AKP ភ្នំពេញ ថ្ងៃទី២៤ ខែកក្កដា ឆ្នាំ២០២៦ -- មន្ត្រីជាន់ខ្ពស់ម្នាក់របស់ទីក្រុងសេអ៊ូលបាននិយាយកាលពីថ្ងៃព្រហស្បតិ៍ថា រដ្ឋមន្ត្រីការបរទេសលោក ចូ យុន (Cho Hyun) បានអំពាវនាវឱ្យមានវឌ្ឍនភាពលឿនជាងមុនក្នុងការពិភាក្សាជាមួយរដ្ឋមន្ត្រីការបរទេសសហរដ្ឋអាមេរិក លោក ម៉ាកូ រូប៊ីអូ (Marco Rubio) លើបញ្ហាសន្តិសុខ រួមទាំងកិច្ចខិតខំប្រឹងប្រែងរបស់ទីក្រុងសេអ៊ូលក្នុងការអភិវឌ្ឍនាវាមុជទឹកដើរដោយថាមពលនុយក្លេអ៊ែរ និងធានាសិទ្ធិសម្រាប់ការចម្រាញ់អ៊ុយរ៉ាញ៉ូម និងការកែច្នៃប្រេងឥន្ធនៈដែលបានប្រើប្រាស់ឡើងវិញ។

យោងតាមមន្ត្រីជាន់ខ្ពស់ម្នាក់នៅទីក្រុងសេអ៊ូល បានឱ្យដឹងថា លោកចូ បានបញ្ជូនសារនេះក្នុងអំឡុងពេលកិច្ចពិភាក្សាខ្លីៗជាមួយលោក រូប៊ីអូដែលបានធ្វើឡើងមុន និងក្រោយកិច្ចប្រជុំត្រីភាគីរបស់ពួកគេជាមួយរដ្ឋមន្ត្រីការបរទេសជប៉ុន លោក តូស៊ីមីតស៊ូ ម៉ូតេជី (Toshimitsu Motegi) នៅខាងក្រៅកិច្ចប្រជុំពាក់ព័ន្ធនឹងសមាគមប្រជាជាតិអាស៊ីអាគ្នេយ៍ (អាស៊ាន) នៅទីក្រុងម៉ានីលកាលពីថ្ងៃមុន។

ក្នុងអំឡុងពេលនៃកិច្ចពិភាក្សា លោក ចូ បានគូសបញ្ជាក់ពីវឌ្ឍនភាពថ្មីៗនៃកិច្ចសហប្រតិបត្តិការសេដ្ឋកិច្ចរវាងទីក្រុងសេអ៊ូល និងទីក្រុងវ៉ាស៊ីនតោនរួមទាំងការបើកមជ្ឈមណ្ឌលសហប្រតិបត្តិការសាងសង់កប៉ាល់កូរ៉េ-សហរដ្ឋអាមេរិក នៅទីក្រុងវ៉ាស៊ីនតោននៅសប្តាហ៍នេះ។

ភាគីទាំងពីរបានគ្រោងនឹងធ្វើការពិគ្រោះយោបល់សន្តិសុខជុំមួយទៀតនៅក្នុងខែកក្កដា បន្ទាប់ពីកិច្ចប្រជុំលើកដំបូងរបស់ពួកគេកាលពីខែមុន ប៉ុន្តែកាលវិភាគលម្អិតមិនទាន់ត្រូវបានប្រកាសនៅឡើយទេ ខណៈពេលដែលទីក្រុងវ៉ាស៊ីនតោនផ្តោតលើជម្លោះនៅតំបន់មជ្ឈិមបូព៌ា និងអាទិភាពផ្សេងទៀត។

ការពិគ្រោះយោបល់ រួមជាមួយនឹងការប្តេជ្ញាចិត្តវិនិយោគរបស់ទីក្រុងសេអ៊ូលនៅសហរដ្ឋអាមេរិក និងកិច្ចសហប្រតិបត្តិការសាងសង់កប៉ាល់ទ្វេភាគី គឺជាធាតុសំខាន់ៗដែលបានគូសបញ្ជាក់នៅក្នុងសន្លឹកព័ត៌មានរួមដែលបានអនុម័តបន្ទាប់ពីកិច្ចប្រជុំកំពូលកាលពីឆ្នាំមុនរវាងប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) និងប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ។

មន្ត្រីរូបនោះបាននិយាយថា លោក ចូ ក៏បានជួបជាមួយអនុរដ្ឋមន្ត្រីការបរទេសសហរដ្ឋអាមេរិកទទួលបន្ទុកកិច្ចការនយោបាយ លោកស្រី អាលីសុន ហ៊ូកឺ (Allison Hooker) នៅទីក្រុងម៉ានីល មួយរយៈខ្លីមុនពេលកិច្ចចរចាត្រីភាគី ហើយបានផ្ញើសារស្រដៀងគ្នានេះដែរ។

មន្ត្រីរូបនោះបានបន្ដថា «លោក រូប៊ីអូ និងលោកស្រី ហ៊ូកឺ បានសម្តែងការយោគយល់ចំពោះការកត់សម្គាល់របស់លោក ចូ ហើយបានចែករំលែកទស្សនៈថា ភាគីទាំងពីរគួរតែបន្តការពិគ្រោះយោបល់យ៉ាងជិតស្និទ្ធលើបញ្ហាដែលមិនទាន់សម្រេចបាន»៕

ដោយ៖ មូល មិនា (ប្រភព៖ យ៉ុនហាប់)