AKP ភ្នំពេញ ថ្ងៃទី២៤ ខែកក្កដា ឆ្នាំ២០២៦-- ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភាបានលើកទឹកចិត្តឱ្យស្រ្តី និងយុវជនចូលរួមឈរឈ្មោះជាបេក្ខជនក្រុមប្រឹក្សាឃុំ សង្កាត់ឱ្យបានច្រើន និងស្នើគ្រប់គណបក្សនយោបាយទាំងអស់ពិចារណាដាក់ពួកគាត់នៅលេខរៀងដែលអាចជាប់ឆ្នោតបានសម្រាប់ការបោះឆ្នោតនាពេលខាងមុខ ដោយសង្ឃឹមជាវិជ្ជមានថានឹងមានក្រុមប្រឹក្សាជាស្ត្រីនៅគ្រប់ឃុំ សង្កាត់ទាំងអស់ទូទាំងប្រទេស។

ក្នុងពិធីសំណេះសំណាលជាមួយក្រុមប្រឹក្សាសង្កាត់ទាំង៧ នៃខណ្ឌពោធិ៍សែនជ័យ រាជធានីភ្នំពេញ នារសៀលថ្ងៃទី២៣ ខែកក្កដា ឆ្នាំ២០២៦ ឯកឧត្តមបណ្ឌិត ធន់ វឌ្ឍនា បានកោតសរសើរ និងលើកទឹកចិត្តអាជ្ញាធរ និងប្រជាពលរដ្ឋ រួមគ្នារៀបចំសណ្តាប់ធ្នាប់ផ្លូវ និងសោភ័ណភាពក្នុងខណ្ឌនេះ និងបានជំរុញឱ្យអាជ្ញាធរមូលដ្ឋានឱ្យខិតខំបម្រើសេវាសាធារណៈជូនប្រជាពលរដ្ឋឱ្យបានគាប់ប្រសើរ និងអភិវឌ្ឍមូលដ្ឋានដោយផ្តោតលើការងារអាទិភាពចំនួន៥ រួមមាន សន្តិសុខ សេដ្ឋកិច្ច សង្គម ស្ថាបនា និងសោភ័ណភាព។

ឯកឧត្តមបណ្ឌិតបានស្នើឱ្យអាជ្ញាធរមូលដ្ឋានគ្រប់ជាន់ថ្នាក់ ប្រមើលមើលការងារជាប្រយោជន៍របស់ប្រជាជន និងសហការគ្នាស្វែងរកដំណោះស្រាយលើបញ្ហាប្រឈមនានានៅតាមមូលដ្ឋាន ព្រោះការធ្វើការងាររួមគ្នានឹងជួយឱ្យការងារសម្រេចទៅបានរហ័ស និងមានប្រសិទ្ធភាព។

ឯកឧត្តមបណ្ឌិតបានបង្ហាញជំហគាំទ្រចំពោះការដឹកនាំរបស់រាជរដ្ឋាភិបាល និងប្រសាសន៍ដឹកនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ក្នុងការដោះស្រាយបញ្ហាព្រំដែន កម្ពុជា-ថៃដោយសន្តិវិធីផ្អែកលើនយោបាយការទូត និងច្បាប់អន្តរជាតិ និងប្រឹងប្រែងអភិវឌ្ឍសេដ្ឋកិច្ចដើម្បីជំរុញឱ្យកម្ពុជាសម្រេចបាននូវចក្ខុវិស័យរបស់ខ្លួនឆ្នាំ២០៣០ និង២០៥០៕

ដោយ៖ ចាន់ សុភឿន (ប្រភព៖ ព្រឹទ្ធសភា)