AKP ភ្នំពេញ ថ្ងៃទី២២ ខែកក្កដា ឆ្នាំ២០២៦--ទីក្រុងប៉េកាំង សាធារណរដ្ឋប្រជាមានិតចិន នៅថ្ងៃទី២២ ខែកក្កដា ឆ្នាំ២០២៦នេះ មូលនិធិអភិវឌ្ឍន៍ជំនាញនៃក្រសួងសេដ្ឋកិច្ច និងហិរញ្ញវត្ថុ SDF សហការជាមួយអង្គការអន្តរជាតិខាងការងារ (ILO)និងវិទ្យាស្ថានបច្ចេកទេសឧស្សាហកម្មប៉េកាំង (BITC)បើកវគ្គបណ្ដុះបណ្ដាលជំនាញ«រ៉ូបូតឧស្សាហកម្ម» រយៈពេល ២សប្តាហ៍ (១៩-៣១ កក្កដា ២០២៦) ជូនគ្រូបង្គោលកម្ពុជាចំនួន ២៦នាក់ (ស្ត្រី ៤នាក់) មកពីវិទ្យាស្ថានបណ្តុះបណ្តាលបច្ចេកទេស និងវិជ្ជាជីវៈ (TVET) និងសហគ្រាសឯកជន នៅទីក្រុងប៉េកាំង ប្រទេសចិន។

វគ្គបណ្តុះបណ្តាលនេះរៀបចំឡើងក្រោម «កម្មវិធីភាពជាដៃគូ ILO/China លើការពង្រឹងការអភិវឌ្ឍន៍ជំនាញ» ក្នុងគោលបំណងពង្រឹងសមត្ថភាពដំឡើង កំណត់កម្មវិធី និងដោះស្រាយបញ្ហាបច្ចេកទេសប្រព័ន្ធរ៉ូបូត ដើម្បីយកចំណេះដឹងទាំងនេះទៅបណ្តុះបណ្តាលបន្តជូនសិស្ស-និស្សិត និងកម្មករនិយោជិតនៅកម្ពុជា។

ថ្លែងក្នុងពិធីបើក ឯកឧត្តម គី សុខគីម នាយកប្រតិបត្តិ SDF បានមានប្រសាសន៍ថា «ពិភពលោកកំពុងផ្លាស់ប្តូរយ៉ាងឆាប់រហ័ស ហើយរ៉ូបូតឧស្សាហកម្ម (រ៉ូបូតសម្រាប់ប្រើក្នុងរោងចក្រ និងឧស្សាហកម្ម) បាន និងកំពុងក្លាយជាផ្នែកយ៉ាងសំខាន់នៃបម្រែបម្រួលនេះ។ បច្ចុប្បន្ន រោងចក្រជាច្រើននៅកម្ពុជាបាន និងកំពុងធ្វើទំនើបកម្មផលិតកម្ម ដោយប្រើប្រាស់បច្ចេកវិទ្យាថ្មីៗ ហើយវគ្គបណ្តុះបណ្តាលនេះនឹងចូលរួមយ៉ាងសំខាន់ក្នុងការគាំទ្រដល់ការប្រើប្រាស់បច្ចេកវិទ្យាទំនើបទាំងនេះ ជាពិសេសទាក់ទងនឹងទំនើបកម្ម និងប្រព័ន្ធស្វ័យប្រវត្តិកម្មក្នុងខ្សែច្រវាក់ផលិតកម្ម។ លើសពីនេះ វគ្គបណ្តុះបណ្តាលក៏នឹងផ្តល់បទពិសោធអនុវត្តផ្ទាល់ ដើម្បីឱ្យគ្រូបង្គោលរបស់យើងអាចផ្ទេរចំណេះជំនាញទាំងនេះដល់សិស្ស និងកម្មករនិយោជិតនៅកម្ពុជា»។ឯកឧត្តម នាយក សង្ឃឹមយ៉ាងមុតមាំថា កម្មវិធីនេះមិនត្រឹមតែជួយអភិវឌ្ឍជំនាញប៉ុណ្ណោះទេ តែថែមទាំងជួយពង្រឹងចំណងមិត្តភាពរវាងកម្ពុជា និងចិន ព្រមទាំងបើកទ្វារសម្រាប់កិច្ចសហប្រតិបត្តិការបន្ថែមទៀត នាពេលអនាគត។

ក្នុងបេសកកម្មខាងលើនេះ ក្រុមការងារ SDF ក៏បានចុះធ្វើទស្សនកិច្ចសិក្សានៅមជ្ឈមណ្ឌល Mechatronics World Championship Training Base, ក្រុមហ៊ុន UBTECH Robotics និង HollySys Technology Group, ព្រមទាំងមានជំនួបពិភាក្សាជាមួយអង្គការ ILO ប្រចាំក្រុងប៉េកាំងផងដែរ។ SDF នឹងបន្តវិនិយោគលើការអភិវឌ្ឍន៍ជំនាញដែលឆ្លើយតបតម្រូវការទីផ្សារ ដើម្បីទាក់ទាញឧស្សាហកម្មដែលមានតម្លៃបន្ថែមខ្ពស់ និងបង្កើតការងារប្រាក់ចំណូលខ្ពស់ជូនប្រជាពលរដ្ឋ សំដៅជំរុញសេដ្ឋកិច្ចជាតិឱ្យកាន់តែមានភាពប្រកួតប្រជែង ។

គួរជំរាបជូនផងដែរថា កម្មវិធីនេះ គឺជាកិច្ចសហប្រតិបត្តិការលើកទី៣ហើយ រវាង SDF, ILO និង BITC បន្ទាប់ពីទទួលបានជោគជ័យលើវគ្គបណ្ដុះបណ្ដាលជំនាញថែទាំយានយន្តអគ្គិសនីកម្រិតខ្ពស់ (EV) នាពេលកន្លងមកទាំងនៅប្រទេសចិន និងកម្ពុជា។ តាមរយៈគំនិតផ្តួចផ្តើមនេះ គ្រូបង្គោល TVET នឹងជួយផ្ទេរចំណេះដឹងបន្តជូនសិស្ស-និស្សិតយ៉ាងហោចណាស់ ១ ០០០នាក់ ត្រឹមឆ្នាំ២០២៩ ហើយគ្រូបង្គោលបច្ចេកទេសវិញ នឹងចែករំលែកចំណេះដឹងបន្តជូនក្រុមការងារក្នុងសហគ្រាស និងគាំទ្រការចុះកម្មសិក្សារបស់សិស្ស-និស្សិត ។

គិតមកទល់ពេលនេះ មានគ្រូបង្គោលដែលទទួលបានការគាំទ្រពី SDF និង ILO សរុបចំនួន ៥៦រូបហើយ ដែលទទួលបានការអភិវឌ្ឍន៍ជំនាញដែលមានតម្រូវការទីផ្សារខ្ពស់ ដោយក្នុងនោះមាន ជំនាញ EV ៣០រូប និង រ៉ូបូតឧស្សាហកម្ម ២៦រូប ៕

ដោយ ណយ នឿន (ប្រភព៖SDF)