AKP ភ្នំពេញ ថ្ងៃទី២០ ខែកក្កដា ឆ្នាំ២០២៦--ឯកឧត្តមបណ្ឌិត អាន ពេជ្រ ហត្ថដា រដ្ឋលេខាធិការក្រសួងធនធានទឹក និងឧតុនិយម នាថ្ងៃចន្ទទី២០ ខែកក្កដា ឆ្នាំ២០២៦នេះនៅទីស្តីការក្រសួង បានអញ្ជើញជាអធិបតីក្នុងពិធីចុះហត្ថលេខាលើអនុស្សរណៈនៃការយោគយល់គ្នា ត្រូវបានធ្វើឡើងរវាង ឯកឧត្តម សេរី បណ្ឌិត អនុរដ្ឋលេខាធិការ នៃក្រសួងធនធានទឹក និងឧតុនិយម និងលោកស្រីបណ្ឌិត អេង នេត្រា នាយិកាប្រតិបត្តិវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI)។

ថ្លែងក្នុងពិធី ឯកឧត្តមរដ្ឋលេខាធិការ បានគូសបញ្ជាក់ថា ការចុះហត្ថលេខានាពេលនេះ គឺជាការបង្កើតក្របខ័ណ្ឌកិច្ចសហប្រតិបត្តិការរយៈពេលវែង ដើម្បីភ្ជាប់ការស្រាវជ្រាវ និងចំណេះដឹងវិទ្យាសាស្ត្រ ទៅនឹងការរៀបចំ និងការអនុវត្តគោលនយោបាយសាធារណៈក្នុងវិស័យធនធានទឹកឱ្យកាន់តែមានប្រសិទ្ធភាពខ្ពស់។

ឯកឧត្តមបន្ថែមថា ភាពជាដៃគូនេះនឹងផ្តោតលើកិច្ចការសំខាន់ៗចំនួន៥ រួមមាន៖ ការស្រាវជ្រាវរួមគ្នា ការរៀបចំវេទិកាពិភាក្សាគោលនយោបាយ ការផ្លាស់ប្តូរព័ត៌មាន និងចំណេះដឹង ការកសាងសមត្ថភាព និងការអភិវឌ្ឍចំណេះដឹង ដើម្បីគាំទ្រដល់ការគ្រប់គ្រងធនធានទឹក ការគ្រប់គ្រងអាងទន្លេ ការពង្រឹងភាពធន់នឹងការប្រែប្រួលអាកាសធាតុ និងការគ្រប់គ្រងហានិភ័យទឹកជំនន់ និងគ្រោះរាំងស្ងួត។
ជាមួយគ្នានេះ ឯកឧត្តម ក៏បានជំរុញឱ្យភាគីទាំងពីរចាប់ផ្តើមអនុវត្តសកម្មភាពជាក់ស្តែងឱ្យបានឆាប់រហ័ស ដោយកំណត់ផែនការសកម្មភាពដែលមានភាពច្បាស់លាស់ ផ្តោតលើអាទិភាពជាតិ និងបង្កើតលទ្ធផលជាផ្លែផ្កា ដើម្បីរួមចំណែកដល់ការពង្រឹងស្ថាប័ន ការលើកកម្ពស់សន្តិសុខទឹក និងការអភិវឌ្ឍប្រកបដោយចីរភាពនៅព្រះរាជាណាចក្រកម្ពុជា៕

ដោយ៖ ពេជ្រ សំអឿន, (ប្រភព៖ក្រសួងធនធានទឹក និងឧតុនិយម )