AKP តាកែវ ថ្ងៃទី២១ ខែកក្កដា ឆ្នាំ២០២៦-- សាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តតាកែវ បានរៀបចំកិច្ចប្រជុំបូកសរុបលទ្ធផលការងារឆមាសទី១ ឆ្នាំ២០២៦ និងលើកទិសដៅការងារបន្ត ក្រោមអធិបតីភាពលោកជំទាវ កឹម គឹមអាង សមាជិកក្រុមប្រឹក្សាខេត្តតាកែវ និងជាអនុប្រធានកិត្តិយសនៃគណៈកម្មការសាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ខេត្តតាកែវខេត្ត និងលោកស្រី ឡុង បូណារេត អភិបាលរងខេត្តតាកែវ និងជាប្រធានប្រតិបត្តិនៃគណៈកម្មការសាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ខេត្តតាកែវ ព្រមទាំងមានការអញ្ជើញចូលរួមពី លោកស្រីអនុប្រធាន សមាជិកសាខា និងអនុសាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ខេត្តតាកែវ សរុបប្រមាណជាង១០០នាក់ ដោយពិធីនេះរៀបចំឡើងនៅសាលប្រជុំរដ្ឋបាលខេត្តតាកែវ កាលពីថ្ងៃទី២០ ខែកក្កដា ឆ្នាំ២០២៦។

មានប្រសាសន៍សំណេះសំណាលក្នុងពិធីនោះ លោកស្រី ឡុង បូណារេត អភិបាលរងនៃគណៈអភិបាលខេត្តតាកែវ បានមានប្រសាសន៍ថា កិច្ចប្រជុំនេះរៀបចំឡើងក្នុងគោលបំណងស្តាប់របាយការណ៍វឌ្ឍនភាពការងារ ក្តាប់បញ្ហាប្រឈម និងសំណូមពរផ្សេងៗ ដើម្បីស្វែងរកដំណោះស្រាយឱ្យបានទាន់ពេលវេលា និងមានប្រសិទ្ធភាពខ្ពស់។

លោកស្រី ឡុង បូណារេត ក៏បានសម្តែងការគោរពដឹងគុណយ៉ាងជ្រាលជ្រៅ ចំពោះស្មារតី និងគំរូវីរភាពនៃការលះបង់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សម្តេចកិត្តិសង្គហបណ្ឌិត ម៉ែន សំអន ប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា និងជាអនុប្រធានអចិន្ត្រៃយ៍កាកបាទក្រហមកម្ពុជា ដែលជានិច្ចកាលតែងតែយកចិត្តទុកដាក់ខ្ពស់ចំពោះសុខទុក្ខ និងជីវភាពរស់នៅរបស់ស្ត្រីកម្ពុជាគ្រប់រូប។

លោកស្រីអភិបាលរងខេត្តតាកែវក៏បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីនារីទាំងអស់ ដែលបានចូលរួមយ៉ាងសកម្មក្នុងការងារមនុស្សធម៌ ការងារសង្គមកិច្ច ការលើកកម្ពស់សីលធម៌សង្គម គុណតម្លៃស្ត្រី និងគ្រួសារខ្មែរ ព្រមទាំងការជំរុញការអភិវឌ្ឍនៅតាមមូលដ្ឋាន។

លោកស្រី ឡុង បូណារេត ក៏បានផ្តល់អនុសាសន៍ និងដាក់ចេញផែនការការងារបន្ត ដោយជំរុញឱ្យមន្ត្រីនារីទាំងអស់ចូលរួមយ៉ាងសកម្មក្នុងការកសាងភាពធន់ និងផ្សព្វផ្សាយពីកិត្តិនាមរបស់កម្ពុជា តាមរយៈយុទ្ធនាការ និងព្រឹត្តិការណ៍សំខាន់ៗដែលរដ្ឋបាលខេត្តបានរៀបចំ សំដៅចូលរួមចំណែកបង្កើតចំណូលក្នុងមូលដ្ឋានប្រកបដោយចីរភាព និងគុណភាព៕

ដោយ អ៊ុច សៀង