AKP ភ្នំពេញ ថ្ងៃទី១៥ ខែកក្កដា ឆ្នាំ២០២៦ -- សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា មានប្រសាសន៍ថា ការប្រកួតបាល់ទាត់ពិភពលោកនារាត្រីនេះ សម្ដេចបានជ្រើសយកអង់គ្លេសសម្រាប់ការប្រកួតជាមួយអាហ្សង់ទីន ដណ្ដើមយកកៅអីឡើងទីវគ្គផ្ដាច់ព្រ័តនោះ។

នៅលើបណ្ដាញទំនាក់ទំនងសង្គម នាយប់ថ្ងៃទី១៥ ខែកក្កដា ឆ្នាំ២០២៦ សម្ដេចតេជោបានសរសេរថា បាល់ទាត់យប់មិញរវាងបារាំងជាមួយអេស្ប៉ាញ មិនខុសគ្នាជាមួយរឿងបុរសម្នាក់ដែលលេងមាន់ជល់នោះទេ។ បុរសម្នាក់ពូកែលេងមាន់ជល់ គាត់តែងយកមាន់គាត់ទៅជល់ភ្នាល់ជាមួយមាន់អ្នកផ្សេងទៀត តែគាត់មិនដែលចាក់ខាងមាន់គាត់ទេ គាត់បែរជាចាប់យកនិង ចាក់មាន់អ្នកផ្សេងទៀត ដែលទីបំផុតគាត់គឺជាអ្នកឈ្នះព្រោះគាត់ដឹងថាមាន់ដែលគាត់ជល់មិនឈ្នះមាន់ម្ខាងទៀតទេ។ សម្ដេចតេជោបន្តថា  រឿងបាល់ទាត់ពិភពលោករវាងបារាំង និងអេស្ប៉ាញយប់កន្លងទៅ មនុស្សនៅលើពិភពលោកច្រើនណាស់ដែលគាំទ្របារាំង តែស្ងាត់ៗទៅចាក់និងគាំទ្រអេស្ប៉ាញ ព្រោះគេពិនិត្យឃើញប្រវត្តិប្រកួតរវាងបារាំងជាមួយអេស្ប៉ាញ ភាគច្រើនអេស្ប៉ាញជាអ្នកឈ្នះ។

សម្ដេចតេជោបន្តទៀតថា  ករណីខ្ញុំ គឺខ្ញុំគាំទ្របារាំង ពិតប្រាកដ តែដោយសារដៃគូប្រកួតរបស់ខ្ញុំ មានសិទ្ធិជ្រើសរើសមុន គាត់រើសយកបារាំង ដូចនេះគាត់ប្រគល់អេស្បាញឱ្យខ្ញុំ ដូចជាប្រគល់ជ័យជំនះឱ្យខ្ញុំដូចគ្នាដែរ។ រង់ចាំមើលយប់នេះទៀតដោយគាត់រើសមុនដោយយកអាហ្សង់ទីន និងទុកអង់គ្លេសឱ្យខ្ញុំ។ គាត់មនុស្សស្រួលឱ្យតែខ្ញុំសរសើរក្រុមណាគាត់យកក្រុមនោះ ទោះខ្ញុំនិយាយប្រាប់គាត់ថាបាល់មូលក៏ដោយ។ សម្ដេចតេជោបន្ថែមថា  មកដល់ពេលនេះខ្ញុំឈ្នះ១១ប្រកួត ដោយ៦ប្រកួតខ្ញុំជាអ្នករើសមុន និង៥ប្រកួតទៀតគាត់ជាអ្នករើសមុន៕

ដោយ៖  ជឹម ណារី