AKP ភ្នំពេញ ថ្ងៃទី១៦ ខែកក្កដា ឆ្នាំ២០២៦--ឯកឧត្តម អុល រ៉ូ រដ្ឋលេខាធិការនៃក្រសួងសង្គមកិច្ច អតីតយុទ្ធជន និងយុវនីតិសម្បទា និងលោកស្រី គា សុភូ  អភិបាលខេត្តរងកំពង់ស្ពឺ ចាប់ពីថ្ងៃទី១៥-១៦ ខែកក្កដា ឆ្នាំ២០២៦ បានអញ្ជើញជាអធិបតីបើកវគ្គបណ្តុះបណ្តាលស្តីពីការអនុវត្តមុខងារនៃវិស័យសង្គមកិច្ច អតីតយុទ្ធជន និងយុវនីតិសម្បទា សម្រាប់មន្ត្រីទទួលបន្ទុកវិស័យសង្គមកិច្ច  និងសុខុមាលភាពសង្គម ក្រុង ស្រុក សម្រាប់ខេត្តកំពង់ស្ពឺ និងខេត្តព្រះសីហនុ ។

ឯកឧត្តម រដ្ឋលេខាធិការ អុល រ៉ូ បានលើកឡើងថា វគ្គបណ្តុះបណ្តាលនេះបានបញ្ជ្រា​បនិងពង្រឹងសមត្ថភាពជូនដល់មន្ត្រីពាក់ព័ន្ធទាំងអស់ដែលបានចូលរួម ពិសេសសម្រាប់មន្ត្រីទទួលបន្ទុកជាបុគ្គលិកសង្គមកិច្ច ក្រុង ស្រុក ដើម្បីឱ្យអនុវត្តមុខងារប្រកបដោយប្រសិទ្ធភាពនិងប្រសិទ្ធផល ស្របតាមឧបសម្ព័ន្ធទី១ និងឧបសម្ព័ន្ធទី៣ ចំណុច «ដ» វិស័យសង្គមកិច្ច អតីតយុទ្ធជន និងយុវនីតិសម្បទា នៃអនុក្រឹត្យលេខ១៨២ ១៨៣ និង១៨៤ និងមាត្រា៦ នៃអនុក្រឹត្យលេខ៣៤ និងសៀវភៅណែនាំ ផ្អែកលើក្របខណ្ឌច្បាប់ លិខិតបទដ្ឋានគតិយុត្ត គោលការណ៍ណែនាំ និងនីតិវិធីរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា។

វគ្គបណ្តុះបណ្តាលនេះមានសមាសភាពចូលរួមពី ឯកឧត្តមអគ្គនាយកនៃអគ្គនាយកដ្ឋានគោលនយោបាយសង្គមកិច្ច ឯកឧត្តមនាយកវិទ្យាស្ថានជាតិសង្គមកិច្ច​ លោកប្រធាននាយកដ្ឋាន អនុប្រធាននាយកដ្ឋានតំណាងអង្គភាពពាក់ព័ន្ធ លោកស្រីប្រធានមន្ទីរ អនុប្រធាន​ និងមន្រ្តីជំនាញនៃមន្ទីរស.អ.យ.ខេត្តកំពង់ស្ពឺ លោកប្រធានមន្ទីរស.អ.យ.ខេត្តព្រះសីហនុ លោក លោកស្រីអភិបាលរង ក្រុង ស្រុក ការិយាល័យសង្គមកិច្ចនិងសុខុមាលភាពសង្គម ទាំង៩ ក្រុង ស្រុក នៃខេត្តកំពង់ស្ពឺ លោក លោកស្រីអភិបាលរង ក្រុង ស្រុក ការិយាល័យសង្គមកិច្ចនិងសុខុមាលភាពសង្គម ទាំង៦ ក្រុង ស្រុក នៃខេត្តព្រះសីហនុ​ មណ្ឌលថែទាំកុមារកំព្រារបស់ខេត្តព្រះសីហនុ និងខេត្តកំពង់ស្ពឺ មណ្ឌលថែទាំកុមាររបស់អង្គការ និងអង្គការដៃគូអភិវឌ្ឍន៍ក្នុងខេត្តកំពង់ស្ពឺ និងសមាជិក សមាជិកា សរុបប្រមាណ ៧៥នាក់ស្រី៣៦នាក់ ៕

ដោយ ណយ នឿន (ប្រភព៖ក្រសួងសង្គមកិច្ច)