AKP ស្ទឹងត្រែង ថ្ងៃទី២១ ខែកក្កដា ឆ្នាំ២០២៦-- រដ្ឋបាលខេត្តស្ទឹងត្រែងរៀបចំកិច្ចប្រជុំពិភាក្សា និងសម្របសម្រួលការបំពេញស្ថិតិកង់បី ឬរ៉ឺម៉កដឹកអ្នកដំណើរ ដែលបានចុះឈ្មោះ និងមិនទាន់បានចុះឈ្មោះក្នុងប្រព័ន្ធសេដ្ឋកិច្ចក្រៅប្រព័ន្ធ តាមបណ្តាក្រុង-ស្រុកទូទាំងខេត្ត។ កិច្ចប្រជុំនេះបានប្រព្រឹត្តទៅក្រោមវត្តមានលោក ព្រំ វណ្ណៈ អភិបាលរងខេត្ត តំណាងឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង កាលពីថ្ងៃទី២០ ខែកក្កដា ឆ្នាំ២០២៦ ដោយមានការអញ្ជើញចូលរួមពីថ្នាក់ដឹកនាំមន្ទីរអង្គភាពដែលពាក់ព័ន្ធ តំណាងរដ្ឋបាលក្រុង ស្រុកទាំង៦ និងភាគីពាក់ព័ន្ធជាច្រើនរូបទៀត។

 យុទ្ធនាការបំពេញស្ថិតិនេះធ្វើឡើងក្នុងគោលបំណងប្រមូលទិន្នន័យឱ្យបានច្បាស់លាស់ និងគ្រប់ជ្រុងជ្រោយ ដើម្បីគាំទ្រដល់ការអនុវត្តអន្តរាគមន៍គាំពារសង្គម របស់រាជរដ្ឋាភិបាល ជូនដល់បងប្អូនអ្នកប្រកបរបររត់កង់បី និងរ៉ឺម៉កដឹកអ្នកដំណើរ ដែលកំពុងរងផលប៉ះពាល់ដោយសារសម្ពាធនៃការកើនឡើងថ្លៃប្រេងឥន្ធនៈ នាពេលបច្ចុប្បន្ន។

 ក្នុងឱកាសនោះ លោក ព្រំ វណ្ណៈ អភិបាលរងខេត្ត បានមានប្រសាសន៍ណែនាំ និងផ្ដាំផ្ញើទៅក្នុងអង្គប្រជុំថា ការប្រមូលទិន្នន័យ និងស្ថិតិកង់បី ឬរ៉ឺម៉កដឹកអ្នកដំណើរ ទាំងនៅក្នុង និងក្រៅប្រព័ន្ធសេដ្ឋកិច្ច គឺជារឿងចាំបាច់បំផុតនាពេលនេះ។ ទិន្នន័យដែលច្បាស់លាស់ នឹងជួយឱ្យរាជរដ្ឋាភិបាល អាចដាក់ចេញនូវវិធានការអន្តរាគមន៍ និងការឧបត្ថម្ភគាំពារសង្គម បានចំគោលដៅ ត្រឹមត្រូវ និងទាន់ពេលវេលា ដើម្បីជួយសម្រាលបន្ទុកជីវភាពរបស់បងប្អូនអ្នកប្រកបរបរនេះ ដែលកំពុងប្រឈមនឹងការឡើងថ្លៃនៃប្រេងឥន្ធនៈ។
 

លោកអភិបាលរងខេត្តស្នើឱ្យរដ្ឋបាលក្រុង ស្រុកទាំង៦ មន្ទីរអង្គភាពពាក់ព័ន្ធ និងអាជ្ញាធរមូលដ្ឋាន ត្រូវបង្កើនកិច្ចសហការឱ្យបានជិតស្និទ្ធ ហ្មត់ចត់ និងពន្លឿនការងារបំពេញស្ថិតិនេះឱ្យបានគ្រប់ជ្រុងជ្រោយ ដោយមិនត្រូវឱ្យចន្លោះប្រហោងបងប្អូនអ្នកប្រកបរបរពិតប្រាកដណាម្នាក់នោះឡើយ៕ 

ដោយ AKP