AKP សៀមរាប ២២ ខែកក្កដា ឆ្នាំ២០២៦--រយៈពេល ៣ថ្ងៃគឺចាប់ពីថ្ងៃទី២០-២២ ខែកក្កដា ឆ្នាំ២០២៦ ក្រុមគ្រូពេទ្យស្ម័គ្រចិត្តនៃមន្ទីរពេទ្យ Mackay តៃវ៉ាន់ តាមរយៈអង្គការក្លិប Rotary Angkor បានបន្តចុះពិនិត្យ និងព្យាបាលជំងឺទូទៅដោយឥតគិតថ្លៃជូនប្រជាពលរដ្ឋក្នុងឃុំចាន់សរ ស្រុកសូទ្រនិគម ឃុំរើល ស្រុកពួក និងឃុំរោងគោ ស្រុកក្រឡាញ់ ខេត្តសៀមរាប ដើម្បីជួយសម្រួលដល់ប្រជាពលរដ្ឋដែលខ្វះខាត រួមនឹងបានផ្ដល់អំណោយជាគ្រឿងឧបភោគបរិភោគ និងសម្ភារប្រើប្រាស់មួយចំនួនផងដែរ។

លោកវេជ្ជបណ្ឌិត ឆៃ វៃទើ ជាគ្រូពេទ្យស្ម័គ្រចិត្តនៃមន្ទីរពេទ្យ Mackay បានឱ្យដឹងថា មានអាយុកាល ១៥០ឆ្នាំហើយ មន្ទីរពេទ្យ Mackay បានចុះធ្វើការពិនិត្យ និងព្យាបាលជំងឺជូនប្រជាជននៅតាមបណ្ដាប្រទេសនានាលើពិភពលោក ក្នុងទឹកចិត្តស្រឡាញ់ រួមគ្នាពិនិត្យសុខភាពដោយឥតគិតថ្លៃ។ ជាក់ស្ដែងក្នុងរយៈពេល៣ថ្ងៃ នៅលើទឹកដីនៃខេត្តសៀមរាបនេះ ក្រុមគ្រូពេទ្យស្ម័គ្រចិត្តនៃមន្ទីរពេទ្យ Mackay តៃវ៉ាន់ និងធនាគារ UCB បានដឹកនាំគ្រូពេទ្យចំណានៗ ចុះមកពិនិត្យព្យាបាលជំងឺជូនដល់បងប្អូនប្រជាពលរដ្ឋបានប្រមាណជាង ១ ០០០នាក់ ព្រមទាំងបានផ្ដល់អំណោយជាគ្រឿងឧបភោគបរិភោគ សម្ភារប្រើប្រាស់ និងថវិកាមួយចំនួន ដល់បងប្អូនប្រជាពលរដ្ឋក្រីក្រចំនួន ៣០០គ្រួសារផងដែរ។

លោកវេជ្ជបណ្ឌិត បានឱ្យដឹងទៀតថា ក្នុងការងារសប្បុរសធម៌នេះ មន្ទីរពេទ្យ Mackay តៃវ៉ាន់ និង ធនាគារ UCB ក៏ដូចជាអង្គការក្លិប Rotary Angkor នឹងបន្តចូលរួមក្នុងការដោះស្រាយនូវទុក្ខលំបាករបស់ប្រជាពលរដ្ឋជាមួយរាជរដ្ឋាភិបាលកម្ពុជា នៅតាមបណ្ដាក្រុងស្រុកផ្សេងៗទៀត ក្នុងខេត្តសៀមរាប។

រដ្ឋបាលស្រុកទាំង៣ ខាងលើ បានថ្លែងអំណរគុណដល់ក្រុមគ្រូពេទ្យ នៃមន្ទីរពេទ្យ Mackay តៃវ៉ាន់ និងធនាគារ UCB រួមនឹងអង្គការក្លិប Rotary Angkor ដែលបានសហការចុះពិនិត្យព្យាបាលជំងឺជូនបងប្អូនប្រជាពលរដ្ឋដោយឥតគិតថ្លៃ និងផ្ដល់គ្រឿងឧបភោគបរិភោគដល់ប្រជាពលរដ្ឋក្រីក្រថែមទៀតផង៕

ដោយ ឃុត សៅ