AKP  កំពង់ចាម ថ្ងៃទី ២០ខែ កក្កដា  ឆ្នាំ២០២៦-- ឯកឧត្តមអ៊ុន ចាន់ដា  អភិបាលខេត្តកំពង់ចាម បានធ្វើការអំពាវនាវដល់ប្រជាពលរដ្ឋត្រូវនាំសត្វពាហនៈរបស់ខ្លួនមកចាក់វ៉ាក់សាំងការពារជំងឺ ឆ្លងដល់សត្វព្រោះរដូវនេះជារដូវវស្សាជំងឺឆ្លងរាតត្បាតផ្សេងៗតែងតែកើតមាន ឡើង ចំពោះសត្វពាហនៈគ្រប់ប្រភេទពិសេសសត្វគោក្របី ក៏ដូចជាដើម្បីចូលរួមការពារសុខភាពសត្វ លើកស្ទួយសេដ្ឋកិច្ចគ្រួសារ​ និងការពារសុខភាពយើងទាំងអស់គ្នា។    

ឯកឧត្តម អភិបាលនៃគណៈអភិបាល ខេត្តកំពង់ចាម​ ថ្លែងដូចនេះ ក្នុងឱកាសអញ្ជើញ បើកយុទ្ធនាការចាក់វ៉ាក់សាំងការពារជំងឺសារទឹក លើសត្វគោ ក្របី ជូនប្រជាកសិករ នាព្រឹកថ្ងៃទី២០កក្កដា ឆ្នាំ ២០២៦ នេះ ក្នុងស្រុកកងមាសខេត្តកំពង់ចាម។

  ឯកឧត្តម បានបញ្ជាក់ថាការបើកយុទ្ធ នាការចាក់វ៉ាក់សាំងការពារជំងឺសារទឹក លើសត្វគោ ក្របី ជូនប្រជាកសិករគឺដើម្បី ចូលរួមទប់ស្កាត់ និងការពារនូវជំងឺឆ្លងរាតត្បាតផ្សេងៗដែលតែងតែកើតមាន ឡើង ចំពោះសត្វពាហនៈ ដោយរដូវនេះជារដូវរដូវវស្សា ។

 ឯកឧត្តម អ៊ុន ចាន់ដា ក៏បានធ្វើការណែនាំដល់អាជ្ញាធរគ្រប់លំដាប់ថ្នាក់​ ត្រូវជួយផ្សព្វផ្សាយដល់ប្រជាពលរដ្ឋ ត្រូវចូលរួមជាមួយមន្ត្រីជំនាញ នាំសត្វមក ចាក់ថ្នាំការពារទប់ស្កាត់ នូវជំងឺឆ្លងផ្សេងៗចំពោះសត្វពាហនៈ  ។ ប្រជាពលរដ្ឋត្រូវ យកសត្វរបស់ខ្លួនមកចាក់ថ្នាំ ព្រោះ យុទ្ធនាការនៃការចាក់វ៉ាក់សាំងការពារជម្ងឺដល់សត្វមិនមានយកកម្រៃឡើយ។ ក្នុងករណីរ មានស្ថានភាពជម្ងឺសត្វ ផ្សេងៗត្រូវរាយការណ៍ ដល់ភ្នាក់ងារ សុខភាពសត្វភូមិ និងមន្ត្រីបសុព្យាបាល ប្រចាំស្រុក ដើម្បីចុះពិនិត្យ និងធ្វើ អន្តរាគមន៍ចាក់ថ្នាំការពារ និងព្យាបាលដល់សត្វបានទាន់ពេលវេលា ចៀសវាងបង្កឱ្យមានការឆ្លងជំងឺរីករាលដាលធ្ងន់ធ្ងរ។

  ក្នុងឱកាសនោះដែរឯកឧត្តមអភិបាលខេ ត្ត ក៏បានក្រើនរំលឹក ដល់បងប្អូនប្រជាព លរដ្ឋ ត្រូវលើកកំពស់ ការថែទាំសុខភាពឱ្យបានល្អ ត្រូវចេះ សំអាតថែរក្សាបរិវេណ ជុំវិញលំនៅឋានរបស់ខ្លួន ដើម្បីការពារ នូវជំងឺឆ្លងផ្សេងៗ ជាពិសេសជំងឺ គ្រុនឈាម។ ក្នុងករណីកូនចៅក្តៅខ្លួនសង្ស័យកើតនូវជំងឺអ្វីមួយ ត្រូវប្រញាប់​បញ្ជូនទៅកាន់មណ្ឌល សុខភាព ឬមន្ទីរពេទ្យជាបន្ទាន់៕

ដោយ៖ ឆាយ ម៉ុត