‎AKP កំពង់ស្ពឺ ថ្ងៃទី១៦ ខែកក្កដា ឆ្នាំ២០២៦--ឯកឧត្តម យឹម សុខុម ប្រធានក្រុមប្រឹក្សាខេត្ត និងឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ បានអញ្ជើញចូលរួមសម្តែងការសោកស្តាយ និងរំលែកទុក្ខយ៉ាងក្រៀមក្រំជាទីបំផុត ជាមួយក្រុមគ្រួសារសព លោកនាយទោ យឿន សោភា អាយុ ២១ឆ្នាំ ដែលជាយុទ្ធជនបំពេញភារកិច្ចនៅសមរភូមិជួរមុខ។ សពលោកនាយទោ យឿន សោភា ត្រូវបានធ្វើបុណ្យតាមប្រពៃណី ស្ថិតនៅភូមិត្រពាំងអូល ឃុំព្នាយ ស្រុកសំរោងទង ខេត្តកំពង់ស្ពឺ។

‎‎យោងតាមប្រភពព័ត៌មានបានឱ្យដឹងថា លោកនាយទោ យឿន សោភា គឺជាយុទ្ធជននៃអង្គភាពកងវរសេនាតូចលេខ ២៤១ កងពលតូចអន្តរាគមន៍លេខ ៤ ដែលឈរជើងបំពេញភារកិច្ចការពារជាតិនៅប្រាសាទតាមាន់។ មុនពេលកើតហេតុ លោកបានសុំច្បាប់មេបញ្ជាការដើម្បីមកលេងផ្ទះរយៈពេល ២ថ្ងៃ ហើយនៅក្នុងអំឡុងពេលធ្វើដំណើរត្រឡប់ទៅជួរមុខវិញ លោកក៏បានឆ្លៀតចូលទៅសួរសុខទុក្ខម្តាយមីង ប៉ុន្តែជាអកុសលក៏បានជួបគ្រោះថ្នាក់ចរាចរណ៍ បណ្តាលឱ្យបាត់បង់ជីវិតតែម្តង។

‎‎ឆ្លៀតក្នុងមរណទុក្ខដ៏ក្រៀមក្រំនេះ ឯកឧត្តមបណ្ឌិត ជាម ច័ន្ទសោភ័ណ បានពាំនាំនូវប្រសាសន៍ផ្តាំផ្ញើការសាកសួរសុខទុក្ខ និងរំលែកទុក្ខយ៉ាងក្រៀមក្រំជាទីបំផុតពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ្រ ចន្ទមនី ហ៊ុនម៉ាណែត ព្រមទាំងរូបឯកឧត្តមផ្ទាល់ ក្រុមការងារមន្ត្រីរាជការ និងកងកម្លាំងប្រដាប់អាវុធទូទាំងខេត្តកំពង់ស្ពឺ ដោយបានសម្តែងនូវការសោកស្តាយយ៉ាងខ្លាំង និងបានចាត់ទុកការបាត់បង់រូបលោក គឺជាការបាត់បង់នូវកូនប្រុស ស្វាមី ឬបងប្អូនជាទីស្រឡាញ់ក្នុងគ្រួសារ និងជាការបាត់បង់យុទ្ធជនដ៏ក្លាហានមួយរូប ដែលបានលះបង់កម្លាំងកាយចិត្តក្នុងការបំពេញភារកិច្ចការពារបូរណភាពទឹកដី នាពេលកន្លងមក។

‎‎ទន្ទឹមនឹងនេះ ដើម្បីជួយសម្រាលទុក្ខលំបាក និងទំនុកបម្រុងដល់ក្រុមគ្រួសារសព ឯកឧត្តមអភិបាលខេត្ត ក៏បាននាំយកថវិការបស់ សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ្រ ចន្ទមនី ចូលរួមឧបត្ថម្ភថវិកាចំនួន ៤០,០០០,០០០ រៀល (សែសិបលានរៀល) ទៅប្រគល់ជូនគ្រួសារសព ព្រមទាំងបានឧទ្ទិសបួងសួងដល់ដួងវិញ្ញាណក្ខន្ធរបស់ លោកនាយទោ យឿន សោភា បានទៅកាន់សុគតិភពកុំបីឃ្លៀងឃ្លាតឡើយ៕

ដោយ៖ ម៉ែន ប៊ុនធីម