AKP ភ្នំពេញ ថ្ងៃទី២១ ខែកក្កដា ឆ្នាំ២០២៦

ក្រសួងព័ត៌មាន និងក្រសួងប្រៃសណីយ៍ និងទូរគមនាគមន៍ កំពុងជំរុញការកំណត់តួនាទី និងសមត្ថកិច្ចរបស់ក្រសួងទាំងពីរ ឱ្យមានភាពច្បាស់លាស់លើការគ្រប់គ្រងវិស័យផ្សព្វផ្សាយ ទូរគមនាគមន៍ និងប្រេកង់វិទ្យុ តាម រយៈសេចក្តីព្រាងប្រកាសអន្តរក្រសួងមួយ ដែលមានគោលបំណងពង្រឹងកិច្ចសហការរវាងស្ថាប័ន និងបង្កើនប្រសិទ្ធភាពនៃការគ្រប់គ្រង និងការត្រួតពិនិត្យតាមបទប្បញ្ញត្តិ។

ក្នុងកិច្ចប្រជុំ និងពិភាក្សាលើសេចក្តីព្រាងប្រកាសអន្តរក្រសួងរវាងក្រសួងព័ត៌មាន និងក្រសួងប្រៃសណីយ៍ និងទូរគមនាគមន៍ នារសៀលថ្ងៃទី២១ ខែកក្កដា ឆ្នាំ២០២៦ នៅទីស្ដីការក្រសួងព័ត៌មាន។

កិច្ចប្រជុំនេះ ធ្វើឡើងបន្ទាប់ពីក្រសួងទាំងពីរបានឯកភាពគ្នាកាលពីថ្ងៃទី២៥ ខែមីនា ឆ្នាំ២០២៦ លើគោលការណ៍សំខាន់ៗចំនួន ៤ ដើម្បីពង្រឹងកិច្ចសហប្រតិបត្តិការ និងកំណត់ឱ្យបានច្បាស់នូវតួនាទី និងសមត្ថកិច្ចរៀងៗខ្លួន។ កិច្ចប្រជុំនេះ ក៏បានពិនិត្យលើសេចក្តីព្រាងប្រកាសអន្តរក្រសួងចំនួន ២ រួមមាន៖ ទី១. ប្រកាសអន្តរក្រសួងស្តីពីការគ្រប់គ្រង និងការកំណត់ស្តង់ ដាបច្ចេកទេសនៃការប្រើប្រាស់ សម្ភារៈ បរិក្ខារ និងឧបករណ៍ បម្រើឱ្យវិស័យព័ត៌មាន និងសោតទស្សន៍ និងវិស័យ ទូរគមនាគមន៍។ ២. ប្រកាសអន្តរក្រសួងស្តីពីការបែងចែកបន្ទារប្រេកង់វិទ្យុ សម្រាប់ប្រព័ន្ធផ្សព្វផ្សាយ សោតទស្សន៍ និងការកំណត់ស្តង់ដារបច្ចេកទេសស្តីពីការប្រើប្រាស់បន្ទារប្រេកង់វិទ្យុ។

ជាមួយគ្នានេះ កិច្ចប្រជុំពិភាក្សានេះដែរ បានផ្តោតលើការផ្តល់យោបល់ និងពិនិត្យខ្លឹមសារ លម្អិតនៃសេចក្តីព្រាងប្រកាសទាំងពីរ ដើម្បីធានាថា បទប្បញ្ញត្តិ ដែលនឹងដាក់ឱ្យអនុវត្តមានភាពគ្រប់ជ្រុងជ្រោយ អាចឆ្លើយតបទៅនឹងការអភិវឌ្ឍវិស័យព័ត៌មាន សោតទស្សន៍ និង ទូរគមនាគមន៍ ព្រមទាំងគាំទ្រដល់ការពង្រឹងប្រសិទ្ធភាពនៃ ការគ្រប់គ្រង និងការផ្តល់សេវាសាធារណៈក្នុងវិស័យទាំងនេះ។

យោងតាមសេចក្តីព្រាងប្រកាសអន្តរក្រសួង ក្រសួងព័ត៌មាន នឹងបន្តទទួលខុសត្រូវលើការរៀបចំគោលនយោបាយ និងយុទ្ធសាស្ត្រអភិវឌ្ឍន៍វិស័យព័ត៌មាន និងសោតទស្សន៍ ព្រមទាំងគ្រប់គ្រង និងត្រួតពិនិត្យប្រព័ន្ធផ្សព្វផ្សាយសាធារណៈ និងឯកជននៅទូទាំងប្រទេស។ ក្រសួងព័ត៌មាន ក៏មានភារកិច្ចគ្រប់គ្រងប្រេកង់វិទ្យុដែលត្រូវបានបម្រុងទុកសម្រាប់សេវាផ្សព្វផ្សាយ កំណត់ស្តង់ដារបច្ចេកទេសនៃការប្រើប្រាស់ប្រេកង់ ដោយសហការជាមួយស្ថាប័នពាក់ព័ន្ធ ព្រមទាំងផ្តល់ ផ្អាក ឬដកហូតអាជ្ញាបណ្ណពាក់ព័ន្ធនឹងវិស័យព័ត៌មាន និងការផ្សព្វផ្សាយ។

លើសពីនេះ ក្រសួងព័ត៌មាន នឹងគ្រប់គ្រងការប្រើប្រាស់ប្រព័ន្ធបញ្ជូនសញ្ញាផ្សព្វផ្សាយ បង្គោលអង់តែន និងកម្រិតថាមពលបញ្ជូនសញ្ញា ព្រមទាំងធ្វើបច្ចុប្បន្នភាព និងបែងចែកឡើងវិញនូវប្រេកង់សម្រាប់ការផ្សព្វផ្សាយ ស្របតាមការវិវត្តនៃបច្ចេកវិទ្យា តម្រូវការអភិវឌ្ឍន៍សេដ្ឋកិច្ច-សង្គម និងស្តង់ដាររបស់សហភាពទូរគមនាគមន៍អន្តរជាតិ (ITU)។ ដោយឡែក ក្រសួងប្រៃសណីយ៍ និងទូរគមនាគមន៍ នឹងបន្តទទួលខុសត្រូវលើការរៀបចំគោលនយោបាយជាតិ វិស័យទូរគមនាគមន៍ ការអភិវឌ្ឍហេដ្ឋារចនាសម្ព័ន្ធ និងបណ្តាញទូរគមនាគមន៍។

ភារកិច្ចរបស់ក្រសួងនេះ រួមមាន ការគ្រប់គ្រងធនធានប្រេកង់វិទ្យុជាតិ ប្រេកង់ផ្កាយរណប និងទីតាំងគន្លងគោចរផ្កាយរណប ការសម្របសម្រួលកិច្ចការគ្រប់គ្រងប្រេកង់ជាមួយអន្តរជាតិ និងការចុះបញ្ជីប្រេកង់វិទ្យុរបស់ព្រះរាជាណាចក្រកម្ពុជា ក្នុងបញ្ជីអន្តរជាតិគោលប្រេកង់វិទ្យុ។ ក្រសួងប្រៃសណីយ៍ និងទូរគមនាគមន៍ ក៏នឹងសហការជាមួយស្ថាប័នរដ្ឋ និងវិស័យឯកជន ក្នុងការបែងចែក និងរៀបចំបែងចែកឡើងវិញនូវធនធានប្រេកង់វិទ្យុ ឱ្យស្របតាមការវិវត្តនៃបច្ចេកវិទ្យា និងស្តង់ដារអន្តរជាតិ។

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានបានថ្លែងថា សេចក្តីព្រាងប្រកាសអន្តរក្រសួងនេះ មានគោលបំណងធ្វើឱ្យកិច្ចព្រមព្រៀងរវាងក្រសួងទាំងពីរ ក្លាយជាលិខិតបទដ្ឋានផ្លូវការ និងពង្រឹងការសម្របសម្រួលក្នុងការអនុវត្តតួនាទី និងសមត្ថកិច្ចរបស់ក្រសួងនីមួយៗឱ្យកាន់តែមានប្រសិទ្ធភាព។ ឯកឧត្តមរដ្ឋមន្ត្រីបានលើកឡើងថា តាមក្របខ័ណ្ឌដែលបានឯកភាពគ្នា ក្រសួងព័ត៌មាន នឹងទទួលខុសត្រូវលើកិច្ចការពាក់ព័ន្ធនឹងវិស័យព័ត៌មាន និងការផ្សព្វផ្សាយ ខណៈក្រសួងប្រៃសណីយ៍ និងទូរគមនាគមន៍ នឹងទទួលខុសត្រូវលើវិស័យទូរគមនាគមន៍ និងកិច្ចការផ្សេងៗដែលស្ថិតក្រោមសមត្ថកិច្ចស្របច្បាប់របស់ខ្លួន។

ឯកឧត្តមរដ្ឋមន្ត្រី ក៏បានណែនាំឱ្យក្រុមការងារពាក់ព័ន្ធពិនិត្យ ខ្លឹមសារសេចក្តីព្រាងប្រកាសអន្តរក្រសួងឱ្យបាន គ្រប់ជ្រុងជ្រោយ ដោយផ្តោតលើភាពច្បាស់លាស់ ភាពអាចអនុវត្តន៍បាន និងស្របតាមការវិវត្តនៃបច្ចេកវិទ្យាឌីជីថល ព្រមទាំងឆ្លើយតបទៅនឹងតម្រូវការជាក់ស្តែងនៃការអភិវឌ្ឍ វិស័យព័ត៌មាន និងទូរគមនាគមន៍។ ឯកឧត្តមរដ្ឋមន្ត្រីក្រសួងព័ត៌មានបានបន្ថែមថា បន្ទាប់ពីពិនិត្យ និងកែលម្អរួច សេចក្តីព្រាងប្រកាសអន្តរក្រសួង ដែលផ្តួចផ្តើមរៀបចំដោយក្រសួងព័ត៌មាន នឹងត្រូវបញ្ជូនទៅក្រសួងប្រៃសណីយ៍ និងទូរគមនាគមន៍ ដើម្បីពិនិត្យរួម មុននឹងចុះហត្ថលេខាប្រកាសដាក់ឱ្យអនុវត្តន៍រួមគ្នា៕

ដោយ៖ រិទ្ធី, រូបថត៖ ខឹម សុវណ្ណារ៉ា