AKP ភ្នំពេញ ថ្ងៃទី១៥ ខែកក្កដា ឆ្នាំ២០២៦--លោកស្រី ហង់ ស៊ីមន អគ្គលេខាធិការ សហព័ន្ធកីឡារាំកម្ពុជាបានលើកបង្ហាញពីឆន្ទៈ ការប្តេជ្ញាចិត្តដ៏មោះមុតរបស់កីឡាករ កីឡាការិនីរាំជម្រើសជាតិកម្ពុជា ក្នុងការហ្វឹកហាត់បង្កើនគុណភាពបច្ចេកទេសយ៉ាងសកម្មបំផុត ត្រៀមចូលរួមប្រកួតប្រជែងមេដាយជូនជាតិ ក្នុងព្រឹត្តិការណ៍ប្រកួតជើងឯកអាស៊ី និងអាស៊ាន The 5th WDSF ASIAN-SOUTHEAST ASIAN DanceSport Championship 2026 នៅទីក្រុង កូឡាឡាំពួរ ប្រទេសម៉ាឡេស៊ី ពីថ្ងៃទី២៣-២៦ ខែកក្កដា ឆ្នាំ២០២៦។

ការលើកបង្ហាញនូវការប្តេជ្ញាចិត្តខ្ពស់របស់អត្តពលិករាំកម្ពុជាដោយលោកស្រីអគ្គលេខាធិការបានធ្វើឡើង នៅក្នុងបទសម្ភាសន៍ជាមួយ ទីភ្នាក់ងារសារព័ត៌មានកម្ពុជា AKP កាលពីល្ងាចថ្ងៃទី១៤ ខែកក្កដា ឆ្នាំ២០២៦ នៅទីស្នាក់ការសហព័ន្ធកីឡារាំកម្ពុជាក្នុងពហុកីឡដ្ឋានជាតិអូឡាំពិក។

លោកស្រី ហង់ ស៊ីមន បានគូសបញ្ជាក់ថា កីឡាករ កីឡាការិនីជម្រើសជាតិកីឡារាំកម្ពុជាកំពុងហ្វឹកហាត់យ៉ាងខ្លាំងក្លា ខណៈសហព័ន្ធត្រៀមបញ្ជូនប្រតិភូ ចៅក្រម គ្រូបង្វឹក គ្រូជំនួយ កីឡាករ និងកីឡាការិនីសរុប ២២នាក់។លោកស្រីបានលើកបង្ហាញឆន្ទៈ ការប្តេជ្ញាចិត្តខ្ពស់របស់ក្រុមជម្រើសជាតិកីឡារាំកម្ពុជា ត្រៀមចូលរួមប្រកួតដណ្តើមមេដាយជូនជាតិ នៅក្នុងព្រឹត្តិការណ៍អន្តរជាតិដ៏ធំមួយនេះ។

លោកស្រីអះអាងថា កាលពីព្រឹត្តិការណ៍ដូចគ្នា កាលពីឆ្នាំមុន អត្តពលិករាំកម្ពុជាដណ្តើមបានមេដាយសរុប ១៧គ្រឿង ក្នុងនោះមានមេដាយមាស៤គ្រឿង ខណៈការត្រៀមខ្លួនយ៉ាងល្អ ក្នុងការប្រកួតឆ្នាំ២០២៦ អត្តពលិកកម្ពុជាមានក្តីសង្ឃឹមខ្ពស់ក្នុងការការពារមេដាយក្នុងចំនួន ១៧គ្រឿងនេះ ឬអាចកើនឡើងនូវចំនួនមេដាយច្រើនជាងនេះជូនជាតិមាតុភូមិផងដែរ។ លោកស្រី ហង់ ស៊ីមន បន្ថែមថា បេសកកម្មអន្តរជាតិនេះ ប្រតិភូកីឡារាំកម្ពុជាទទួលបានការឧបត្ថម្ភប្រាក់ហោប៉ៅពីក្រសួងអប់រំ យុវជន និងកីឡា រីឯការចំណាយលើថ្លៃសំបុត្រយន្តហោះទៅមកក្រោមការឧបត្ថម្ភពីក្រុមហ៊ុន Air Asia ស្របពេលដែលលោកជំទាវ ញ៉ែម មរតក ជាប្រធានសហព័ន្ធតែងតែប្រឹងប្រែងក្នុងកិច្ចការដំណើរការអភិវឌ្ឍន៍ជំនាញកីឡារបស់កម្ពុជាមួយនេះ។

លោកស្រី ហង់ ស៊ីមន អគ្គលេខាធិការសហព័ន្ធកីឡារាំកម្ពុជា បានជម្រាបជូនថា យោងតាមផែនការ និងតម្រូវការរបស់សហព័ន្ធក្នុងការចម្រាញ់ធនធាន ដើម្បីចួលរួមការប្រកួតអន្តរជាតិនានា ក្នុងនៃស្វែងរកមេដាយកម្រិតណាមួយជូនមាតុភូមិ កីឡាករកីឡាការិនីរាំបានប្រមូលផ្តុំហ្វឹកហាត់ជាប្រចាំ តាំងពីឆ្នាំ២០២៥មកម្លេះ ដើម្បីសម្រួចបច្ចេកទេស តៀមខ្លួនចូលរួមការប្រកួតកម្រិតអាស៊ី និង អាស៊ីអាគ្នេយ៍ នៅប្រទេសម៉ាឡេស៊ី។ អគ្គលេខាធិការរូបនេះបន្តបែបនេះថា៖ «រាល់ថ្ងៃ កីឡាករ កីឡាការិនីរាំកម្ពុជាហ្វឹកហាត់យ៉ាងសកម្ម មិនថាថ្ងៃសៅរិ៍ ឬថ្ងៃអាទិត្យនោះទេ ពោលគឺហ្វឹកហាត់ជាគូបន្ថែមនៅទីតាំងរៀងៗខ្លួន។ យើងជឿជាក់ថា កីឡាករ កីឡាការិនីរាំកម្ពុជានឹងធ្វើបានល្អ ដូចកាលពីប្រកួតជើងឯកអាស៊ីអាគ្នេយ៍នៅប្រទេសវៀតណាម កាលពីឆ្នាំ២០២៥ ដោយពេលនោះ អត្តពលិករាំកម្ពុជាដណ្តើមបានមេដាយសរុប ១៧គ្រឿង ក្នុងនោះមានមេដាយមាស៤គ្រឿង»។

គួរបញ្ជាក់ថា សហព័ន្ធកីឡារាំកម្ពុជាគ្រោងនឹងបញ្ជូនប្រតិភូ ចៅក្រម គ្រូបង្វឹក និងកីឡាករ-កីឡាការិនីសរុបចំនួន២២ នាក់ ដឹកនាំដោយលោកសី្រ បាន សុជាតិ ជាប្រធានប្រតិភូ លោកស្រី You Shu Jie ចៅក្រម និងលោក ស៊ូវ តុង ជាគ្រូបង្វឹកធំ និងលោក សួន កូស៊ុល ជាគ្រូជំនួយ។ សម្រាប់អត្តពលិក១៨នាក់ ក្នុងនោះកីឡាករ៨នាក់ និងកីឡារិនី ១០នាក់ នឹងចូលរួមប្រកួតប្រជែងលើ៥៣វិញ្ញសា៕ ដោយ

ហេង ណាលីន