AKP សៀមរាប ថ្ងៃទី២០ ខែកក្តដា ឆ្នាំ២០២៦--ស្របនឹងអាកាសធាតុកំពុងមានការប្រែប្រួល តែកសិករម្នាក់នៅស្រុកប្រាសាទបាគង ខេត្តសៀមរាប បាននិងកំពុងទទួលបានជោគជ័យគួរឱ្យកត់ស ម្គាល់ លើការដាំដុះដំណាំ «ននោង» តាមរយៈការផ្លាស់ប្តូរទម្លាប់ពីការប្រើប្រាស់ថ្នាំកសិកម្ម មកប្រើប្រាស់ជីធម្ម ជាតិវិញ បានធ្វើឱ្យកសិកររកឃើញជម្រើសដំណាំដ៏មានសក្ដានុពល អាចដាំបានគ្រប់រដូវកាល និងមានទីផ្សារ។

អ្នកស្រី លី សុភាព កសិករនៅស្រុកប្រាសាទបាគង បានបង្ហាញថា «ននោង» គឺជាដំណាំដែលមិនមានភាពស្មុគស្មាញក្នុងការថែទាំឡើយ ហើយអាចដាំបានទាំងរដូវវស្សា និងរដូវប្រាំង។ ចំណុចពិសេសដែលធ្វើឱ្យដំណាំនេះទទួលបានការចាប់អារម្មណ៍ខ្លាំង គឺអ្នកស្រីបានកែប្រែទម្លាប់តាមរយៈកា រកាត់បន្ថយការប្រើប្រាស់សារធាតុគីមីបានយ៉ាងច្រើន ដោយអ្នកស្រីបានងាកមកប្រើប្រាស់ជីធម្មជាតិ ដូចជាលាមកគោជាដើម ដើម្បីធ្វើឱ្យដីមានជីជាតិ និងដំណាំលូតលាស់ល្អ។

អ្នកស្រី លី សុភាព បានបង្ហាញទៀតថា យោងតាមបទពិសោធន៍ជាក់ស្តែងនៃការដាំដុះនេះ អ្នកស្រីបានចែករំលែកបទពិសោធន៍មួយចំនួន ដោយអ្នកស្រីបានណែនាំដល់កសិករ ត្រូវចាប់ផ្តើមដោយការរៀបចំធ្វើរោងឱ្យបានត្រឹមត្រូវ រួចដាក់គ្រាប់ពូជដែលបានលាយជាមួយជីធម្មជាតិចូលទៅក្នុងដី។ សម្រាប់នៅរដូវប្រាំង កសិករត្រូវយកចិត្តទុកដាក់ស្រោចទឹកជាប្រចាំទាំងព្រឹក និងល្ងាច ដើម្បីរក្សាសំណើមឱ្យដំណាំលូតលាស់បានតាមតម្រូវការ។ ជាពិសេស ដើម្បីធានាបាននូវគុណភាពផ្លែ និងសុវត្ថិភាពអ្នកបរិភោគ កសិករមានការប្រុងប្រយ័ត្នខ្ពស់ ដោយប្រើប្រាស់ថ្នាំកសិកម្មតិចតួចបំផុត និងធ្វើតែនៅពេលចាំបាច់បំផុតប៉ុណ្ណោះ ជាពិសេសពេលដំណាំចាប់ផ្ដើ មចេញក្ដឹប។

កសិករខាងលើបានឱ្យដឹងថា បច្ចុប្បន្នការដាំននោងបានក្លាយជាអាជីពដ៏សំខាន់មួយរបស់អ្នកស្រី ដែលជួយសម្រួលដល់ជីវភាពគ្រួសារបានយ៉ាងល្អប្រសើរ ដោយអាចផ្គត់ផ្គង់តម្រូវការប្រចាំថ្ងៃបានរហូតដល់ ៥០%។ ជាមួយ គ្នានេះ អ្នកស្រីបានអរគុណចំពោះមន្ត្រីជំនាញកសិកម្ម ដែលតែងតែចុះមកបង្រៀន និងណែនាំបច្ចេកទេសដាំដុះថ្មីៗដល់ប្រជាពលរដ្ឋក្នុងមូលដ្ឋាន។ យ៉ាងណា កសិកររូបនេះបានសំណូមពរដល់ស្ថាប័នពាក់ព័ន្ធបន្តគាំទ្រគ្រាប់ពូជ ដែលមានគុណភាពល្អ និងពូជដែលធន់នឹងអាកាសធាតុ។ បន្តការពង្រីកវគ្គបណ្តុះបណ្តាល បន្ថែមលើបច្ចេកទេសដាំដុះទំនើប និងការគ្រប់គ្រងសត្វល្អិតដោយប្រើវិធីសាស្ត្រធម្មជាតិ ដើម្បីបង្កើនទិន្នផលសម្រាប់ផ្គត់ផ្គង់ទីផ្សារឱ្យបានកាន់តែទូលំទូលាយ៕

ដោយ៖ឃុត សៅ