AKP ភ្នំពេញ ថ្ងៃទី២៤ ខែកក្កដា ឆ្នាំ២០២៦ -- នាយសេនាធិការចម្រុះកូរ៉េខាងត្បូង (JCS) បាននិយាយថា មន្ត្រីយោធាកំពូលៗរបស់ប្រទេសកូរ៉េខាងត្បូង និងអូស្ត្រាលី បានជួបពិភាក្សាតាមទូរស័ព្ទ ដើម្បីពិភាក្សាអំពីបរិយាកាសសន្តិសុខនៃតំបន់ឥណ្ឌូ-ប៉ាស៊ីហ្វិក ហើយបានយល់ព្រមពង្រីកកិច្ចសហប្រតិបត្តិការយោធា។

លោកឧត្តមសេនីយ៍ ជីន យ៉ុងស៊ុង (Jin Yong-sung) ប្រធាន JCS បានធ្វើការសន្ទនាតាមទូរស័ព្ទលើកដំបូងជាមួយលោកឧត្តមនាវីឯក ម៉ាក ហាមម៉ុន (Mark Hammond) ក្នុងអំឡុងពេលនោះ ភាគីទាំងពីរបានចែករំលែកការវាយតម្លៃរបស់ពួកគេអំពីបរិយាកាសសន្តិសុខក្នុងតំបន់ រួមទាំងការគំរាមកំហែងនុយក្លេអ៊ែរ និងមីស៊ីលរបស់ប្រទេសកូរ៉េខាងជើង។

លោក ជីន បានថ្លែងអំណរគុណដល់ប្រទេសអូស្ត្រាលីចំពោះការចូលរួមចំណែកជាបន្តបន្ទាប់របស់ខ្លួនក្នុងការធានាសន្តិភាព និងស្ថិរភាពនៅលើឧបទ្វីបកូរ៉េ និងនៅក្នុងតំបន់ឥណ្ឌូ-ប៉ាស៊ីហ្វិក ក្នុងនាមជាប្រទេសដែលចូលរួមក្នុងសង្គ្រាមកូរ៉េឆ្នាំ១៩៥០-៥៣ និងជាដៃគូសន្តិសុខស្នូលសម្រាប់ប្រទេសកូរ៉េខាងត្បូង។

ជាការឆ្លើយតប លោក ហាមម៉ុន បានសន្យាថានឹងពង្រឹងទំនុកចិត្តបន្ថែមទៀតរវាងយោធារបស់ពួកគេ និងពង្រីកការផ្លាស់ប្តូរ និងកិច្ចសហប្រតិបត្តិការយោធាដែលផ្តោតលើអនាគត។

មន្ត្រីទាំងពីរក៏បានយល់ព្រមពង្រីកការផ្លាស់ប្តូរ និងកិច្ចសហប្រតិបត្តិការយោធាបន្ថែមទៀត ក្នុងការទប់ទល់នឹងបរិយាកាសសន្តិសុខដែលកំពុងផ្លាស់ប្តូរ រួមទាំងតាមរយៈសមយុទ្ធរួមគ្នា និងការផ្លាស់ប្តូរមន្ដ្រី៕

ដោយ៖ មូល មិនា (ប្រភព៖ យ៉ុនហាប់)