AKP ភ្នំពេញ ថ្ងៃទី២២ ខែកក្កដា ឆ្នាំ២០២៦--ឯកឧត្តមបណ្ឌិត អាន ពេជ្រ ហត្ថដា រដ្ឋលេខាធិការ ក្រសួងធនធានទឹក និងឧតុនិយម ដឹកនាំកិច្ចប្រជុំបើកដំណើរការ (Kick-off Meeting) គម្រោងរៀបចំផែនការមេទឹកបណ្តោះអាសន្ន (Interim National Water Master Plan) ដោយមានការចូលរួមពីតំណាងស្ថានទូតអូស្ត្រាលីប្រចាំព្រះរាជាណាចក្រកម្ពុជា នៅសាលប្រជុំគណៈកម្មាធិការជាតិទន្លេមេគង្គកម្ពុជានាថ្ងៃពុធទី២២ ខែកក្កដា ឆ្នាំ២០២៦នេះ ។

កិច្ចប្រជុំក៏មានគោលបំណងបើកដំណើរការការរៀបចំផែនការមេទឹកបណ្តោះអាសន្ន ព្រមទាំងពិនិត្យ និងផ្តល់យោបល់លើវិសាលភាព វិធីសាស្ត្រអនុវត្ត និងសេចក្តីព្រាងមាតិកានៃផែនការមេទឹក ដើម្បីធានាថាលទ្ធផលដែលទទួលបានមានគុណភាព គ្រប់ជ្រុងជ្រោយ និងអាចអនុវត្តបានជាក់ស្តែង។

សូមជម្រាបថា គម្រោងរៀបចំផែនការមេទឹកបណ្តោះអាសន្ននេះ គឺជាសកម្មភាពសំខាន់មួយក្រោម កម្មវិធីភាពជាដៃគូអូស្ត្រាលី-កម្ពុជាសម្រាប់ភាពធន់នឹងអាកាសធាតុ (ACP4Climate) ដែលទើបត្រូវបានប្រកាសដាក់ឱ្យដំណើរការនាពេលថ្មីៗនេះ។ គម្រោងនេះមានគោលបំណងគាំទ្រដល់រាជរដ្ឋាភិបាលកម្ពុជាក្នុងការពង្រឹងការគ្រប់គ្រង និងការធ្វើផែនការមេទឹក ប្រកបដោយភាពធន់នឹងការប្រែប្រួលអាកាសធាតុ។

ឯកឧត្តមរដ្ឋលេខាធិការ បានថ្លែងថា៖ ផែនការមេទឹកបណ្តោះអាសន្ននេះ នឹងក្លាយជាមូលដ្ឋានដ៏មានតម្លៃសម្រាប់ការរៀបចំផែនការមេទឹកជាតិនាពេលអនាគត ស្របតាមយុទ្ធសាស្ត្របញ្ចកោណ-ដំណាក់កាលទី១ និងចក្ខុវិស័យកម្ពុជាឆ្នាំ២០៥០។ ឯកឧត្តមក៏បានសង្កត់ធ្ងន់លើសារៈសំខាន់នៃការចូលរួម និងកិច្ចសហការយ៉ាងជិតស្និទ្ធពីគ្រប់ភាគីពាក់ព័ន្ធ ដើម្បីធានាថាផែនការមេទឹកដែលនឹងរៀបចំឡើង មានលក្ខណៈគ្រប់ជ្រុងជ្រោយ ផ្អែកលើភស្តុតាងវិទ្យាសាស្ត្រ និងអាចប្រើប្រាស់ជាឯកសារយុទ្ធសាស្ត្រសម្រាប់ការគ្រប់គ្រង និងអភិវឌ្ឍធនធានទឹកប្រកបដោយចីរភាព៕

ដោយ៖ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)