AKP ភ្នំពេញ ថ្ងៃទី២៤ ខែកក្កដា ឆ្នាំ២០២៦--អង្គការទស្សនៈពិភពលោកអន្តរជាតិនៅ​កម្ពុជា (World Vision) បានចូលរួមក្នុងការសម្ពោធជាផ្លូវការនៃកម្មវិធីសិក្សា​ Levela ដែលអាចដំណើរការ​នៅលើ​​ទូរស័ព្ទដៃ និង​គេហទំព័រ សម្រាប់​​ការពង្រឹង​ចំណេះដឹង​​ហិរញ្ញវត្ថុ​ដល់​​សហគមន៍​។ នេះបើយោងតាមការឱ្យដឹងពីអង្គការ World Vision នៅថ្ងៃទី២៣ ខែកក្កដា ឆ្នាំ២០២៦។

កម្មវិធីសិក្សា Levela​ គឺជាកម្មវិធីអប់រំដោយឥតគិតថ្លៃ ដែលរៀបចំប្រធានបទហិរញ្ញវត្ថុដ៏ស្មុគស្មាញឱ្យទៅជាមេរៀនខ្លីៗ និងងាយយល់ ដូចជាការរៀបចំផែនការហិរញ្ញវត្ថុ ការសន្សំ ការគ្រប់គ្រងបំណុល ការធានារ៉ាប់រង និងការបង្ការការបោកប្រាស់។ ទោះបីជាកម្មវិធីនេះត្រូវបានបង្កើតឡើងជាចម្បងសម្រាប់យុវជនដែលទើបចាប់ផ្តើមអាជីពការងារ និងនិស្សិតដែលកំពុងប្រឈមនឹងសម្ពាធនៃជីវភាពរស់នៅក៏ដោយ ក៏ប្រព័ន្ធបច្ចេកវិទ្យានេះក៏មានមុខងារប្រើប្រាស់ដោយមិនបាច់ប្រើអ៊ីនធឺណិត ដែលជាតម្រូវការចាំបាច់ផងដែរ។ ការរចនាប្រកបដោយបរិយាបន្នបែបនេះ គឺដើម្បីធានាថា​ សហគមន៍ កម្មករក្នុងប្រព័ន្ធ និងក្រៅប្រព័ន្ធ​ដែលមានចំណូលទាបនៅតាមតំបន់ដាច់ស្រយាលមិនត្រូវបានទុកចោល ដែលនេះជាការជួយពង្រឹងបណ្តាញសុវត្ថិភាពសេដ្ឋកិច្ចសម្រាប់គ្រួសារទូទាំងប្រទេសប្រកបដោយបរិយាបន្ន។

ក្នុងនាមជាដៃគូអភិវឌ្ឍន៍​ អង្គការ World Vision ប្តេជ្ញាចិត្តចំពោះសុខុមាលភាពរយៈពេលវែងរបស់កុមារ និងគ្រួសារ ហើយយើងមានមោទនភាពចំពោះ​គំនិតផ្តួចផ្តើមប្រកបដោយភាពច្នៃប្រឌិតរបស់វិស័យឯកជន ដែលគាំទ្រដល់​បរិយាបន្នហិរញ្ញវត្ថុ និង​ផ្ដល់​ដំណោះស្រាយលើ​ឌីជីថល៕ 

ដោយ​៖ ណយ នឿន (ប្រភព៖ អង្គការ​ World Vision )