AKP កណ្តាល ថ្ងៃទី១៥ ខែកក្កដា ឆ្នាំ ២០២៦--រដ្ឋបាលខេត្តកណ្តាល កាលពីថ្ងៃទី១៤ ខែកក្កដា ឆ្នាំ២០២៦ បានរៀបចំកិច្ចប្រជុំបូកសរុបលទ្ធផលការងារនៃការអនុវត្តគោលនយោបាយ ភូមិ ឃុំ-សង្កាត់មានសុវត្ថិភាព ឆមាសទី១ និងទិសដៅអនុវត្តការងារបន្តឆមាសទី២ ក្រោមអធិបតីឯកឧត្តម អង មង្គល រដ្ឋលេខាធិការក្រសួងមហាផ្ទៃ ឯកឧត្តម ឯម សំណាង អនុរដ្ឋលេខាធិការក្រសួងមហាផ្ទៃ ឯកឧត្តម នូ សាខន ប្រធានក្រុមប្រឹក្សាខេត្ត និងឯកឧត្តម គួច ចំរើន អភិបាលខេត្តកណ្ដាល ព្រមទាំងមានអញ្ជើញការចូលរួមពីអាជ្ញាធរក្រុង-ស្រុក ឃុំ-សង្កាត់ មន្ទីរអង្គភាពជុំវិញខេត្ត និងកងកម្លាំងមានសមត្ថកិច្ចជាច្រើនរូប។

ក្នុងកិច្ចប្រជុំនោះ ឯកឧត្តម គួច ចំរើន បានមានប្រសាសន៍ណែនាំឱ្យអាជ្ញាធរគ្រប់ថ្នាក់ និងកងកម្លាពាក់ព័ន្ធ ត្រូវបន្តខិតខំបង្ក្រាបបទល្មើសគ្រប់ប្រភេទនៅតាមមូលដ្ឋាន ជាពិសេសត្រូវបន្តយកចិត្តទុកដាក់លើគ្រួសារកងទ័ព ដោយផ្តល់ការលើកទឹកចិត្តផ្នែកស្មារតីដល់កងកម្លាំងដែលកំពុងបំពេញភារកិច្ចការពារបូរណភាពទឹកដីនៅតាមព្រំដែន។ ឯកឧត្តមអភិបាលខេត្ត ក៏បានណែនាំឱ្យអាជ្ញាធរគ្រប់លំដាប់ថ្នាក់ ត្រូវបន្តយកចិត្តទុកដាក់ដោះស្រាយបញ្ហាប្រឈមនានារបស់ប្រជាពលរដ្ឋឱ្យបានទាន់ពេលវេលា និងមានប្រសិទ្ធភាព ដើម្បីលើកកម្ពស់ជីវភាព និងសុវត្ថិភាពរស់នៅរបស់ប្រជាពលរដ្ឋនៅមូលដ្ឋានផងដែរ។ អាជ្ញាធរ និងកម្លាំងមានសមត្ថកិច្ច ត្រូវត្រៀមលក្ខណៈសម្រាប់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នាពេលខាងមុខ ដោយត្រូវពង្រឹងការរក្សាសន្តិសុខ សណ្ដាប់ធ្នាប់ និងសម្រួលចរាចរណ៍ ដើម្បីឱ្យបេក្ខជនអាចធ្វើដំណើរទៅមណ្ឌលប្រឡងបានទាន់ពេលវេលា ត្រូវខិតខំធ្វើយ៉ាងណាឱ្យដំណើរការប្រឡងប្រព្រឹត្តទៅដោយរលូន។

ទាក់ទងនឹងបញ្ហាជំងឺគ្រុនឈាម ឯកឧត្តមអភិបាល បានអំពាវនាវឱ្យអាជ្ញាធរមូលដ្ឋាន ត្រូវសហការជាមួយសុខាភិបាលក្នុងការផ្សព្វផ្សាយអប់រំដល់ប្រជាពលរដ្ឋអំពីវិធានការបង្ការ ការបាញ់ថ្នាំកម្ចាត់មូស និងការប្រុងប្រយ័ត្នចំពោះរោគសញ្ញាជំងឺគ្រុនឈាម នៅពេលដែលសង្ស័យថាបានឆ្លងជំងឺនេះ ត្រូវប្រញាប់បញ្ជូនអ្នកជំងឺទៅមន្ទីរពេទ្យឱ្យបានទាន់ពេលវេលា។ អាជ្ញាធរគ្រប់លំដាប់ថ្នាក់ ត្រូវបង្កើនការផ្សព្វផ្សាយដល់ប្រជាពលរដ្ឋ ឱ្យមានការប្រុងប្រយ័ត្នចំពោះការលង់ទឹក និងត្រៀមផែនការសង្គ្រោះបន្ទាន់ក្នុងករណីកើតមានទឹកជំនន់កើតឡើង។

ថ្លែងក្នុងកិច្ចប្រជុំនោះ ឯកឧត្តម អង មង្គល រដ្ឋលេខាធិការក្រសួងមហាផ្ទៃ បានកោតសរសើរ និងវាយតម្លៃខ្ពស់ដល់រដ្ឋបាលខេត្តដែលបានខិតខំអនុវត្តគោលនយោបាយ ភូមិ ឃុំ-សង្កាត់មានសុវត្ថិភាពទទួលបានលទ្ធផលគួរជាទីមោទនៈ។ ទន្ទឹមនឹងនេះ ឯកឧត្តមរដ្ឋលេខាធិការ បានជំរុញ និងលើកទឹកចិត្តដល់ កងកម្លាំងមានសមត្ថកិច្ចគ្រប់ថ្នាក់ត្រូវបន្តពង្រឹងការផ្សព្វផ្សាយគោលនយោបាយភូមិ ឃុំ-សង្កាត់មានសុវត្ថិភាព ដល់មន្ត្រីរាជការស៊ីវិល កងកម្លាំងមានសមត្ថកិច្ចគ្រប់ថ្នាក់ រដ្ឋបាលឃុំ-សង្កាត់ ប្រជាពលរដ្ឋ អង្គការសង្គមស៊ីវិល និងអ្នកពាក់ព័ន្ធនានា ដើម្បីលើកកម្ពស់ការយល់ដឹង ជាពិសេសការចូលរួមក្នុងការអនុវត្តគោលនយោបាយភូមិ ឃុំ-សង្កាត់មានសុវត្ថិភាពប្រកបដោយប្រសិទ្ធភាព និងទទួលបានលទ្ធផលកាន់តែល្អប្រសើរឡើងនាឆ្នាំបន្តបន្ទាប់ទៀត។ រដ្ឋបាលខេត្តត្រូវបន្តពង្រឹងការងារគណៈបញ្ជាការឯកភាពខេត្តឱ្យបានរឹងមាំ ក្តាប់បាននូវរាល់សភាពការនានាដែលកើតមានតាមក្រុង-ស្រុក ក្នុងដែនសមត្ថកិច្ចខ្លួន ដើម្បីធ្វើការដោះស្រាយឆ្លើយតបបានទាន់ពេលវេលា ត្រូវចុះផ្សព្វផ្សាយផ្ទាល់តាមខ្នងផ្ទះប្រជាពលដ្ឋអំពីគោលនយោបាយភូមិឃុំមានសុវត្ថិភាព ត្រូវរៀបចំវេទិការសាធារណៈដើម្បីស្តាប់កង្វល់ និងសំណូមពរនានាពីប្រជាពលដ្ឋ ដើម្បីរួមគ្នាដោះស្រាយឱ្យបានទាន់ពេលវេលាផងដែរ។

បើយោងតាមលទ្ធផលការងារនៃការអនុវត្តគោលនយោបាយ ភូមិ ឃុំ-សង្កាត់មានសុវត្ថិភាព ឆមាសទី១ ប្រចាំឆ្នាំ២០២៦ ចំពោះអត្តសញ្ញាណប័ណ្ណសញ្ជាតិខ្មែរសម្រាប់អ្នកគ្រប់អាយុថ្មី បំពេញបែបបទបាន ១២.៧៥១នាក់ ស្មើ ៥៨,៨៩% និងបានចែកជូន ៩.៤៩៨សន្លឹក។ សម្រាប់អ្នកអស់សុពលភាព បានបំពេញបែបបទថ្មីចំនួន ១៣៥.៤៨៥នាក់ និងចែកជូនទុតិយតាគំរូថ្មីបាន ៨៧.៧៦៧សន្លឹក។ ចំពោះព្រះសង្ឃ បានបំពេញបែបបទប្រគេនចំនួន ២៥៣អង្គ ក្នុងចំណោមព្រះសង្ឃសរុប ៣.៦៨១អង្គ។ សៀវភៅស្នាក់នៅ (ក២) ត្រូវបានផ្តល់ជូនចំនួន ៦.៧៧២គ្រួសារ ក្នុងនោះផ្តល់ថ្មី ៤.០៦៧ និងទុតិយតា ២.៧១២គ្រួសារ ។ ចំណែកសៀវភៅគ្រួសារ (ក៤) ត្រូវបានផ្តល់ជូនចំនួន ២.៥៣៤គ្រួសារ ក្នុងនោះផ្តល់ថ្មី ១.៨១១ និងទុតិយតា ៧២៣គ្រួសារ ។ អង្គភាពច្រកចេញចូលតែមួយសាលាខេត្ត ទទួលបានការស្នើសុំសេវាចំនួន ២៩.៦០០សេវា។ ខណ្ឌរដ្ឋបាលព្រៃឈើខេត្តកណ្តាល បានចេញលិខិតអនុញ្ញាតបង្កើតរោងសន្និធិលក់អនុផលព្រៃឈើ ១១កន្លែង និងរោងសិប្បកម្មកែច្នៃ ១១កន្លែង៕

ដោយ៖ ណយ នឿន (ប្រភព៖ រដ្ឋបាលខេត្តកណ្តាល)