AKP ព្រះសីហនុ ថ្ងៃទី១៥ ខែកក្កដា ឆ្នាំ២០២៦--លោក សែជូ សិទ្ធិជោតិ អនុប្រធានមន្ទីរសុខាភិបាលខេត្តព្រះសីហនុ ព្រមទាំងមន្ត្រីជំនាញនៃមន្ទីរសុខាភិបាលនៃរដ្ឋបាលខេត្តព្រះសីហនុ នាថ្ងៃទី១៤ ខែកក្កដា ឆ្នាំ២០២៦ បានចូលរួមក្នុងកម្មវិធីពិនិត្យ និងព្យាបាលជំងឺទូទៅដោយឥតគិតថ្លៃជូនដល់បងប្អូនប្រជាពលរដ្ឋនៅក្នុងឃុំអូរបាក់រទេះ ស្រុកកំពង់សិលា ខេត្តព្រះសីហនុ មានរយៈពេលពីរថ្ងៃ គឺចាប់ពីថ្ងៃទី១៤ ដល់ថ្ងៃទី១៥ ខែកក្កដា ឆ្នាំ២០២៦។

លោកអនុប្រធានមន្ទីរសុខាភិបាលខេត្តព្រះសីហនុបានឱ្យដឹងថា កម្មវិធីមនុស្សធម៌នេះធ្វើឡើងដោយមានកិច្ចសហប្រតិបត្តិការរវាងក្រុមគ្រូពេទ្យស្ម័គ្រចិត្តនៃសមាគមបេសកកម្មមនុស្សធម៌កម្ពុជារបស់ប្រទេសបារាំង ជាមួយក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ រដ្ឋបាលស្រុកកំពង់សិលា និងមន្ទីរសុខាភិបាលខេត្តព្រះសីហនុ នៅប៉ុស្តិ៍សុខភាពអាយុយើនយូរអូរបាក់រទេះ ស្ថិតក្នុងភូមិស្ទឹងច្រាល ឃុំអូរបាក់រទេះ ស្រុកកំពង់សិលា។

លោកអនុប្រធានមន្ទីរបានបញ្ជាក់ថា សកម្មភាពនេះមានគោលបំណងជួយសម្រួល និងផ្តល់សេវាថែទាំសុខភាព ក្នុងការពិនិត្យ ព្យាបាលជំងឺទូទៅជូនប្រជាពលរដ្ឋនៅក្នុងមូលដ្ឋានដាច់ស្រយាលដោយ មិនមានការយកកម្រៃ ដើម្បីរួមចំណែកលើកកម្ពស់សុខុមាលភាព និងចូលរួមជួយកាត់បន្ថយការចំណាយលើសេវាសុខាភិបាលរបស់ប្រជាពលរដ្ឋនៅមូលដ្ឋាន។ លោកសង្ឃឹមថា ប្រជាពលរដ្ឋនៅស្រុកកំពង់សិលា និងមកទទួលសេវាសុខាភិបាលពិនិត្យ ព្យាបាលដោយឥតគិតថ្លៃពីក្រុមគ្រូពេទ្យបារាំងឪ្យបានគ្រប់គ្នា ជាពិសេសមនុស្ស ដែលមានវ័យចំណាស់៕

ដោយ ងូ សុមុនី