AKP បន្ទាយមានជ័យ ថ្ងៃទី១៥ ខែកក្កដា ឆ្នាំ ២០២៦--ក្នុងបរិបទដែលអាកាសធាតុមានការប្រែប្រួលស្មុគស្មាញ និងដើម្បីធានាបាននូវសុវត្ថិភាពខ្ពស់បំផុតជូនប្រជាពលរដ្ឋ កាលពីថ្ងៃទី១៤ ខែកក្កដា ឆ្នាំ២០២៦ លោក លៀម សុដា អភិបាលរងខេត្តបន្ទាយមានជ័យ បានដឹកនាំក្រុមការងារជំនាញចុះពិនិត្យដោយផ្ទាល់នូវស្ថានភាពទ្វារទឹកអាងពង្រ ក្នុងសង្កាត់និមិត្ត ក្រុងប៉ោយប៉ែត ដែលជាគន្លឹះយុទ្ធសាស្ត្រក្នុងការគ្រប់គ្រងទឹកនៅតំបន់នេះ។

ក្នុងសកម្មភាពចុះពិនិត្យជាក់ស្តែង លោក លៀម សុដា បានសង្កត់ធ្ងន់លើការងារ «បង្ការ» ជាជាង «សង្គ្រោះ» ដោយបានផ្តល់អនុសាសន៍យ៉ាងម៉ឺងម៉ាត់ដល់អាជ្ញាធរក្រុង និងមន្ត្រីជំនាញធនធាទឹកថា អាជ្ញាធរគ្រប់លំដាប់ថ្នាក់ ត្រូវតាមដាន និងក្តាប់ឱ្យជាប់នូវរាល់បម្រែបម្រួលអាកាសធាតុ ក៏ដូចជាស្ថានភាពកម្ពស់ទឹកក្នុងអាងពង្រជាប្រចាំ។ យើងមិនអាចធ្វេសប្រហែសបានឡើយ ដើម្បីធានាថា វិធានការឆ្លើយតបនឹងកើតឡើងបានទាន់ពេលវេលាបំផុត។

អាងពង្រ មិនត្រឹមតែជាបេះដូងនៃវិស័យកសិកម្មសម្រាប់ប្រជាកសិករក្នុងតំបន់ប៉ុណ្ណោះទេ ប៉ុន្តែវាក៏ជាសន្ទះការពារការជន់លិចលំនៅឋាននៅក្នុងក្រុងប៉ោយប៉ែតផងដែរ។ លោកអភិបាលរងខេត្ត បានដាក់បទបញ្ជាដល់ក្រុមការងារបច្ចេកទេសឱ្យគ្រប់គ្រងការបើក-បិទទ្វារទឹក ដែលត្រូវអនុវត្តឱ្យបានហ្មត់ចត់ និងត្រឹមត្រូវតាមលក្ខណៈបច្ចេកទេស ដើម្បីរក្សាតុល្យភាពទឹក ជៀសវាងការបង្កផលប៉ះពាល់ដល់ទាំងតំបន់ខាងលើ និងតំបន់ខ្សែទឹកខាងក្រោម។ ត្រៀមលក្ខណៈសរុប ត្រៀមសម្ភារ និងកម្លាំងមនុស្សឱ្យរួចរាល់ ដើម្បីអន្តរាគមន៍បន្ទាន់ក្នុងករណីមានការលេចធ្លាយ ឬហេតុការណ៍មិនប្រក្រតីណាមួយកើតឡើង។

លោក លៀម សុដា បានគូសបញ្ជាក់ជាចុងក្រោយថា គ្រប់សកម្មភាពទាំងអស់ គឺធ្វើឡើងដោយឈរលើគោលការណ៍ «ការពារអាយុជីវិត និងទ្រព្យសម្បត្តិរបស់ប្រជាពលរដ្ឋជាចម្បង»។ តាមរយៈការចុះពិនិត្យផ្ទាល់ និងការត្រៀមលក្ខណៈជាមុននេះ អាជ្ញាធរខេត្តបង្ហាញពីការប្តេជ្ញាចិត្តយ៉ាងមុតមាំក្នុងការទប់ស្កាត់គ្រោះទឹកជំនន់ និងកាត់បន្ថយផលប៉ះពាល់ដែលអាចកើតមានដល់បងប្អូនប្រជាពលរដ្ឋក្នុងរដូវវស្សានេះឱ្យនៅកម្រិតទាបបំផុត៕

ដោយ៖ ឈុន សារ៉ាត