AKP ព្រះវិហារ ថ្ងៃទី១៩ ខែកក្កដា ឆ្នាំ២០២៦– លោកស្រី ហែម សុគុណពិសី ប្រធានមន្ទីរព័ត៌មានខេត្តព្រះវិហារ និងលោក ស៊ុន កុសល មេឃុំគូលែនត្បូង បានដឹកនាំក្រុមការងារនាំយកកង់ និងសម្ភារៈសិក្សា ប្រគល់ជូនដល់កុមារខ្វះខាត នៅក្នុងស្រុកគូលែន ខេត្តព្រះវិហារ កាលពីថ្ងៃសៅរិ៍ទី១៨ ខែកក្កដា ឆ្នាំ២០២៦ ។

លោកស្រី ហែម សុគុណពិសី បានថ្លែងថា ក្នុងស្មារតីយកចិត្តទុក្ខដាក់ និងការព្រួយបារម្មណ៌ចំពោះកុមារដែលងាយនឹងបោះបង់ការសិក្សារដោយសារកត្តាខ្វះខាត លោកស្រី និងលោក ស៊ុន កុសល បានដឹកនាំក្រុមការងារនាំយកកង់ និងសម្ភារៈសិក្សា ប្រគល់ជូនដល់ដៃប្អូនៗកុមារដោយផ្ទាល់នៅគេហដ្ឋាន នៃមូលដ្ឋានឃុំគូលែនត្បូង ដើម្បីជាយានជំនិះក្នុងការធ្វើដំណើរ និងជាមធ្យោបាយបន្តការសិក្សារៀនសូត្រឱ្យកាន់តែងាយស្រួលជាងមុន។

លោកស្រីប្រធានមន្ទីរ បានមានប្រសាសន៍បន្ថែមថា ការចុះសួរសុខទុក្ខ និងនាំយកចំណងដៃជាកង់ សម្លៀកបំពាក់រួមទាំងសម្ភារៈសិក្សាទាំងនេះ គឺមិនត្រឹមតែជាការជួយសម្រាលបន្ទុកជីវភាពរបស់មាតាបិតាអាណាព្យាបាលដែលកំពុងជួបការលំបាកប៉ុណ្ណោះទេ ប៉ុន្តែថែមទាំងជាការផ្តល់នូវកម្លាំងចិត្តដ៏ធំធេងដល់ក្មួយៗកុមារទាំងអស់ឱ្យមានស្មារតីរឹងប៉ឹងខិតខំសិក្សារៀនសូត្រថែមទៀត។

លោកស្រីបន្តថា អំណោយដែលបានយកទៅផ្ដល់ជូននាឱកាសនោះ រួមមានកង់ចំនួន៧គ្រឿង និងសម្ភារៈសិក្សាមួយចំនួនទៀត ដែលបានមកពីការចូលរួមឧបត្ថម្ភ របស់មន្ទីរព័ត៌មាន មានកង់ចំនួន១គ្រឿង សម្ភារៈសិក្សារមួយចំនួន, លោក ស៊ុន កុសល កង់ចំនួន៦គ្រឿង, លោក សំ លាងទ្រី ប្រធានមន្ទីរសារធារណៈការ និងដឹកជញ្ជូនខេត្ត ឧបត្ថម្ភកាតាបចំនួន៧ សម្ភារៈសិក្សា និងរបស់ប្រើប្រាស់មួយចំនួន លោក ប៉ែន ជឹង អភិបាលស្រុកគូលែន បានចូលរួមឧបត្ថម្ភថវិកាចំនួន ១០ម៉ឺនរៀលផងដែរ ៕

ដោយ៖ ទិត ស្រ៊