AKP ភ្នំពេញ ថ្ងៃទី២៤ ខែកក្កដា ឆ្នាំ២០២៦ -- រដ្ឋមន្ត្រីការបរទេសបារាំងលោក ហ្សង់-ណូអ៊ែល បារ៉ូត បានបញ្ជាក់សារជាថ្មីនូវការគាំទ្ររបស់ប្រទេសបារាំងចំពោះតុលាការឧក្រិដ្ឋកម្មអន្តរជាតិ (ICC) ក្នុងអំឡុងពេលពិភាក្សាជាមួយអនុរដ្ឋអាជ្ញា ICC លោក ម៉ាម៉េ មែនឌីអាយ៉េ នីញ៉ាង។ នេះបើយោងតាមក្រសួងការបរទេសបារាំងបាននិយាយកាលពីពេលថ្មីៗនេះ។

យោងតាមក្រសួង បានឱ្យដឹងថា លោក បារ៉ូត និងលោកស្រី នីញ៉ាងបានពិភាក្សាអំពីសកម្មភាពស៊ើបអង្កេត និងអយ្យការរបស់ការិយាល័យរដ្ឋអាជ្ញា ដែលក្រសួងបានពិពណ៌នាថា «វាមានសារៈសំខាន់ណាស់ក្នុងការប្រយុទ្ធប្រឆាំងនឹងនិទណ្ឌភាពចំពោះឧក្រិដ្ឋកម្មអន្តរជាតិធ្ងន់ធ្ងរបំផុត»។

លោក បារ៉ូត បានបញ្ជាក់សារជាថ្មីនូវការគាំទ្រយ៉ាងពេញទំហឹងរបស់បារាំងចំពោះតុលាការ ICC ដោយហៅវាថា «ជាតុលាការឧក្រិដ្ឋកម្មអន្តរជាតិអចិន្ត្រៃយ៍តែមួយគត់របស់ពិភពលោក ដែលមានបេសកកម្មជាសកល» និង «ជាសសរស្តម្ភនៃប្រព័ន្ធយុត្តិធម៌ព្រហ្មទណ្ឌអន្តរជាតិ»។

លោកក៏បាននិយាយផងដែរថា «ការគំរាមកំហែង ឬវិធានការដាក់ទណ្ឌកម្មគ្រប់ប្រភេទ» ប្រឆាំងនឹងតុលាការ រដ្ឋភាគីរបស់ខ្លួន បុគ្គលិក ឬអង្គការសង្គមស៊ីវិលដែលគាំទ្រការងាររបស់ខ្លួនគឺ «មិនអាចទទួលយកបានទេ»។

លោករដ្ឋមន្ត្រីបានសំដៅទៅលើការអំពាវនាវពីមុនរបស់ប្រទេសបារាំងចំពោះសហរដ្ឋអាមេរិកឱ្យដកទណ្ឌកម្មដែលដាក់ក្រោមបទបញ្ជាប្រតិបត្តិលេខ១៤២០៣ ដែលត្រូវបានចុះហត្ថលេខានៅថ្ងៃទី០៦ ខែកុម្ភៈ ឆ្នាំ២០២៥ដោយបាននិយាយថា វិធានការទាំងនេះបង្កើតជាការវាយប្រហារលើតុលាការ និងរដ្ឋភាគីទាំងអស់នៃលក្ខន្តិកៈទីក្រុងរ៉ូម និងផ្ទុយនឹងគោលការណ៍នៃឯករាជ្យភាពតុលាការ។

លោក បារ៉ូត ក៏បានបញ្ជាក់សារជាថ្មីនូវការប្តេជ្ញាចិត្តរបស់ប្រទេសបារាំងក្នុងការធានាថា តុលាការ ICC និងបុគ្គលិករបស់ខ្លួនអាចបន្តអនុវត្តបេសកកម្មរបស់ពួកគេតាមរបៀបនៃឯករាជ្យ និងមិនលំអៀង»៕

ដោយ៖ យា ចិន្ដាខន្ដី (ប្រភព៖ AA-AKP)