AKPកំពង់ធំថ្ងៃទី១៧ ខែ កក្កដា ឆ្នាំ២០២៦-- លោកឧត្តមសេនីយ៍ទោ ហេង សុផលស្នងការនគរបាលខេត្តកំពង់ធំបានណែនាំដល់កម្លាំងនគរបាលរដ្ឋបាលប៉ុស្តិ៍រដ្ឋបាលបើកទ្វារ២៤ម៉ោង លើ២៤ ម៉ោងរង់ចាំផ្ដល់សេវាសាធារណៈជូនប្រជាពលរដ្ឋក្នុងឱកាសដឹកនាំកងកម្លាំង រៀបចំពិធីបញ្ចុះបឋមសិលាសាងសង់អគារប៉ុស្តិ៍នគរបាលរដ្ឋបាលកំពង់គោនៃអធិការដ្ឋាននគរបាលស្រុកកំពង់ស្វាយនាព្រឹកថ្ងៃទី១៧ខែកក្កដាឆ្នាំ៣០២៦។

លោកឧត្តមសេនីយ៍ទោ ហេង សុផលបានមានប្រសាសន៍លើកឡើងថាដោយ មានការយកចិត្តទុកដាក់ពីសំណាក់ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួង មហាផ្ទៃ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ថ្ងៃនេះ លោកបានដឹកនាំកងកម្លាំងរៀបចំពិធីបញ្ចុះបឋមសិលា សាងសង់អគារប៉ុស្តិ៍នគរបាលរដ្ឋបាល ដែលមានទំហំ ១១ ម៉ែត្រគុណ៩,៥០ ម៉ែត្រ ជញ្ជាំងឥដ្ឋ ក្រាលការ៉ូ ប្រក់ក្បឿង បែងចែកជា៤បន្ទប់ និងមានបន្ទប់ទឹកដាច់ ដោយឡែកចំនួន១មានលក្ខណៈធំទូលាយ បំពាក់ទៅដោយសម្ភារៈ គ្រឿងបរិក្ខារទំនើបទាន់សម័យ ដើម្បីផ្តល់ភាពងាយស្រួល ដល់មន្ត្រីបំពេញភារកិច្ចជាប្រចាំថ្ងៃ ជំនួសអគារចាស់ដែលតូចចង្អៀត ។

ក្នុងឱកាសនោះលោកឧត្តមសេនីយ៍ទោស្នងការ បានផ្តាំផ្ញើ ដល់កងកម្លាំង ត្រូវបន្តយកចិត្តទុកដាក់ និងអនុវត្តឱ្យទទួលបានប្រសិទ្ធភាពខ្ពស់គឺ៖១.រៀបចំផែនកា រសកម្មភាព សម្រាប់អនុវត្ត តួនាទី ភារកិច្ចជាប្រចាំថ្ងៃ ផ្លាស់ប្តូរវេនប្រចាំការ រង់ចាំផ្ដល់សេវារដ្ឋបាល ជូនប្រជាពលរដ្ឋ និងតាមដានសភាពការណ៍ រក្សាសន្តិសុខ សុវត្ថិភាព សណ្តាប់ធ្នាប់សាធារណៈព្រមទាំងចុះល្បាតតាមគោលដៅងាយរងគ្រោះ ក្នុងភូមិសាស្ត្រ របស់ខ្លួន ដោយសហការជាមួយកម្លាំងប្រជាការពារ សំដៅបង្ការ ទប់ស្កាត់បទល្មើសលួច ឆក់ ប្លន់ ក្មេងទំនើង និងបទល្មើសគ្រឿងញៀន។២.ពង្រឹងការងារគ្រប់គ្រងសន្តិសុខតាមទីតាំងរស់នៅប្រមូលផ្តុំ ឱ្យសកម្មនូវយុទ្ធនាការបង្ការ ទប់ស្កាត់ និងបង្ក្រាបបទល្មើសឆបោកតាមប្រព័ន្ធអនឡាញ ក្នុងភូមិសាស្ត្រទទួលខុសត្រូវរបស់ខ្លួន។៣.តាមដានត្រួតពិនិត្យការបំពេញភារ កិច្ច របស់មន្ត្រីជំនាញ ជាប្រចាំថ្ងៃ អនុវត្តការងារតាមឋានានុក្រម សេចក្តីប្រកាស បទបញ្ជាថ្នាក់ដឹកនាំ បានបែងចែង ប្រកបដោយស្មារតីសាមគ្គីគ្នា ឯកភាពផ្ទៃក្នុង។៤.ត្រូវបង្កើនការអប់រំផ្សព្វផ្សាយគោលនយោបាយ"ភូមិ-ឃុំ-សង្កាត់មានសុវត្ថិភាព"ដោយលើកយកលក្ខណៈសម្បត្តិទាំង៧ យ៉ាងដល់មហាជនគ្រប់ស្រទាប់វណ្ណៈ តាមគោលដៅងាយរងគ្រោះ។

លើកកម្ពស់ ការយល់ដឹង និងចូលរួមអនុវត្ត ឱ្យមានលទ្ធផលល្អប្រសើរ ព្រម ទាំងទទួលយកមតិរបស់ប្រជាពលរដ្ឋ អំពីបញ្ហាប្រឈម ក្ដីកង្វល់ ធ្វើការដោះស្រាយបានទាន់ពេលវេលា។៥.ការអនុវត្តការងារនគរបាលនិងសហគមន៍ ត្រូវទំនាក់ទំនងយ៉ាងជិតស្និទ្ធក្នុងការចុះជួបអ្នកពាក់ព័ន្ធ មានមេឃុំ ក្រុមប្រឹក្សាឃុំ មេភូមិ និងប្រជាពលរដ្ឋ រៀងរាល់ខែ ដោយធ្វើផែនការចុះផ្សព្វផ្សាយខ្លឹមសារនៅតាមគោលដៅដែលបានកំណត់។៦.បន្តពង្រឹងចលនាប្រជាការពារភូមិនីមួយៗ បំផុសចលនាឱ្យមានការចូលរួមពីប្រជាពលរដ្ឋ ក្នុងមូលដ្ឋាន ដើម្បីពង្រឹងសន្តិសុខ សណ្តាប់ធ្នាប់ សុវត្ថិភាពសង្គម។៧.ធ្វើអនាម័យ លើកកម្ពស់បរិស្ថាន ជុំវិញទីកន្លែងបំពេញភារកិច្ច និងធ្វើពលកម្មសម្អាតជាប្រចាំ ឱ្យទទួលសោភ័ណភាព សណ្តាប់ធ្នាប់ និងរបៀបរៀបរយ ប្រៀបដូចជាផ្ទះទី២ របស់បងប្អូននិង៨.បន្ទាប់ពីសាងសង់អគារនេះរួច ត្រូវគ្រប់គ្រងថែទាំ ដើម្បីធានាការប្រើប្រាស់បានយូរអង្វែង៕

ដោយ៖ ស៊ុម វណ្ណា