AKP សៀមរាប ថ្ងៃទី១៥ ខែកក្កដា ឆ្នាំ២០២៦--លោកស្រី លាក់ ឡាំលាវ ត្រូវបានប្រកកាសចូលកាន់មុខតំណែងជាប្រធានមន្ទីរពេទ្យបង្អែកខេត្តសៀមរាប ជំនួសលោកវេជ្ជបណ្ឌិត ប៉ែន ផលគុណ ដែលត្រូវបានចូលនិវត្តន៍។ ពិធីនេះត្រូវបានធ្វើឡើងនៅព្រឹកថ្ងៃទី១៥ ខែកក្កដា ឆ្នាំ២០២៦ ហើយលោកស្រី លាក់ ឡាំលាវ បានការប្ដេជ្ញាចិត្តយ៉ាងមុតមាំលើការងារស្នូរសំខាន់ៗដែលផ្តោតលើការគោរពច្បាប់ ការពង្រឹងជំនាញ ការបម្រើអ្នកជំងឺដោយក្តីមេត្តាធម៌ និងគ្មានការរើសអើង។

លោកស្រី លាក់ ឡាំលាវ បានបង្ហាញថា ដើម្បីធានាបាននូវការផ្តល់សេវាប្រកបដោយស្តង់ដា មន្ទីរពេទ្យនឹងពង្រឹងសមត្ថភាពក្រុមគ្រូពេទ្យ តាមរយៈការបណ្តុះបណ្តាលជំនាញបច្ចេកទេសថ្មីៗ គោលដៅចម្បងគឺការផ្តល់សេវាដោយភាពទន់ភ្លន់ លុបបំបាត់រាល់ការរើសអើងទាំងស្រុង ដោយមិនប្រកាន់ថា អ្នកជំងឺប្រើប្រាស់បណ្ណ ប.ស.ស. ឬមូលនិធិសមធម៌ឡើយ។ ការបន្តអនុវត្តន៍ពាក្យស្លោក “មិនទុកឱ្យអ្នកជំងឺណាម្នាក់ត្រូវបានមើលរំលងឡើយ” ដោយគ្រូពេទ្យទាំងអស់នឹងខិតខំផ្តល់សេវាពិនិត្យ ព្យាបាល និងថែទាំ ឱ្យបានឆាប់រហ័សទាន់ពេល ប្រកបដោយកិត្តិយស និងមេត្តាធម៌។

លោកស្រីថា មន្ទីរពេទ្យក៏នឹងបន្តពង្រឹងការគ្រប់គ្រងការប្រចាំការ និងសង្គ្រោះបន្ទាន់នឹងត្រូវបានពង្រឹងឱ្យមានប្រសិទ្ធភាពខ្ពស់ ដោយដាច់ខាតមិនឱ្យមានការធ្វេសប្រហែសឡើយ។ ជាពិសេសជំរុញការប្រើប្រាស់ប្រព័ន្ធគ្រប់គ្រងមន្ទីរពេទ្យបែបឌីជីថល ដើម្បីគ្រប់គ្រងឯកសារអ្នកជំងឺ និងដំណើរការការងារឱ្យកាន់តែរហ័សថែមទៀត។

លោក ព្រឹម រដ្ឋា អភិបាលរងខេត្តសៀមរាប បានមានប្រសាសន៍ថា វិស័យសុខាភិបាលរបស់ខេត្ត ត្រូវបានពង្រឹង និងពង្រីកជាបន្តបន្ទាប់ ពីមួយឆ្នាំទៅមួយឆ្នាំស្ទើរគ្រប់ទីកន្លែង គួបផ្សំជាមួយការផ្តល់សេវាសុខាភិបាល របស់មន្រ្តីសុខាភិបាល ប្រកបដោយការទទួលខុសត្រូវ បានធ្វើឱ្យប្រជាជនយល់កាន់តែច្បាស់អំពីបញ្ហាសុខភាព។

លោកអភិបាលរង ក៏បានជំរុញឱ្យប្រធានមន្ទីរពេទ្យថ្មី បន្តខិតខំអនុវត្តន៍តាមតួនាទី ភារកិច្ចរបស់ខ្លួនប្រកបដោយមនសិការ វិជ្ជាជីវៈ មានស្មារតីទទួលខុសត្រូវខ្ពស់ មានតម្លាភាព គណនេយ្យភាព រួបរួមសាមគ្គីគ្នាជាធ្លុងមួយ ដើម្បីសម្រេចបានស្នាដៃធំៗបន្តទៀត។ ជាពិសេស ក្រុមគ្រូពេទ្យទាំងអស់ ត្រូវពង្រឹងសមត្ថភាព វិជ្ជាជីវៈ គុណធម៌ និងសីលធម៌នៃការផ្តល់សេវា ដើម្បីសម្រេចបាននូវប្រសិទ្ធភាពក្នុងការបម្រើប្រជាពលរដ្ឋ៕

ដោយ ឃុត សៅ