AKP តាកែវថ្ងៃទី២៣ ខែកក្កដាឆ្នាំ២០២៦--ដើម្បីបន្តការពារនិងឆ្លើយតបឱ្យបានទាន់ពេលវេលា ចំពោះហានិភ័យនៃជំងឺគ្រុនឈាមជូនប្រជាពលរដ្ឋលោកឃូ ហួត ប្រធានការិយាល័យសុខាភិបាលស្រុកប្រតិបត្តិដូនកែវ និងក្រុមការងារកម្មវិធីគ្រុនឈាម ព្រមទាំងមានការចូលរួមពី លោកប្រធាន អនុប្រធាន និងមន្ត្រីសុខាភិបាលមណ្ឌលសុខភាពលំចង់ និងអជ្ញាធរមូលដ្ឋានឃុំ-ភូមិ បានអញ្ជើញដឹកនាំក្រុមការងារ ចុះអនុវត្តយុទ្ធនាការអប់រំផ្សព្វផ្សាយ ៣០ថ្ងៃដើម្បីបង្ការ ទប់ស្កាត់ និងបង្ក្រាបប្រភពចម្លង ជំងឺគ្រុនឈាមនៅតាមសហគមន៍។

យុទ្ធនាការនេះធ្វើឡើងនៅក្នុងភូមិតាម៉ុងនិងភូមិកន្ទួតឃុំលំចង់ស្រុកសំរោងខេត្ត តាកែវ កាលពីរសៀលថ្ងៃទី២២ខែកក្កដាឆ្នាំ២០២៦។

ថ្លែងផ្ដាំផ្ញើ និងអំពាវនាវក្នុងឱកាសនោះ លោក ឃូ ហួត ប្រធានការិយាល័យសុខាភិបាលស្រុកប្រតិបត្តិដូនកែវ បានគូសបញ្ជាក់ថា សុខភាពនិងអាយុជីវិតរបស់បងប្អូនប្រជាពលរដ្ឋ និងក្មួយៗកុមារ គឺជាអាទិភាពចម្បងបំផុត។ដើម្បីទប់ស្កាត់ជំងឺគ្រុនឈាម ឱ្យមានប្រសិទ្ធ ភាពខ្ពស់និងរឹងមាំ គឺទាមទារចាំបាច់នូវការចូលរួមយ៉ាងសកម្ម ពីបងប្អូនប្រជាពលរដ្ឋគ្រប់ៗរូប តាមរយៈការអនុវត្តប្រចាំថ្ងៃនូវវិធានការ "៣កុំ ៣បំបាត់" ឱ្យបានខ្ជាប់ខ្ជួនបំផុត។

លោកប្រធានការិយាល័យសុខាភិបាលស្រុកប្រតិបត្តិដូនកែវ បានរំលឹកនិងពន្យល់បន្ថែមអំពីវិធានការ "៣កុំ ៣បំបាត់" យ៉ាងលម្អិតដូចខាងក្រោម។វិធានការ"៣កុំ"រួមមាន ១កុំឱ្យមូសខាំ ដោយត្រូវគេងក្នុងមុង និងស្លៀកពាក់ខោអាវដៃវែងជើងវែង។២កុំឱ្យមូសបង្កាត់ពូជ ដោយត្រូវលាងសម្អាតនិងគ្របពាងឬអាងទឹក ឱ្យបានជិតល្អ។៣កុំធ្វេសប្រហែសពេលមានគ្រុនក្តៅ ប្រសិន បើមានអាការៈក្តៅខ្លួនខុសធម្មតា ត្រូវប្រញាប់បញ្ជូនអ្នកជំងឺទៅមណ្ឌលសុ ខភាព ឬមន្ទីរពេទ្យជាបន្ទាន់ ដោយមិនត្រូវទិញថ្នាំលេប ឬព្យួរសេរ៉ូមដោយខ្លួនឯងឡើយ។វិធានការ "៣បំបាត់"រួមមាន ១បំបាត់ទឹកដក់ កម្ទេចចោលនូវសំបកកង់ឡាន កំប៉ុង ឬសំបកដូងដែលដក់ទឹក។២បំបាត់ដង្កូវទឹក ដោយដាក់ថ្នាំអាបែត ឬចិញ្ចឹមត្រីប្រាំពណ៌ក្នុងពាងនិងអាងទឹក។៣បំបាត់ជម្រកមូស ដោយកាប់ឆ្ការព្រៃ និងសម្អាតបរិស្ថានជុំវិញផ្ទះឱ្យស្រឡះល្អ។

លោក ឃូ ហួត បានមានប្រសាសន៍បន្ថែមថា ក្នុងយុទ្ធនាការចុះអប់រំផ្សព្វផ្សាយនេះ ក្រុមការងារកម្មវិធីគ្រុនឈាម បានចុះអប់រំផ្សព្វផ្សាយ ពីវិធីបង្ការ ទប់ស្កាត់ និងបង្ក្រាបប្រភពចម្លង ជំងឺគ្រុនឈាមជូនប្រជាពលរដ្ឋ។ដោយចុះអនុវត្តការបាញ់ថ្នាំសម្លាប់មូស ដាក់ថ្នាំអាបែតក្នុងពាងទឹក អាងទឹក ដើម្បីបង្ការ ការពារ ទប់ស្កាត់ជំងឺ គ្រុនឈាមជូនប្រជាពលរដ្ឋ។ការអនុវត្តយុទ្ធនាការនេះធ្វើឡើងនៅភូមិតាម៉ុងបានចំនួន36គ្រួសារ និងភូមិកន្ទួតបានចំនួន250គ្រួសារ ដែលមានប្រជាពលរដ្ឋចូលរួមចំនួន758នាក់ ភូមិទាំងពីរនេះស្ថិតនៅក្នុងឃុំលំចង់ស្រុកសំរោងខេត្តតាកែវ៕

ដោយ៖ អ៊ុច សៀង