AKP ភ្នំពេញ ថ្ងៃទី២២ ខែកក្កដា ឆ្នាំ២០២៦--ឯកឧត្តម ស៊ិន វិសិទ្ធ អនុរដ្ឋលេខាធិការ ក្រសួងធនធានទឹក និងឧតុនិយមនាថ្ងៃអង្គារទី២១ ខែកក្កដា ឆ្នាំ២០២៦ បានអញ្ជើញចុះអន្តរាគមន៍ បញ្ជូនទឹកពីស្ទឹងមង្គលបូរីចូលក្នុងអាងកំពីងពួយ ដើម្បីជួយសង្គ្រោះផ្ទៃដីកសិកម្មដំណាំស្រូវរបស់ប្រជាកសិករចំនួន ១៥ ៥២៣ហិកតា ដែលកំពុងជួបប្រទះគ្រោះរាំងស្ងួត ស្ថិតក្នុងស្រុកបាណន់ ស្រុកថ្មគោល និងក្រុងបាត់ដំបង ខេត្តបាត់ដំបង។

ឯកឧត្តមអនុរដ្ឋលេខាធិការបានមានប្រសាសន៍ថា ជាដំណោះស្រាយចំពោះមុខ ក្រុមការងារជំនាញរបស់មន្ទីរ បានដាក់ចេញនូវវិធានការអន្តរាគមន៍បន្ទាន់ចំនួនបីសំខាន់ៗ រួមមាន៖
ទី១៖ កាយទំនប់ស្ទាក់ក្នុងប្រឡាយអូរដូនពៅ ដែលកំពុងស្ថិតក្នុងការសាងសង់ស្ពានឆ្លងកាត់មួយកន្លែង។
ទី២៖ បើកទ្វារទឹកក្បាលប្រឡាយអូរដូនពៅ ដើម្បីបញ្ជូនចរន្តទឹកឱ្យហូរចូលទៅក្នុងអាងកំពីងពួយ។
ទី៣៖ ចុះពិនិត្យដោយផ្ទាល់ដល់ទីតាំងក្នុងប្រព័ន្ធធារាសាស្ត្រអាងកំពីងពួយ ដែលរងផលប៉ះពាល់។

បើយោងតាមរបាយការណ៍របស់មន្ទីរធនធានទឹក និងឧតុនិយមខេត្តបាត់ដំបង ផែនការប្រព័ន្ធស្រោចស្រពអាងកំពីងពួយលើផ្ទៃដីសរុប ១៨ ៦៥៣ហិកតា ក្នុងនោះការអនុវត្តជាក់ស្តែងសម្រេចបានចំនួន ១៦ ៩៣៣ហិកតា។ កន្លងមក ក្រុមការងារបច្ចេកទេសរបស់មន្ទីរបានអន្តរាគមន៍សង្គ្រោះដំណាំស្រូវដែលខ្វះទឹកក្នុងប្រព័ន្ធអាងកំពីងពួយបានចំនួន ១ ៦១០ហិកតារួចមកហើយ ព្រមទាំងបន្តចុះជួយសង្គ្រោះ និងបញ្ជូនទឹកបញ្ចូលលើផ្ទៃដីដំណាំស្រូវដែលកំពុង ខ្វះខាតទឹកក្នុងស្រុកចំនួនពីរ និងក្រុងមួយ ជាបន្តបន្ទាប់ ស្របតាមលទ្ធភាពជាក់ស្តែងនៃប្រភពទឹកស្ទឹងមង្គលបូរី៕

ដោយ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)