AKP ភ្នំពេញ ថ្ងៃទី២៤ ខែកក្កដា ឆ្នាំ២០២៦ -- នាយករដ្ឋមន្ត្រីអ៊ីរ៉ាក់ លោក អាលី អាល់-ហ្សៃឌី បានធ្វើទស្សនកិច្ចផ្លូវការជាលើកដំបូងទៅកាន់ទីក្រុងតេអេរ៉ង់ចាប់តាំងពីលោកឡើងកាន់តំណែងកាលពីខែឧសភាមក ដោយលោកបានដឹកនាំគណៈប្រតិភូរដ្ឋមន្ត្រីកម្រិតខ្ពស់មួយដើម្បីជួបជាមួយប្រធានាធិបតីអ៊ីរ៉ង់ លោក ម៉ាស៊ូដ ប៉េហ្សេសគីអាន់។ មេដឹកនាំទាំងពីរបានសង្កត់ធ្ងន់ទៅលើចំណងមិត្តភាពប្រវត្តិសាស្ត្រ វប្បធម៌ និងសាសនាយ៉ាងជ្រាលជ្រៅរបស់ពួកគេ ដោយដាក់វាជាមូលដ្ឋានគ្រឹះដ៏សំខាន់សម្រាប់ពង្រឹងទំនាក់ទំនងយុទ្ធសាស្ត្ររវាងអ៊ីរ៉ាក់ និងអ៊ីរ៉ង់។

ចំណុចសំខាន់នៃកិច្ចប្រជុំ គឺការពិនិត្យមើលឡើងវិញនូវកិច្ចព្រមព្រៀងទ្វេភាគី ដែលបានចុះហត្ថលេខាពីមុន ជាពិសេសទាក់ទងនឹងសន្តិសុខក្នុងតំបន់។ រដ្ឋមន្ត្រីការបរទេសអ៊ីរ៉ង់ លោក អាបាស់ អារ៉ាកឈី បានកត់សម្គាល់ថា ខណៈដែលការអនុវត្តបានឈានដល់កម្រិតដែលអាចទទួលយកបានវិស័យសំខាន់ៗនៅតែត្រូវការការយកចិត្តទុកដាក់ និងដំណោះស្រាយកាន់តែច្រើន។ លោក អាល់-ហ្សៃឌី ក៏បានចែករំលែកនូវចំណុចសំខាន់ៗ និងចំណាប់អារម្មណ៍ពីដំណើរទស្សនកិច្ចផ្លូវការថ្មីៗនេះរបស់លោកទៅកាន់ទីក្រុងវ៉ាស៊ីនតោនជាមួយមន្ត្រីអ៊ីរ៉ង់ផងដែរ។

ដោយសម្លឹងមើលទៅមុខ ភាគីទាំងពីរបានអំពាវនាវឱ្យពង្រីកកិច្ចសហប្រតិបត្តិការនៅទូទាំងវិស័យពាណិជ្ជកម្ម ថាមពល ការដឹកជញ្ជូន និងនយោបាយ។ ពួកគេបានសង្កត់ធ្ងន់ថា ការពង្រឹងចំណងមិត្តភាពរវាងទីក្រុងបាកដាដ និងទីក្រុងតេអេរ៉ង់ គឺមានសារៈសំខាន់មិនត្រឹមតែសម្រាប់ការជំរុញវិបុលភាពសេដ្ឋកិច្ចនៅក្នុងប្រទេសទាំងពីរប៉ុណ្ណោះទេ ប៉ុន្តែថែមទាំងសម្រាប់ការលើកកម្ពស់ស្ថិរភាព និងសន្តិសុខក្នុងតំបន់ឱ្យកាន់តែទូលំទូលាយផងដែរ៕

ដោយ៖ យា ចិន្ដាខន្ដី (ប្រភព៖ AA-AKP)