AKP ភ្នំពេញ ថ្ងៃទី១៧ ខែកក្កដា ឆ្នាំ២០២៦--ចុះបញ្ជីដីព្រៃអារក្ស និងដីកប់សព ជា កម្មសិទ្ធិសមូហភាព ស្របច្បាប់ នោះបងប្អូនជនជាតិជង និងព័រចង់ឱ្យមានការចុះបញ្ជីទទួលស្គាល់ ត្រឹមត្រូវ ដើម្បីប្រែក្លាយជាដីត្រូវ ថែរក្សាបាននូវទំនៀមទម្លាប់វប្បធម៌ និងជំនឿរបស់ពួកគាត់។ 

លោក សារូ វុធ  ប្រធានសហគមន៍ដៃគូសំរោងភូមិតាដេស ឃុំសំរោង ស្រុកភ្នំក្រវាញ ខេត្ត ពោធិ៍សាត់បានឱ្យដឹងថាប្រជាសហគមន៍របស់លោក ដែលក្នុងនេះមានជនជាតិជង ,ជនជាតិ ព័រ និងជនជាតិខ្មែរ សរុបជាង២៧០គ្រួសារ។ក្នុងនេះជនជាតិព័រមានចំនួន ៣០គ្រួសារ និងជនជាតិដើមជង មានចំនួន៣៥គ្រួសារ ហើយក្រៅពីនេះជាជនជាតិខ្មែរ។

លោកបានប្រាប់ថាជនជាតិដើមជង និងព័រមួយចំនួននៅតែប្រកាន់ខ្ជាប់នូវមុខរបរទំនៀមទម្លាប់បុរាណគឺ អាស្រ័យផល អនុផលព្រៃឈើ អ្នកខ្លះរកដំឡូងព្រៃ ជីកក្តួច បេះផ្លែឈើព្រៃ ទុករបរិភោគក្នុងគ្រួសារ និងលក់ផងដែរ។

ដោយសារចង់រក្សាបាននូវទំនៀមទម្លាប់ ជនជាតិដើមភាគតិច ពិសេស តំបន់ព្រៃអារក្ស និងព្រៃកប់សព ម្ល៉ោះហើយសហគមន៍តែងទាមទារឱ្យមានការចុះបញ្ជីថែរក្សា ដីព្រៃអារក្សមួយកន្លែងដែលមានឈ្មោះថា តំបន់ព្រៃអារក្សឬហៅថាភ្នំព្រអង្គ មានទំហំ ២៤ហិកតា និងផ្ទៃដីមួយកន្លែងទៀតជាព្រៃកប់សពចំនួន ៤ហិកតា ។ការចង់កំណត់ និង ចុះបញ្ជីត្រឹមត្រូវ ពីតំបន់ដីទាំងនេះដើម្បីរក្សានូវ អត្តសញ្ញាជនជាតិដើមភាគតិចក៏ដូចជា សម្រាប់ទីកន្លែងទាក់ទាញវិស័យទេសចរណ៍ ហើយក៏ដូចជារក្សានូវធនធានធម្មជាតិឱ្យគង់វង្សមិនអាចមានជនល្មើសរំលោភបំពានបាន។

លោក សន សារឿន មេ ភូមិ តាដេស បានបញ្ជាក់ប្រាប់ដែរថាតំបន់ដីព្រៃអារក្ស និងដីកប់សពទាំងពីរកន្លែងនេះគឺជាទីតាំងបុរាណកាលរបស់ជនជាតិដើមភាគតិចព័រ និង ជង ។ពួកគាត់តែងគោរពតាមបែបបទប្រពៃណីគឺមានលក្ខណៈពីរបែបគឺទាំងអរូបីយ និងជារូបបីយ ។ក្នុងនេះអរូបីយ មានអារក្ស មានការបន់ស្រន់ សែនព្រេន ជាដើម។ចំណែករូបីយ ជាទីកន្លែង ឬតំបន់សម្រាប់បន់ស្រន់ ជំនឿទៅតាមជនជាតិដើមភាគតិច។

ដោយឡែក លោក ទូច សុផានី ប្រធានគម្រោងអភិវឌ្ឍន៍សហគមន៍នៃអង្គការសម្ព័ន្ធមិត្តសត្វព្រៃ (Wildlife Alliance)ឱ្យដឹងថាក្នុងគម្រោងរដ្ឋបូក សំកុស គឺបានកំពុងផ្តោតទៅលើ ២៧សហគមន៍ ដែលក្នុងនេះមានខេត្តពោធិ៍សាត់ និងខេត្តបាត់ដំបង។ដោយឡែកសម្រាប់ក្នុងភូមិតាដេសនេះអង្គការសម្ព័ន្ធសត្វព្រៃបានកំពុងជួយដល់ប្រជាសហគមន៍ ដើម្បីឱ្យពួកគាត់មានសិទ្ធប្រើ់ប្រាស់ និង គោរពបូជាជាជំនឿតាំងតែរាប់រយឆ្នាំមកហើយ។

លោកបានប្រាប់ថាតាបើតាមពង្រាងក្នុងការចុះបញ្ចីដែលមានទាំង ព្រៃអារក្ស និងព្រៃកាប់សព មានសរុបចំនួន ២៤ហិកតា និងព្រៃកប់សព មានចំនួន ៤ហិកតា ។ការចង់ឱ្យមានការចុះបញ្ជីជាផ្លូវការនេះដែរដើម្បីឱ្យ ពួកគាត់អាចចូលទៅប្រើ់ប្រាស់តាមលក្ខណៈប្រពៃណីពីដូនតាមក។

ដោយឡែក ឯកឧត្តម ខ្វៃ អាទិត្យា មន្រ្តីអ្នកនាំពាក្យក្រសួងបរិស្ថានបានថ្លែងថាសហគមន៍ដៃគូសំរោង ដែលស្ថិតនៅភូមិតាដេស ឃុំសំរោង ស្រុកភ្នំក្រវាញ ខេត្តពោធិ៍សាត់ក៏មានតំបន់ ព្រៃអារក្ស និងព្រៃកប់សព ដែលជាទំនៀមទម្លាប់ប្រពៃណីជនជាតិដើមភាគតិចជង និងព័រ។តំបន់ទាំងនេះជាទីកន្លែងគោរពបូជា និងជាប្រពៃណីដូនតារបស់ពួកគាត់។ក្រៅពីជាកន្លែងទំនៀមទម្លាប់ប្រពៃណីហើយតំបន់ទាំងនេះក៏ជាទីកន្លែងគោលដៅលើវិស័យទេសចរណ៍យ៉ាងមានសក្តានុពលផងដែរ។ក្រសួងនឹងខិតខំចូលរួមធ្វើយ៉ាងណាឱ្យតំបន់ទាំងនេះកំណត់ទីតាំងបានច្បាស់លាស់សម្រាប់បម្រើផលប្រយោជន៍សហគមន៍មូលដ្ឋាន និងសង្ឃឹមថាតំបន់ទាំងនេះនឹងក្លាយជាប្រយោជន៍សហគមន៍ក៏ដូចជាសេដ្ឋកិច្ចប្រទេសជាតិ៕

ដោយ៖ មករា