាវ មីយ៉ាន់ម៉ា កម្ពុជា និងទីម័រឡេស្តេ។

ការនាំចេញរបស់ប្រទេសតួកគីទៅកាន់រដ្ឋជាសមាជិកអាស៊ាន បានកើនឡើង ១៧,១% ពីតម្លៃ ២,៤ពាន់លានដុល្លារអាម៉េរិកនៅក្នុងឆ្នាំ២០២១1 ដល់ ២,៨ពាន់លានដុល្លារអាម៉េរិកនៅក្នុងឆ្នាំ២០២៥។ ការនាំចេញទៅកាន់ប្លុកនេះមានចំនួនសរុប ១,២ពាន់លានដុល្លារអាម៉េរិកក្នុងរយៈពេលប្រាំខែដំបូងនៃឆ្នាំនេះ។

ការនាំចូលពីបណ្តាប្រទេសនៅអាស៊ាន បានកើនឡើង ៥០,៧% ក្នុងអំឡុងពេលដូចគ្នា ដោយកើនឡើងពីតម្លៃ ៨,៨ពាន់លានដុល្លារអាម៉េរិកដល់ ១៣,៣ពាន់លានដុល្លារអាម៉េរិក។ ការនាំចូលបានឈានដល់ប្រហែល៦ពាន់លានដុល្លារអាម៉េរិកក្នុងរយៈពេលពីខែមករាដល់ខែឧសភានៃឆ្នាំនេះ។

ជាលទ្ធផល ទំហំពាណិជ្ជកម្មសរុបរបស់ប្រទេសតួកគីជាមួយតំបន់នេះបានឈានដល់ ១៦,១ពាន់លានដុល្លារអាម៉េរិកនៅក្នុងឆ្នាំ២០២៥៕

ដោយ៖ យា ចិន្ដាខន្ដី (ប្រភព៖ AA-AKP)