AKP បន្ទាយមានជ័យ ថ្ងៃទី២២ ខែកក្កដា ឆ្នាំ២០២៦--ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ អមដំណើរដោយក្រុមការងារថ្នាក់ខេត្ត ស្រុកថ្មពួក និងអាជ្ញាធរឃុំគំរូ នៅថ្ងៃទី២២ ខែកក្កដា ឆ្នាំ២០២៦បានអញ្ជើញចុះសួរសុខទុក្ខដោយផ្ទាល់ និងនាំយកសម្ភារ គ្រឿងឧបភោគបរិភោគ រួមទាំងថវិកាឧបត្ថម្ភ ទៅប្រគល់ជូនវីរកងទ័ពកម្ពុជាចំនួន ៣រូប ដែលបានរងរបួសក្នុងបេសកកម្មបម្រើជាតិ មាតុភូមិ។ពិធីចុះសួរសុខទុក្ខនេះ ត្រូវបានធ្វើឡើងដល់ខ្នងផ្ទះរបស់វីរកងទ័ព ស្ថិតនៅក្នុងភូមិព្រៃវែង និងភូមិតាយឹង ឃុំគំរូ ស្រុកថ្មពួក ខេត្តបន្ទាយមានជ័យ។

គួរបញ្ជាក់ផងដែរថា វីរកងទ័ពទាំង ៣រូប បានរងរបួសដោយសារការផ្ទុះគ្រាប់បែកមួយគ្រាប់ កាលពីថ្ងៃទី៥ ខែកក្កដា ឆ្នាំ២០២៦ កន្លងទៅ នៅអំឡុងពេលកំពុងបំពេញភារកិច្ចដើរល្បាតការពារសន្តិសុខ ក្នុងភូមិសាស្ត្រចូកគ្រួស ស្រុកបន្ទាយអំពិល ខេត្តឧត្តរមានជ័យ។
ក្នុងឱកាសដ៏មានអត្ថន័យនោះ ឯកឧត្តម អ៊ុ រាត្រីបានពាំនាំនូវប្រសាសន៍ផ្តាំផ្ញើសួរសុខទុក្ខ ប្រកបដោយក្តីនឹករលឹក និងការយកចិត្តទុកដាក់ជាវាទីបំផុតពីសំណាក់ថ្នាក់ដឹកនាំកំពូលៗនៃ ព្រឹទ្ធសភា រដ្ឋសភា និងរាជរដ្ឋាភិបាលកម្ពុជា ជូនចំពោះវីរកងទ័ព និងគ្រួសារ។

បន្ថែមពីនេះ ឯកឧត្តមអភិបាលខេត្ត បានថ្លែងគូសបញ្ជាក់ប្រកបដោយក្តីរំភើប និងកោតសរសើរយ៉ាងជ្រាលជ្រៅថា«ស្មារតីអង់អាចក្លាហាន ការលះបង់សាច់ឈាម និងការបូជាកម្លាំងកាយចិត្តរបស់វីរកងទ័ពយើង ក្នុងបុព្វហេតុការពារបូរណភាពទឹកដី និងសុខសុវត្ថិភាពជូនប្រជាពលរដ្ឋ គឺជាសកម្មភាពប្រកបដោយកិត្តិយស និងជាគំរូវីរភាពដ៏ឧត្តុង្គឧត្តម មិនអាចកាត់ថ្លៃបានឡើយ»។

ជាមួយគ្នានោះដែរ ឯកឧត្តមបានបួងសួង និងជូនពរយ៉ាងមុតមាំដល់វីរកងទ័ពទាំង ៣រូប សូមឱ្យឆាប់បានជាសះស្បើយពីរបួស ដើម្បីត្រឡប់មកមានសុខភាពល្អបរិបូរណ៍ និងបន្តរស់នៅជាមួយគ្រួសារប្រកបដោយស្នាមញញឹម។

ដើម្បីជាការសម្រាលបន្ទុកជីវភាព និងលើកទឹកចិត្តដល់វីរកងទ័ព ឯកឧត្តម និងក្រុមការងារបាននាំយកអំណោយរួមមាន អង្ករ គ្រឿងឧបភោគបរិភោគចាំបាច់ និងថវិកាមួយចំនួន ចែកជូនដល់ដៃវីរកងទ័ពទាំង ៣រូប ដោយផ្ទាល់ ក្នុងបរិយាកាសស្និទ្ធស្នាល និងពេញដោយក្តីក្តុកក្តួល និងកក់ក្តៅជាទីបំផុត។

ការយកចិត្តទុកដាក់របស់ថ្នាក់ដឹកនាំនៅពេលនេះ បានឆ្លុះបញ្ចាំងយ៉ាងច្បាស់ថា «រាជរដ្ឋាភិបាល និងអាជ្ញាធរគ្រប់លំដាប់ថ្នាក់ មិនដែលបោះបង់ ឬបំភ្លេចចោលនូវរាល់ការលះបង់របស់វីរយុទ្ធជនកម្ពុជានោះឡើយ»៕

ដោយ ឈុន សារ៉ាត