AKP ភ្នំពេញ ថ្ងៃទី២២ ខែកក្កដា ឆ្នាំ២០២៦-- ក្រុមការងារសកម្មភាពពិការភាពនៃក្រសួងកិច្ចការនារី បានរៀបចំសិក្ខាសាលាស្តីពី «ការលើកកម្ពស់ការគាំទ្រពីដៃគូពាក់ព័ន្ធ ក្នុងការលុបបំបាត់រាល់ទម្រង់នៃការរើសអើងចំពោះស្ត្រីដែលមានពិការភាព» រយៈពេល ២ថ្ងៃ ចាប់ពីថ្ងៃទី២០ ដល់ថ្ងៃទី២១ ខែកក្កដា ឆ្នាំ២០២៦ នៅសណ្ឋាគារកាំបូឌីយ៉ាណា។

សិក្ខាសាលានេះ បានប្រព្រឹត្តទៅក្រោមអធិបតីភាព លោកជំទាវ ញ៉េម មរកត រដ្ឋលេខាធិការក្រសួងកិច្ចការនារី ដោយមានសមាសភាពចូលរួមសរុបចំនួន ១៥៧នាក់ (ស្រ្តី ១១០នាក់) ដែលជាថ្នាក់ដឹកនាំ មន្ត្រីរាជការមកពីក្រសួង-ស្ថាប័នពាក់ព័ន្ធ តំណាងមន្ទីរកិច្ចការនារីរាជធានី-ខេត្ត ដៃគូអភិវឌ្ឍន៍ អង្គការសង្គមស៊ីវិល និងវិស័យឯកជន។

បើតាមក្រសួងកិច្ចការនារី កម្មវិធីនេះធ្វើឡើងក្នុងគោលបំណងសំខាន់ៗរួមមាន៖
• លើកកម្ពស់ការយល់ដឹង៖ ធ្វើបច្ចុប្បន្នភាពអំពីស្ថានភាពពិតប្រាកដរបស់ស្ត្រី និងក្មេងស្រីមានពិការភាព ទាំងក្នុងក្របខណ្ឌជាតិ និងអន្តរជាតិ។
• ចែករំលែកបទពិសោធន៍៖ ឆ្លុះបញ្ចាំងពីការអនុវត្តល្អៗ និងកិច្ចខិតខំប្រឹងប្រែងគាំទ្រពីសំណាក់ក្រសួង ស្ថាប័ន និងដៃគូពាក់ព័ន្ធ ក្នុងការការពារ និងលើកកម្ពស់សិទ្ធិស្ត្រី និងក្មេងស្រីមានពិការភាព។
• កំណត់វិធានការច្បាស់លាស់៖ ដាក់ចេញនូវទិសដៅ និងកម្មវិធីសកម្មភាពជាក់ស្តែង ដើម្បីបង្កើនកិច្ចគាំពារ និងលុបបំបាត់ការរើសអើងគ្រប់ទម្រង់នាពេលអនាគត។

តាមរយៈសិក្ខាសាលានេះ រាជរដ្ឋាភិបាលកម្ពុជា តាមរយៈក្រសួងកិច្ចការនារីបានសម្តែងនូវការប្តេជ្ញាចិត្តយ៉ាងមុតមាំក្នុងការបន្តកិច្ចសហការជិតស្និទ្ធជាមួយគ្រប់ភាគីពាក់ព័ន្ធ ទាំងវិស័យរដ្ឋ សង្គមស៊ីវិល និងវិស័យឯកជន ដើម្បីបង្កើតបរិយាកាសមួយដែលគ្មានការរើសអើង និងផ្តល់ឱកាសស្មើៗគ្នាដល់ស្ត្រី និងក្មេងស្រីមានពិការភាព៕

ដោយ ទូច វលក័្ខណ (ប្រភព៖ក្រសួងកិច្ចការនារី)