AKP ភ្នំពេញ ថ្ងៃទី១៩ ខែកក្កដា ឆ្នាំ២០២៦--ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក.) បានលើកឡើងថា ការរៀបចំការប្រកួតកីឡាបាល់ទាត់ SOCCER LEAGUE លើកទី៩ ឆ្នាំ២០២៦ មិនត្រឹមតែជាព្រឹត្តិការណ៍កីឡាប៉ុណ្ណោះទេ ប៉ុន្តែថែមទាំងជាវេទិកាដ៏សំខាន់មួយ ដែលបង្កើតឱ្យមានការជួបជុំ និងការប្រាស្រ័យទាក់ទងគ្នារវាងយុវជន ព្រមទាំងរួមចំណែកពង្រឹងស្មារតីរួបរួមជាតិ និងប្រមូលផ្តុំយុវជនពីគ្រប់ទិសទី ដើម្បីកសាងកម្លាំងមហាសាមគ្គីខ្មែរដ៏រឹងមាំ។

ការលើកឡើងរបស់ឯកឧត្តម ហ៊ុន ម៉ានី បានធ្វើឡើងនៅក្នុងឱកាសបិទបញ្ចប់ដោយជោគជ័យនៃការប្រកួត SOCCER LEAGUE លើកទី៩ ឆ្នាំ២០២៦ កាលពីល្ងាចថ្ងៃទី១៨ ខែកក្កដា ឆ្នាំ២០២៦ នៅពហុកីឡដ្ឋានជាតិអូឡាំ ពិក ដោយមានការអញ្ជើញចូលរួមពីឯកឧត្តមអភិសន្តិបណ្ឌិត ស សុខា អនុប្រធាន ស.ស.យ.ក. ឯកឧត្តម លោកជំទាវ លោក លោកស្រី តំណាងក្រសួង-ស្ថាប័ន ក្រុមហ៊ុនឯកជន ភ្ញៀវកិត្តិយស សមាជិកស.ស.យ.ក.យ៉ាងច្រើនកុះករ។

ឯកឧត្តម ហ៊ុន ម៉ានី បានបង្ហាញក្តីរីករាយ និងកោតសរសើរចំពោះគណៈកម្មការរៀបចំការប្រកួតបាល់ទាត់ពានរង្វាន់ SOCCER LEAGUE លើកទី៩ ឆ្នាំ២០២៦នេះ ដែលអាចបញ្ជាប់ទៅដោយរលូន និងមានភាពជោគជ័យខ្ពស់បាន គឺកើតចេញពីបទពិសោធ កិច្ចខិតខំប្រឹងប្រែង និងស្មារតីទទួលខុសត្រូវខ្ពស់។ ឯកឧត្តមលើកឡើងថា ការរៀបចំការប្រកួតពានរង្វាន់នេះមិនមែនត្រឹមតែជាព្រឹត្តិការណ៍កីឡាប៉ុណ្ណោះទេ ប៉ុន្តែជាវេទិកាដ៏សំខាន់មួយ ដែលបង្កើតឱ្យមានការជួបជុំ និងការប្រាស្រ័យទាក់ទងគ្នារវាងយុវជនព្រមទាំងរួមចំណែកពង្រឹងស្មារតីរួបរួមជាតិ និងប្រមូលផ្តុំយុវជនពីគ្រប់ទិសទី ដើម្បីកសាងកម្លាំងមហាសាមគ្គីខ្មែរដ៏រឹងមាំ។

ជាមួយគ្នានេះ ឯកឧត្តមអភិសន្ដិបណ្ឌិត ស សុខា អនុប្រធានសហភាពសហព័ន្ធយុវជនកម្ពុជាទទួលបន្ទុករៀបចំការប្រកួតកីឡាបាល់ទាត់ពានរង្វាន់ SOCCER LEAGUE លើកទី៩ ឆ្នាំ២០២៦ បានឡើងធ្វើការរបាយការណ៍សង្ខេបស្ដីពីការទទួលបានការដាក់ពាក្យចូលរួមប្រកួតមានចំនួន៦៤ក្រុម ដែលក្នុងនោះមានក្រុមបាល់ទាត់បុរស៥៦ក្រុម និងបាល់ទាត់នារីចំនួន៨ក្រុម។ ឯកឧត្តមឯកឧត្តមអភិសន្ដិបណ្ឌិតបានគូសបញ្ជាក់ថា រយៈពេលជាងមួយខែកន្លងមកនេះ ក្រុមកីឡាករ កីឡាការិនីមួយៗបានបង្ហាញពីការអភិវឌ្ឍសមត្ថភាពកាន់តែប្រសើរឡើងគួរឱ្យកត់សម្គាល់ ព្រមទាំងគោរពបាននូវគោលការណ៍ បទបញ្ជាការប្រកួត និងលក្ខន្តិកៈការប្រកួត ព្រមទាំងមានការយោគយល់ និងអធ្យាស្រ័យគ្នាប្រកបដោយការទទួលខុសត្រូវខ្ពស់ផងដែរ។

គួរបញ្ជាក់ថា ចំពោះជ័យលាភី រួមមានផ្នែកបុរស៖ ក្រុមស៊ីប៊ែល អេហ្វស៊ី បានក្លាយជាម្ចាស់ជើងឯក ក្រោយពីបានយកឈ្នះក្រុម NSM IPS ដោយលទ្ធផល ៣-១ នៅវគ្គផ្តាច់ព្រ័ត្រ។ រីឯក្រុមបាល់ទាត់ ឌីអាយជី អេហ្វស៊ី ទទួលបានចំណាត់ថ្នាក់លេខ៣ ក្រោយពីបានយកឈ្នះក្រុម អេសជីស៊ី ដោយលទ្ធផល ១០-១។ ចំពោះជ័យលាភីផ្នែកនារី ក្រុមយុវតីស្ទាំងភ្លើងក្មេងវត្តក្តីចាស់បានឈ្នះជើងឯក បន្ទាប់ពីបានយកឈ្នះក្រុមសេនាអង្គរយូណាយធីត ៥-១៕

ដោយ ហេង ណាលីន