AKPភ្នំពេញថ្ងៃទី១៦ ខែកក្កដា ឆ្នាំ ២០២៦– រដ្ឋាភិបាលនៃសាធារណរដ្ឋសហព័ន្ធប្រេស៊ីល បានប្តេជ្ញាក្នុងការបន្តពង្រឹង និងពង្រីកកិច្ចសហប្រតិបត្តិការជាមួយកម្ពុជា តាមរយៈការបន្តជំរុញការវិនិយោគ និងពង្រីកទំហំពាណិជ្ជកម្ម ខណៈដែរទំហំពាណិជ្ជកម្មរវាងប្រទេសទាំងពីរកើន ១៨៦ លានដុល្លារអាម៉េរិកកាលពីឆ្នាំ២០២៥។

នេះជាការលើកឡើងរបស់លោកជំទាវ Vivian Loss Sanmartin ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសហព័ន្ធប្រេស៊ីល នៅក្នុងជំនួបជាមួយឯកឧត្តម អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី១៥ ខែកក្កដា ឆ្នាំ២០២៦។

លោកជំទាវបានមានប្រសាសន៍ថា រដ្ឋាភិបាលនៃសាធារណរដ្ឋសហព័ន្ធប្រេស៊ីល ប្តេជ្ញាក្នុងការបន្តពង្រឹង និងពង្រីកកិច្ចសហប្រតិបត្តិការជាមួយកម្ពុជា តាមរយៈការបន្តជំរុញការវិនិយោគ ពង្រីកទំហំពាណិជ្ជកម្ម ការផ្សាភ្ជាប់ធុរកិច្ច និងកិច្ចសហប្រតិបត្តិការលើវិស័យឯកជននានា ដើម្បីទាញយកសក្តានុពលសេដ្ឋកិច្ចរវាងប្រទេសទាំងពីរ។

ឯកឧត្តម អូន ព័ន្ធមុនីរ័ត្ន បានវាយតម្លៃខ្ពស់អំពីការរីកចម្រើនទំនាក់ទំនងទ្វេភាគី និងកិច្ចសហ ប្រតិបត្តិការរវាងប្រទេសទាំងពីរកម្ពុជា-ប្រេស៊ីល តាមរយៈការដាក់និវេសនដ្ឋានទូតផ្ទាល់នៅភ្នំពេញ កាលពីឆ្នាំ ២០២៤។

ជាមួយគ្នានេះ ឯកឧត្តម បានថ្លែងអំណរគុណចំពោះរដ្ឋាភិបាល និងប្រជាជនប្រេស៊ីល ដែលបានបន្តរួមចំណែកពង្រឹងទំនាក់ទំនងមិត្តភាព និងកិច្ចសហប្រតិបត្តិការជាមួយកម្ពុជា និងបានសម្តែងនូវជំនឿជាក់ថា ទំនាក់ទំនងទ្វេភាគីរវាងប្រទេសទាំងពីរ នឹងបន្តរីកចម្រើនថែមទៀត ដើម្បីនាំមកនូវ ផលប្រយោជន៍រួម និងវិបុលភាពសម្រាប់ប្រជាជននៃប្រទេសទាំងពីរ។

យោងតាមក្រសួងសេដ្ឋកិច្ចបានឲ្យដឹងថា ភាគីទាំងពីរ ក៏បានពិភាក្សាអំពីសក្តានុពលនៃប្រទេសទាំងពីរ ដែលអាចឈានទៅពង្រីកកិច្ចសហប្រតិបត្តិការទ្វេភាគី និងតំបន់ឲ្យកាន់តែស៊ីជម្រៅថែមទៀតក្នុងរយៈពេលមធ្យម និងវែងខាងមុខ ក្នុងនោះមាន វិស័យ កសិកម្ម វិស័យថាមពល និងបច្ចេកវិទ្យាហិរញ្ញវត្ថុ (FinTech)។

គួរបញ្ជាក់ដែរថា ក្នុងឆ្នាំ២០២៥ ទំហំពាណិជ្ជកម្មទ្វេភាគីកម្ពុជា-ប្រេស៊ីល សម្រេចបានប្រមាណ ១៨៦ លានដុល្លារ អាម៉េរិក កើនឡើងជាង ៨១ភាគរយ បើធៀបនឹងឆ្នាំ ២០២៤ ដោយភាគច្រើនជាការនាំចេញផលិតផលសំបកកង់ និងសម្លៀកបំពាក់ របស់កម្ពុជាទៅកាន់ប្រេស៊ីល ។ ដោយ៖ ស្រីពេជ្រ