AKP ភ្នំពេញ ថ្ងៃទី២០ ខែកក្កដា ឆ្នាំ២០២៦--ដើម្បីលើកកម្ពស់ការចូលរួមរបស់សហគមន៍មូលដ្ឋាន និងភាពជាម្ចាស់ក្នុងការអនុវត្តគម្រោងរេដបូកកែវសីមា អង្គការសមាគមអភិរក្សសត្វព្រៃប្រចាំកម្ពុជា WCS បានសម្របសម្រួល រៀបចំ«សិក្ខាសាលាពិគ្រោះយោបល់ជាមួយសហគមន៍លើផែនការប្រចាំឆ្នាំសារពើពន្ធ២០២៧ សម្រាប់គម្រោងរេដបូកកែវសីមា» ជាមួយតំណាងសហគមន៍ទាំង ២០ភូមិក្នុងគម្រោងរេដបូកកែវសីមា ក្នុងគោលដៅប្រមូលធាតុចូលសម្រាប់ការពិភាក្សាជាមួយភាគីពាក់ព័ន្ធ និងកំណត់ទិសដៅអាទិភាពឆ្ពោះទៅការអភិវឌ្ឍសហគមន៍ និងអភិរក្សធនធានធម្មជាតិប្រកបដោយចីរភាព។ 

ប្រភពពីអង្គការ WCS បានឱ្យដឹងនៅថ្ងៃទី១៩ ខែកក្កដា ឆ្នាំ២០២៦ថា សិក្ខាសាលានេះគឺជាវេទិកាមួយដែលផ្តល់ឱកាសឱ្យសហគមន៍ និងក្រុមការងារគម្រោងបានផ្លាស់ប្តូរយោបល់ ចែករំលែកបទពិសោធន៍ ការរំពឹងទុក ដើម្បីឆ្លុះបញ្ចាំងពីតម្រូវការ និងបញ្ហាប្រឈមនានាដែលសហគមន៍កំពុងជួបប្រទះក្នុងការអនុវត្តគម្រោងរេដបូកកែវសីមា។ បន្ថែមពីនេះសហគមន៍ បានផ្តល់ជាមតិយោបល់ និងអនុសាសន៍នានាក្នុងការរៀបចំផែនការយុទ្ធសាស្រ្តដើម្បីរួមចំណែកកាត់បន្ថយការបាត់បង់ព្រៃឈើ សត្វព្រៃ និងលើកស្ទួយជីវភាពសហគមន៍មូលដ្ឋាន។ តាមរយៈសិក្ខាសាលារយៈពេលមួយថ្ងៃពេញនេះ អ្នកចូលរួមបានកំណត់នូវសកម្មភាពអាទិភាព បង្កើនការយល់ដឹង កសាងទំនុកចិត្តរវាងអ្នកពាក់ព័ន្ធ និងជជែកពិភាក្សាស្វែងរកដំណោះស្រាយរួមសម្រាប់ការប្រើប្រាស់ធនធានធម្មជាតិប្រកបដោយនិរន្តភាព។

ការចូលរួមរបស់សហគមន៍មូលដ្ឋាន  គឺជាកត្តាដ៏សំខាន់ក្នុងការពង្រឹងការគ្រប់គ្រងព្រៃឈើ ការពារសត្វព្រៃ និងថែរក្សាប្រពៃណី ទំនៀមទំលាប់របស់ជនជាតិដើមភាគតិច។ នៅពេលសហគមន៍ មានឱកាសចូលរួមក្នុងការសម្រេចចិត្ត ពួកគេក្លាយជាដៃគូដ៏សំខាន់ក្នុងការការពារធនធានធម្មជាតិសម្រាប់មនុស្សនាពេលបច្ចុប្បន្ន និងអនាគត ៕

ដោយ៖ ណយ នឿន (ប្រភព៖WCS)