AKP កំពង់ធំ ថ្ងៃទី២១ ខែកក្កដា ឆ្នាំ២០២៦--ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានប្រចាំការ និងជាប្រធានលេខាធិការដ្ឋានសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ តំណាងឯកឧត្តម នួន ផារ័ត្ន អភិបាលខេត្ត ប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជា ខេត្តកំពង់ធំ អមដំណើរដោយលោក ជួន សិលាវិត ប្រធានសាខាមូលនិធិជាតិជំនួយសង្គម ខេត្តកំពង់ធំ និងលោក ឃន ចាន់ថៃ អភិបាលស្រុក និងជាប្រធានសមាគមអតីតយុទ្ធជន និងនិវត្តជនកម្ពុជា ស្រុកបារាយណ៍កាលពីរសៀលថ្ងៃទី២០ ខែកក្កដា ឆ្នាំ២០២៦ បានអញ្ជើញប្រគល់ផ្ទះថ្មី១ខ្នង គឺខ្នងទី៤៤ក្នុងស្រុកបារាយណ៍ អំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ជូនក្រុមគ្រួសារអតីតយុទ្ធជនពលី នៅភូមិពង្រលីញ ឃុំក្រវ៉ា ស្រុកបារាយណ៍ ខេត្តកំពង់ធំ។

លោក ឃន ចាន់ថៃ អភិបាលស្រុក និងជាប្រធានសមាគមអតីតយុទ្ធជន និងនិវត្តជនកម្ពុជា ស្រុកបារាយណ៍ បានរាយការណ៍បញ្ជាក់ថា លោកស្រី ឯក យ៉េន អាយុ ៦៥ឆ្នាំ ជាស្ត្រីមេម៉ាយ ដែលត្រូវជាភរិយារបស់លោក ស្វាយ ធីម ជាអតីតយុទ្ធជនពលី នៅក្នុងអង្គភាពយោធាស្រុកបារាយណ៍ នៃយោធាខេត្តកំពង់ធំ ដោយបន្សល់ទុកកូននៅក្នុងបន្ទុកចំនួន៥នាក់។

លោក ឃន ចាន់ថៃ បានថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត ដែលបានផ្តល់ផ្ទះថ្មី ដែលជាខ្នងទី៤៤ ជូនដល់អតីតយុទ្ធជន និងក្រុមគ្រួសារអតីតយុទ្ធជនពលី ពិការ នៅក្នុងស្រុកបារាយណ៍ ខេត្តកំពង់ធំ។

ឧត្តមសេនីយ៍ទោ សោម ស៊ុន បានថ្លែងថា ក្នុងរយៈពេលជាង១០ឆ្នាំកន្លងទៅនេះ សម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត តាមរយៈឯកឧត្តមទេសរដ្ឋមន្ដ្រី នាយឧត្តមសេនីយ៍កិត្តិសង្គហបណ្ឌិត គន់ គីម អនុប្រធានប្រចាំការ និងជាអគ្គលេខាធិការសមាគមអតីតយុទ្ធជន និងនិវត្តជនកម្ពុជា បានសម្រេចផ្តល់ផ្ទះចំនួន ៥៤៧ខ្នង ក្នុងនោះបានសាងសង់ជូនអតីតយុទ្ធជន ដែលមានជីវភាពលំបាកខ្វះខាត គ្មានដី គ្មានផ្ទះចំនួន ២៤១ខ្នង និងផ្តល់ដីសម្បទានសង្គមកិច្ច ក្នុងមួយគ្រួសារមួយហិកតាកន្លះ នៅក្នុងមណ្ឌលអភិវឌ្ឍន៍អតីតយុទ្ធជន មរតកតេជោថ្លុកព្រីង នៅឃុំក្រយា ស្រុកសន្ទុក ខេត្តកំពង់ធំ និងដោយឡែក ចំនួន ៣០៦ខ្នងផ្ទះទៀត ត្រូវបានសាងសង់ផ្តល់ជូនអតីតយុទ្ធជន ដែលមានដី គ្មានផ្ទះ ឬមានជម្រកស្នាក់នៅមិនសមរម្យ នៅតាមមូលដ្ឋាននានា នៅក្នុងទូទាំងខេត្តកំពង់ធំ ដើម្បីបានស្នាក់នៅ ក្នុងការកសាងជីវភាពរស់នៅបានសមរម្យ ដែលជាការដឹងគុណចំពោះវីរភាពរបស់បងប្អូនអតីតយុទ្ធជន ដែលបានលះបង់សាច់ស្រស់ ឈាមស្រស់ ដើម្បីបុព្វហេតុជាតិ និងមាតុភូមិកម្ពុជា។

នៅក្នុងឱកាសប្រគល់ផ្ទះថ្មីនេះឧត្តមសេនីយ៍ទោ សោមស៊ុន និងលោក ឃន ចាន់ថៃ ក៏បាននាំយកនូវគ្រឿងឧបភោគបរិភោគ សម្ភារៈប្រើប្រាស់ មានមុង ភួយ កន្ទេល ខ្នើយ សម្ភារៈផ្ទះបាយ និងថវិកាមួយចំនួនទៀត ដែលជាអំណោយរបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ឧបត្ថម្ភជូនក្រុមគ្រួសារអតីតយុទ្ធជនពលី ដើម្បីប្រើប្រាស់ក្នុងការរស់នៅពេលឡើងផ្ទះថ្មី ក្នុងពេលនេះផងដែរ៕

ដោយ ស៊ុម វណ្ណា