AKP ភ្នំពេញ ថ្ងៃទី២៣ ខែកក្កដា ឆ្នាំ២០២៦ -- សភាឥណ្ឌូណេស៊ី កាលពីពេលថ្មីៗនេះ បានអនុម័តសេចក្តីព្រាងច្បាប់ ស្តីពីការបង្កើតមជ្ឈមណ្ឌលហិរញ្ញវត្ថុអន្តរជាតិឥណ្ឌូណេស៊ី (PFII) ដែលជាចលនាមួយដែលត្រូវបានគេរំពឹងថានឹងទាក់ទាញលំហូរចូលមូលធនបរទេសកាន់តែខ្លាំង និងផ្តល់នូវសន្ទុះថ្មីសម្រាប់កំណើនសេដ្ឋកិច្ចនៅក្នុងប្រទេសសេដ្ឋកិច្ចធំបំផុតរបស់តំបន់អាស៊ីអាគ្នេយ៍មួយនេះ។

យោងតាមរដ្ឋមន្ត្រីក្រសួងហិរញ្ញវត្ថុឥណ្ឌូណេស៊ី លោក ភើបាយ៉ា យូឌី សាដេវ៉ា តាមរយៈការទាក់ទាញការវិនិយោគផ្ទាល់ពីបរទេសប្រកបដោយចីរភាព និងលំហូរចូលផលប័ត្រដែលមានគុណភាពខ្ពស់ សេចក្តីព្រាងច្បាប់នេះមានគោលបំណងពង្រីកសេដ្ឋកិច្ច និងផ្តល់ហិរញ្ញប្បទានរយៈពេលវែង ដែលត្រូវការដើម្បីសម្រេចគោលដៅកំណើនរបស់ប្រទេស។

លោកបានបន្ថែមថា សេដ្ឋកិច្ចធំជាងនេះនឹងផ្តល់ឱ្យឥណ្ឌូណេស៊ីនូវធនធានកាន់តែច្រើនដើម្បីរក្សាការអភិវឌ្ឍជាតិរយៈពេលវែង។

សេចក្តីព្រាងច្បាប់នេះត្រូវបានអនុម័តជាឯកច្ឆ័ន្ទ ដោយបង្កើតក្របខ័ណ្ឌច្បាប់សម្រាប់មជ្ឈមណ្ឌលហិរញ្ញវត្ថុថ្មី និងណែនាំការលើកទឹកចិត្តពន្ធជាច្រើន ដែលត្រូវបានរចនាឡើងដើម្បីបង្កើនភាពទាក់ទាញរបស់ខ្លួនចំពោះវិនិយោគិនអន្តរជាតិ។

សមាជិកសភា លោក ម៉ូហាម៉ាដ ហេកាល់ បាននិយាយថា ច្បាប់នេះក៏ចែងអំពីការបង្កើតស្ថាប័នអាជ្ញាកណ្តាល និងតុលាការឯកទេសដើម្បីដោះស្រាយជម្លោះដែលកើតចេញពីសកម្មភាពនៅក្នុងមជ្ឈមណ្ឌលហិរញ្ញវត្ថុនោះផងដែរ។ អត្ថបទពេញលេញនៃសេចក្តីព្រាងច្បាប់មិនទាន់ត្រូវបានចេញផ្សាយនៅឡើយទេ។

នៅពេលមុននេះ ក្រសួងសម្របសម្រួលកិច្ចការសេដ្ឋកិច្ចឥណ្ឌូណេស៊ីបានស្នើកោះរមណីយដ្ឋានបាលីជាទីតាំងសក្តានុពលមួយសម្រាប់មជ្ឈមណ្ឌលហិរញ្ញវត្ថុអន្តរជាតិ។

ការបង្កើត PFII គឺជាផ្នែកមួយនៃយុទ្ធសាស្ត្ររបស់លោកប្រធានាធិបតីប្រាបូវ៉ូ ស៊ូប៊ីយ៉ាន់តូ ដើម្បីសម្រេចបានកំណើនសេដ្ឋកិច្ច ៨% នៅត្រឹមឆ្នាំ២០២៩ ដែលជំរុញដោយការវិនិយោគសាធារណៈដែលត្រូវបានពង្រីកនិងលំហូរចូលមូលធនអន្តរជាតិកាន់តែរឹងមាំ។ យោងតាមស្ថិតិឥណ្ឌូណេស៊ីបានឱ្យដឹងថា សេដ្ឋកិច្ចរបស់ប្រទេសនេះបានកើនឡើង ៥,៦% ធៀបនឹងឆ្នាំមុននៅក្នុងត្រីមាសទីមួយនៃឆ្នាំ២០២៦៕

ដោយ៖ យា ចិន្ដាខន្ដី (ប្រភព៖ VNA)