AKP ភ្នំពេញ ថ្ងៃទី១៧ ខែកក្កដា ឆ្នាំ២០២៦--ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំពិនិត្យលើសេចក្តីព្រាងគោលការណ៍ណែនាំ ស្តីពីការផ្ទៀងផ្ទាត់ការទទួលបានទឹកផឹកសុវត្ថិភាពសម្រាប់ទាំងអស់គ្នានៅទីស្ដីការក្រសួង នាព្រឹកថ្ងៃសុក្រទី១៧ ខែកក្កដា ឆ្នាំ២០២៦ ។

អញ្ជើញចូលរួមក្នុងកិច្ចប្រជុំមាន៖ ឯកឧត្ដមរដ្ឋលេខាធិការប្រចាំការ ឯកឧត្ដមជាថ្នាក់ដឹកនាំ នាយកអង្គការភ្លែនប្រចាំកម្ពុជា ទីប្រឹក្សាបច្ចេកទេស ព្រមទាំងនាយកដ្ឋានជំនាញពាក់ព័ន្ធ។

លោក ជឹម ចរណៃ ទីប្រឹក្សាបច្ចេកទេស បានធ្វើបទបង្ហាញអំពីការរៀបចំសេចក្តីព្រាងគោលការណ៍ណែនាំនេះ ដោយសង្គត់ធ្ងន់លើគោលបំណង យន្តការ សូចនាករ និងវិធីសាស្ត្រនៃការផ្ទៀងផ្ទាត់ការទទួលបានទឹកផឹកសុវត្ថិភាព ។

កិច្ចប្រជុំបានធ្វើការពិនិត្យយ៉ាងល្អិតល្អន់លើសេចក្តីព្រាង និងបានចូលរួមជាធាតុចូលដ៏មានសារៈសំខាន់ដើម្បីធ្វើឱ្យសេចក្តីព្រាងគោលការណ៍ណែនាំនេះមានលក្ខណៈគ្រប់ជ្រុងជ្រោយ ដែលអាចយកទៅអនុវត្តក្រោយពេលដាក់ចេញជាផ្លូវការមានប្រសិទ្ធភាព និងសក្ដិសិទ្ធិភាពខ្ពស់ និងអាចឆ្លើយតបទៅនឹងតម្រូវការរបស់ប្រជាពលរដ្ឋនៅជនបទ។

ឯកឧត្ដមរដ្ឋមន្រ្ដី បានថ្លែងអំណរគុណ និងវាយតម្លៃខ្ពស់ចំពោះថ្នាក់ដឹកនាំក្រសួង អង្គការភ្លែននៅកម្ពុជា និងទីប្រឹក្សាបច្ចេកទេស ដែលបានរៀបចំចងក្រនៅឯកសារគតិយុត្តនានា ធ្វើឱ្យលេចចេញជាសេចក្តីព្រាងនេះឡើង និងបានផ្ដល់នូវអនុសាសន៍មួយចំនួនជូនដល់ក្រុមការងាររៀបចំ កែសម្រួលចំនុចដែលនៅខ្វះខាត ឱ្យប្រសើរឡើងបន្ថែមទៀត៕

ដោយ៖ ពេជ្រ សំអឿន(ប្រភព៖ក្រសួងអភិវឌ្ឍន៍ជនបទ)