AKP តាកែវ ថ្ងៃទី១៨ ខែកក្កដា ឆ្នាំ២០២៦-- ដើម្បីបង្ហាញពីការយកចិត្តទុកដាក់ខ្ពស់ពីថ្នាក់ដឹកនាំខេត្តចំពោះវិស័យកីឡា ជាពិសេសការជំរុញនិងលើកទឹកចិត្ត ដល់យុវជនក្នុងខេត្តឱ្យចូលរួមលេងកីឡា ដើម្បីសុខភាព មិត្តភាព សាមគ្គីភាព និងចៀសឆ្ងាយពីគ្រឿងញៀន។

ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ រួមជាមួយអភិបាលរងខេត្ត ប្រធានមន្ទីរអង្គភាពជុំវិញខេត្ត និងមន្ត្រីពាក់ព័ន្ធ បានអញ្ជើញជួបសំណេះសំណាល សួរសុខទុក្ខ និងបានចូលរួមទស្សនា ការប្រកួតបាល់ទាត់មិត្តភាពកម្ដៅសាច់ដុំ រវាងក្រុមកីឡាករមកពីក្លិបបាល់ទាត់គិរីវង់សុខសែនជ័យ និងក្រុមបាល់ទាត់ភ្នំដាមហានគរ។ ពិធីនេះរៀបចំឡើងនៅកីឡាដ្ឋានបាល់ទាត់គិរីវង់សុខសែនជ័យ ស្ថិតនៅក្នុងសង្កាត់រកាក្រៅក្រុងដូនកែវខេត្តតាកែវ កាលពីរសៀលថ្ងៃសុក្រ ទី១៧ ខែកក្កដា ឆ្នាំ២០២៦។ ការប្រកួតមិត្តភាពនេះត្រូវបានរៀបចំឡើងក្នុងគោលបំណងផ្លាស់ប្ដូរបទពិសោធន៍ និងពង្រឹងសមត្ថភាពបច្ចេកទេស ដើម្បីត្រៀមលក្ខណៈសម្បត្តិឱ្យបានគ្រប់គ្រាន់ សម្រាប់ការប្រកួតក្នុងព្រឹត្តិការណ៍ធំៗនាពេលខាងមុខ។

ក្នុងឱកាសនោះ ឯកឧត្តម វ៉ី សំណាង បានគូសបញ្ជាក់ពីសារប្រយោជន៍ដ៏មានតម្លៃនៃវិស័យកីឡា ដោយការប្រកួតមិត្តភាពនេះ មិនត្រឹមតែធ្វើឡើងដើម្បីរឹតចំណងមិត្តភាព និងសាមគ្គីភាពរវាងអ្នកស្នេហាកីឡាបាល់ទាត់ក្នុងខេត្តប៉ុណ្ណោះទេ ប៉ុន្តែថែមទាំងផ្តោតសំខាន់លើការលើកកម្ពស់សុខភាពមាំមួន ជួយឱ្យយុវជនចៀសឆ្ងាយពីគ្រឿងញៀន និងអំពើអបាយមុខផ្សេងៗនៅក្នុងសង្គម។

ឯកឧត្តមបានមានប្រសាសន៍បន្តថា រដ្ឋបាលខេត្តតាកែវតែងតែយកចិត្តទុកដាក់ខ្ពស់ក្នុងការគាំទ្រ និងបង្កើតឱ្យមានការប្រកួតពានរង្វាន់ កីឡាមហាជនគ្រប់ប្រភេទជារៀងរាល់ឆ្នាំ សំដៅលើកស្ទួយវិស័យកីឡាក្នុងខេត្ត ឱ្យកាន់តែរីកចម្រើន។ជាងនេះទៅទៀតការប្រកួតបែបនេះ គឺជាឱកាសដ៏ល្អសម្រាប់កីឡាករក្នុងការវាស់ស្ទង់គុណផល ផ្លាស់ប្តូរបច្ចេកទេស និងស្វែងរកធនធានកីឡាករឆ្នើមៗ ដើម្បីតំណាងឱ្យខេត្តតាកែវទៅចូលរួមប្រកួត ប្រជែងនៅលើឆាកថ្នាក់ជាតិ។

ឯកឧត្តម វ៉ី សំណាង បានសង្កត់ធ្ងន់ថា វិស័យកីឡាពិតជាបានឆ្លុះបញ្ចាំងពីស្មារតីស្រឡាញ់ជាតិ និងបង្កើតចលនាជាតិយ៉ាងផុសផុល តាមរយៈការចូលរួមគាំទ្រ និងកិច្ចសហប្រតិបត្តិការ ស្របតាមពាក្យស្លោកដ៏មានអត្ថន័យថា "កីឡាជាទូតសន្តិភាព និងកីឡារស់ក្នុងសន្តិភាព"៕

ដោយ អ៊ុច សៀង